Փաստ ինֆո

Դատարանը պարտավորեցրել է ՀՀ ԶՈՒ ԳՇ նախկին պետ, ՀԱՊԿ նախկին քարտուղար Յուրի Խաչատուրովի որդուն՝ Իգոր Խաչատուրովին, ներողություն խնդրել Հանրային խորհրդի նախկին նախագահ Ստյոպա Սաֆարյանից։ Երևանի ընդհանուր իրավասության դատարանը՝ դատավոր Մուրադ Հովակիմյանի նախագահությամբ, մասնակի բավարարել է Սաֆարյանի հայցադիմումն՝ ընդդեմ Իգոր Խաչատուրովի։ Այս մասին «Փաստինֆո»-ն տեղեկանում է «Դատալեքս» դատական-տեղեկատվական համակարգից։

Հիշեցնենք, որ Ստյոպա Սաֆարյանը ներկայացրած հայցադիմումով պահանջում էր, որ կրտսեր Խաչատուրովը ներողություն խնդրի իր կողմից վիրավորանք գնահատված արտահայտությունների համար, ինչպես նաեւ փոխհատուցի ենթադրյալ պատճառված բարոյական վնասը՝ 500.000 դրամի չափով։ Հայցադիմում ներկայացնելու հիմք էր հանդիսացել «Իգոր Խաչատուրովի պատասխանը՝ Ստյոպա Սաֆարյանին» վերտառությամբ հրապարակումը։ Խաչատուրովը, պատասխանելով իր հոր՝ ՀՀ ԶՈՒ ԳՇ նախկին պետ Յուրի Խաչատուրովին ուղղված Սաֆարյանի «զրպարտչական, վիրավորական մեղադրանքներին, մասնավորապես նշել էր. «Բաղանիս Այրումի հարբած թուրք քիրվայի դուրսպրծուկ, էս անիմաստ երկար տեքստդ հանկարծ չջնջես, որ պատասխան ես տալու, տող առ տող: Մեկ է, քեզ էդ անկարայի չվերթին տեղ չեն տալու»։ Նշված արտահայտություններն` ըստ Սաֆարյանի, վիրավորանք է, ինչի համար վերջինս պահանջել է ներողություն խնդրել, ինչպես նաև՝ դրամական փոխհատուցում՝ 500.000 դրամի չափով։ Դատաքննության ընթացքում պատասխանող կողմը պնդել է, որ Իգոր Խաչատուրովի կողմից արված հայտարարությունը գնահատողական դատողություն է և պայմանավորված էր հանրային գերակա շահով, քանի որ Իգոր Խաչատուրովի՝ վիճարկվող այդ արտահայտությունը եղել է քաղաքական լարված իրավիճակում՝ հայ-թուրքական հարաբերությունների հիմնահարցերի քննարկումների ֆոնին։ Բացի այդ, Իգոր Խաչատուրովն այդկերպ արձագանքել էր Ստյոպա Սաֆարյանի՝ Յուրի Խաչատուրովի հասցեին արված հայտարարությանը։

Երևանի ընդհանուր իրավասության դատարանը՝ դատավոր Մուրադ Հովակիմյանի նախագահությամբ, մասնակի բավարարել է Ստյոպա Սաֆարյանի հայցադիմումը՝ պարտավորեցնելով Իգոր Խաչատուրովին ներողություն խնդրել Սաֆարյանից։ Դատարանը, մասնավորապես, գտել է, որ Իգոր Խաչատուրովի կողմից արված հայտարարությունը գնահատողական դատողություն համարվել չի կարող, առկա են վիրավորանք գնահատելու բոլոր վավերապայմանները, ըստ այդմ, նշված արտահայտությունը վիրավորանք է։ Ինչ վերաբերում է պատասխանողի պնդումներին, համաձայն որի՝ Իգոր Խաչատուրովի հայտարարությունն արձագանք էր պատասխանողի հոր՝ Յուրի Խաչատուրովի, հասցեին Ստյոպա Սաֆարյանի «զրպարտչական» հայտարարություններին, ապա դատարանն այս առումով արձանագրել է, որ ՀՀ վճռաբեկ դատարանը, ՄԻԵԴ-ը արձանագրել են միայն «տուժողի» կամ «շահագրգիռ անձի» իրավունքների պաշտպանության միջոց, իսկ տվյալ դեպքում «տուժող» կամ «շահագրգիռ անձ» կարող է հանդիսանալ միայն Պատասխանողի հայրը, այլ ոչ՝ Պատասխանողը: Ինչ վերաբերում է գումարային պահանջին, ապա դատարանը որոշել է Խաչատուրովից հօգուտս Սաֆարյանի բռնագանձել 120.000 դրամ՝ որպես վիրավորանքի համար փոխհատուցման գումար և 100.000 դրամ՝ որպես փաստաբանի խելամիտ վարձատրության գումար։ Վճիռը հրապարակվել է հունիսի 19-ին, առ այս պահը առկա չէ տեղեկություն՝ այն բողոքարկելու վերաբերյալ։ Ի դեպ, դատավոր Մուրադ Հովակիմյանը տեղափոխվել է Սյունիքի մարզի ընդհանուր իրավասության դատարան։

Հեղինակ՝ Իզաբել Սահակյան

Աղբյուր` Փաստինֆո