Փաստ ինֆո

Ես զայրացած եմ երեկվա դեպքերի բերումով, երբ Կառավարության շենքի դիմաց հավաքված ինչ – որ մարդիկ, ներկայանալով «Խաչակիրներ» ջոկատի անդամներ, ինչ – որ անհասկանալի պահանջ էին ներկայացնում, իբր ՀՀ վարչապետին և իրենց թույլ տալիս հայտարարելու՝ ով չի միանում իրենց բողոքի ակցիային հայ չէ, քրիստոնյան չէ, թուրք է և այլն։ Կուզենայի այդ մարդկանց հարցնել՝ դուք ընդհանրապես գիտե՞ք՝ ի՞նչ է նշանակում լինել քրիստոնյա, գիտե՞ք՝ ի՞նչ է դա կամ գիտե՞ք՝ ո՞վ է Քրիստոսը, որ մի հատ էլ եկել եք Կառավարության շենքի դիմաց հայտարարում եք, թե աղոթք եք անում, որ պատերազմ սկսվի,- «Փաստինֆո» լրատվականի հետ զրույցում ասում է «Սև Հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը, խոսելով Կառավարության շենքի առաջ հավաքված «Խաչակիրներ» ջոկատի երեկվա նախաձեռնության մասին, որով, վերջիններս, իբր, պատրաստվում էին կոշտ քայլերի դիմել, եթե Կառավարություն չլսի իրենց բողոքն ու թույլ չտա, որպեսզի Լաչինի միջանցքով հումանիտար օգնությունը հասնի Արցախ։

Սերոբ Գասպարյանն ասում է՝ այսօր արցախյան երեք պատերազմաներով անցած 18 հրամանատարների հետ է խոսել, նրանց հետ քննարկել երեկ Կառավարության շենքի առաջ տեղի ունեցածը, բայց նրանցից որևէ մեկը չի ճանաչել ոչ միայն բողոքի ակցիա իրականացնող ազատամարտիկներին, այլ նաև նրանց առաջնորդ ներկայացող «Խաչակիրներ» ջոկատի հրամանատար Սարգիս Պողոսյանին.«Ոչ մեկ չգիտի, չի ճանաչում ովքե՞ր էին այդ հավաքվածները կամ ո՞վ է այդ հրամանատարը, որտե՞ղ է կռվել պատերազմի ժամանակ ու ե՞րբ, որ իրենց իրավունք է վերապահում խոսել պատերազմներից։ Խոսել եմ «Հայաստանի ազատագրման բանակ», «Ազատամարտիկ», «Սպիտակ կամավորական», «Փառապանծ մարտիկ», «Կամետա», «Մանախ», «Արարատ  30», «Հաբ ջոկատ», «Նեմեսիս մահապարտներ», «Հայոց կռունկներ», «Հայ դատ մահապարտներ», «Արծիվ  30 մահապարտներ», «Վահագն» ՌՀՀԿ, «Ֆիդայիներ» ՌՀՀԿ, «Արարչական հայկազունեիների շարժում» ջոկատների հրամանատարների հետ։ Որևէ մեկը դրանց չէր ճանաչում»,- ասում է Սերոբ Գասպարյանը։

Արցախը յուրաքանչյուր գիտակից հայի շնչափողն ու կերակրափողն է, անկախ նրանից՝ որտեղ է ապրում այդ հայը՝ Հայաստանում թե՞ Սփյուռքում, ասում է Սերոբ Գասպարյանն ու հավելում.«Մենք բոլորս, առավել ևս ես, որպես «Սև Հովազ» ՌՀՀԿ ջոկատի լեգենդար հրամանատար Ռուստամ Գասպարյանի եղբայր, ամենաշատ շահագրգռվածներից մեկն եմ, որ Արցախի փրկության ճանապարհը մեկ օր շուտ բացվի և, վերջապես, մենք կարողնանաք լուծել մեր Հայրենիքի այդ հատվածի խնդիրը, որ կանգնել է մեր կոկորդին և թույլ չի տալիս, որպեսզի արժանապատվություն ունեցող հայը հանգիստ շնչի։ Սակայն, երեկ մենք 18 հրամանատարների հետ միասին չկարողացանք հասկանալ ի վերջո՝ ովքե՞ր էին դրանք ու ի՞նչն էր դրանց պահանջը։ Ի դեպ ասեմ, որ իրական «Խաչակիրներ» ջոկատի անդամների հետ, ովքեր 1992 – 94 թթ. մասնակցել են արցախյան առաջին գոյմարտին, ես նույնպես շփվել եմ, նրանք, նույնպես, այդ մարդկանց չեն ճանաչում, որպես «Խաչակիրներ»։ 

Սերոբ Գասպարյանը նկատում է նաև՝ երեկ Կառավարության շենքի դիմաց բողոքի ելածների մեջ կային մարդիկ, ովքեր անհասկանալի կամուֆլյաժներ հագած ազատամարտիկ էին ներկայանում և հայտարարում էին, թե գնում են ճանապարհ բացելու,  բայց երբ ոստիկաները մոտեցան, հանկարծ, լացակումած ձայնով խնդրեցին իրենց ձեռք չտալ, որովհետև իրենց փորը ցավում է.«Տղե՛րք, ոստիկան տեսաք լուծ ընկա՞ք։ Բա էդպե՞ս եք գնացել կռվին մասնակցելու, էդպե՞ս էիք գնում ճանապարհ բացելու։ Կամ էդ  ո՞րն էր ձեր կտրուկ և կոշտ քայլը, որով սպառնում էիք՝ եթե մինչև  ժամը 6 -ը ձեր բողոքին արձագանքող չլինի, դիմելու եք կոշտ քայլերի…Ու դուք ներկայանում եք, որպես ազատամրտիկ, կռված տղերք ու ձեր այս քայլերով ուզում եք անվանարկել մե՞զ»,- հարցադրումներ է անում  «Սև Հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը։

Ամփոփելով զրույցն, ազատամարտիկն  ասում է՝ ասֆալտի ֆիդայի տեսել էինք, բայց եթերների ֆիդայինե չէինք տեսել, դա էլ տեսանք.

«Այսօր էլ՝ վաղ առավոտից, սրանք գնացել են Կոռնիձոր, էնտեղ նկարվել են, տեղեկացրել, որ իրենք եկել – հասել են Կոռնիձոր ու հետ են վերադարձել։ Էս ի՞նչ կապիկություն է։ Իսկ եթե լուրջ, այս ողջ կապիկությունը մի նպատակ էր հետապնդում՝ համայն հայության մեջ՝ Հայաստանում և Սփյուռքում անվանարկել և վարկաբեկել իսկական կռված տղերքի անունն ու հեղինակությունը, իսկ թե ո՞ւմ նախաձեռնությունը կարող էր սա լինել, դեռ կպարզենք։ Մի բան հստակ է՝ դուք գնացել եք Կառավարության շենքի դիմաց Արցախի կյանքի ճանապարհը փակողից պահանջում եք, որ նա այդ ճանապարհը բացի՞։ Իսկապե՞ս… Ինչո՞ւ դուք չգիտե՞ք, տեղյակ չե՞ք, թե ո՞վ է այդ ճանապարհը փակել, որ եկել Կառավարության շենքի առաջ ինչ - որ բեմադրություններ եք անում, ձեզ չմիացողներին թուրք և ոչ քրիստոնյա կոչում, իսկ երբ ոստիկանները մոտենում են, լացակումած խնդրում եք՝ ձեզ ձեռք չտալ, որովհեըև ձեր փորը ցավում է…»,-կիսահեգնական տոնով ավարտում է զրույցը Սերոբ Գասպարյանը։  

Աղբյուր` Փաստինֆո