Փաստ ինֆո

«Արդեն 5 տարի շարունակ, հայաստանյան և Արցախի թշնամի իշխանությունները, որևէ հանցագործություն կատարելուց առաջ, նախ այդ մասին լուրեր են դաշտ նետում, փորձում հասկանալ ժողովրդի տրամադրվածությունն ու հնարավոր արձագանքը՝ այս կամ այն դավադիր գործարքի վերաբերյալ, հետո՝ կատարում նախապես պլանավորած իրենց այդ հանցագործությունը։ Արցախի Պաշտպանության բանակի լուրծարման վերաբերյալ լուրը հերթական օվերտոնի պատուհանն է, որ դաշտ է նետվել, այս անգամ Արցախի դավադիր իշխանությունների կողմից՝ նույն նպատակով»,- «Փաստինֆո» լրատվականի հետ զրույցում ասում է «Սև հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը։

Հիշեցնենք՝ նախօրեին Արցախի նախագահ Արայիկ Հարությունյանն, Արցախի Ազգային Ժողովում հարց ու պատասխանի ընթացքում ասել էր՝ Ադրբեջանի նախագահն իրենց առջև նախապայմաններ է դրել, որոնցից մեկն՝ Արցախի Պաշտպանության բանակի լուծարման պահանջն է, որի բավարարումից հետո, միայն, ինքն արցախյան կողմի հետ բանակցային հարցեր կքննարկի։

Սերոբ Գասպարյանը նկատում է՝ հերթական անգամ մեկնարկել է կեղծ խաղաղության օրակարգը, որով դավադիր իշխանությունները փորձում են կերակրել միամիտ ժողովրդին. «Այս օրակարգին, շուտով, կմիանան նաև իշխանամերձ լրատվամիջոցները և կսկսեն հերթական անգամ վախ ու խուճապ տարածել ժողովրդի մեջ՝ եթե Արցախի Պաշտպանության բանակը չլուծարվի, Ալիևը նորից հարձակվելու է Արցախի և Հայաստանի վրա, կոտորի մեզ, հետևաբար, խաղաղ ապրելու համար պետք է, որպեսզի Արցախն իրեն պաշտպանող բանակ չունենա և այլն, և այլն։ Ավելացնեմ նաև, որ այս ծրագիրը վաղուց է եղել ազգադավ իշխանությունների օրակարգում, դեռևս այն ժամանակ, երբ հայտարարեցին, թե հայկական զորքը պետք է դուրս գա Արցախից, ինչկ տեղի ունեցավ, իսկ հիմա՝ եկել կոնկրետ Արցախի Պաշտպանության բանակը լուծարելու ժամանակը, սկսել են դրանով «կերակրել» ժողովրդին»,- ասում է ազատամարտիկը։

Հարցին՝ արդյո՞ք, Արցախի պետականությունն, այդ թվում նաև՝ պաշտպանության բանակը տեղի՞ են տալու ագրեսոր Ալիևի հոխորտանքներին և գնալո՞ւ են լուծարման ճանապարհով՝ Սերոբ Գասպարյանը պատասխանում է՝ նախ և առաջ, Արցախում ապրող մեր հայրենակիցները պետք է արագ վերգտնեն իրենց կորցրած ինքնապաշտպանական բնազդը. «Ես բազմիցս ասել եմ՝ եթե մենք հաշվարկել ենք, որ Արցախում հիմա 120.000 բնակիչ կա, որտեղ թուրքը մտել և սովամահի է ենթարկում յուրաքանչյուր ընտանիքի երեխային, հնարավոր ամեն ձևերով փորձելով նսեմացնել և ստրկացնել նրանց, ապա ինչի՞ են սպասում իրենց տներում նստած մեր արցախցի հայրենակիցները, ես սա չեմ հասկանում։ Ռո՞ւսին եք սպասում, ամերիկացո՞ւն…90- ականներին էլ նույն վիճակն էր, եթե չասենք ավելի վատ, բայց արցախցին ոտքի կանգնեց, միացանք իրար, միավորեցինք մեր կամքն ու ուժը և արժանապատիվ հաղթանակներ կերտեցինք։ Ի՞նչ է պատահել ձեզ հետ, սիրելի արցախցիներ, ո՞ւր է կորել, անհետացել ձեր ինքնապաշտպանական բնազդը, այդ ինչպե՞ս, ի՞նչ ճանապարհով են կարողացել բթացնել ձեր կամքն այնպես, որ ինքնակամ բռնել եք ցեղասպանվելու ուղին, չեմ կարողանում հասկանալ։ Ախր, անգամ, կենդանին ինքնապաշտպանական բնազդ ունի, որ երբ տեսնում է իր ձագին վտանգ է սպառնում՝ ոչնչացնում է իր կողքին եղած ամեն սպառնալիք, այս ի՞նչ է կատարվում ձեզ հետ…»,- տարակուսած ասում է Սերոբ Գասպարյանը։

Հարցին՝ ինչպե՞ս, ի՞նչ մեթոդներով Հայաստանում ապրողները կարող են օգնության ձեռք մեկնել արդեն ցեղասպանության վտանգի մեջ հայտնված Արցախի հայրենակիցներին, եթե Արցախն այս վիճակի մեջ դրել է Հայաստանի միանձնյա կառավարիչ՝ բռնակալ Փաշինյանը, Սերոբ Գասպարյանը պատասխանում է՝ Հայաստանի իշխանությունները դեռևս Հայաստան չեն.«Հայաստանում չափից մեծ թվով արժանապատիվ մարդիկ կան՝ լինի կին, թե տղամարդ, ովքեր պատրաստ են ամեն քայլի՝ հանուն Հայրենիքի լինելիության։ Հայաստանյան իշխանություններն այս երկրի հետ ոչ մի կապ չունեն։ Նույնիսկ մարդանման էլ չէ, որ մարդ ասեմ, այսպես ասենք՝ եթե մի արարած կարողանում է Ազգային Ժողովի բարձր ամբիոնից հայտարարել, որ ճանաչում է Ադրբեջանի տարածքային ամբողջականությունը՝ ներառյալ Արցախն՝ Ադրբեջանի կազմում և ասում է սա բոլորի անունից, ես հարց եմ տալիս դրան՝ ո՞վ ես դու, որ իմ անունից հայտարարություններ անես, ի՞նչ ունես դու այս երկրի համար արած, բացի թալանից ու Հայրենիք վաճառելուց՝ թիկունքային առնետներից սկսած, չգիտեմ ովքերով ավարտած։ Այս հարցը վերաբերում է վերջին 30 տարիների ընթացքում երկիրը ղեկավարած բոլորին՝ առանց որևէ բացառության»,- ասում է Սերոբ Գասպարյանը։

Հարցին՝ ի՞նչ է սպասվում առաջիկա ապագայում Արցախին և արցախցիներին, հատկապես, եթե Ալիևը սպառնացել է «Վրեժ 3» օպերացիայի իրականացմամբ, «Սև հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանը պատասխանում է՝ սպառնում են միայն վախկոտներին, Ալիևը մեզ սպառնալ չի կարող։ Կանենք այն, ինչ անհրաժեշտ կլինի առաջիկա ապագայում, եթե նա իրականություն դարձնի իր սպառնալիք՝ «Վրեժ 3» օպերացիան։

Աղբյուր` Փաստինֆո