Փաստ ինֆո

Դիլիջանի հյուրանոցներից մեկում 16-ամյա մատուցողին ծեծի ենթարկելու դեպքից շուրջ 2 ամիս անց ՆԳՆ Դիլիջանի բաժնի քրեական հետախուզության բաժանմունքի պետը կալանավորվել է, թեեւ ընդամենը օրեր առաջ որոշում էր կայացվել նրա նկատմամբ հետապնդում չիրականացնել՝ գործուն զղջման հիմքով։ Քրեական վարույթը ծածկադմփոց անելու փորձի թելերը տանում են դեպի համակարգային կոռուպցիա։

Ինչպես արդեն տեղեկացրել ենք՝ ապրիլի 10-ին Դիլիջանի հյուրանոցներից մեկում 16-ամյա մատուցողին ծեծի ենթարկելու համար ՆԳՆ Դիլիջանի բաժնի քրեական հետախուզության բաժանմունքի պետ Արսեն Ղայթմազյանին մեղադրանք է ներկայացվել միայն երեկ, այն էլ՝ հանրային ճնշման ներքո միայն, երբ մամուլում տարածվեց ծեծի տեսանյութը և պարզվեց, որ որոշում էր կայացվել գործուն զղջման հիմքով նրա նկատմամբ քրեական հետապնդում չիրականացնելու մասին (ՀՀ քրեական օրենսգրքի 81-րդ հոդվածի համաձայն՝ եթե անձն առաջին անգամ է հանցանք կատարել, ապա կարող է ազատվել քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նա համագործակցում է քրեական հետապնդման մարմինների հետ, չի վիճարկում իրեն մեղսագրվող արարքը, վնաս պատճառած լինելու դեպքում հատուցել կամ այլ կերպ հարթել է հանցագործությամբ պատճառված վնասը):

Ի դեպ, ցուցմունք տալիս տուժողը պնդել էր բողոքը՝ պահանջելով, որ Ղայթմազյանը քրեական պատասխանատվության ենթարկվի, սակայն այս պայմաններում, այդուհանդերձ, վարույթն իրականացնող մարմինը որոշել էր քրեական հետապնդում չիրականացնել։

Բարձրացված աղմուկից հետո վերադաս դատախազը որոշում կայացրեց՝ հետապնդում չիրականացնելու որոշումը վերացնելու մասին, ինչից հետո հանկարծ պարզեցին, որ կա նաեւ նրան մեղադրանք ներկայացնելու, ձերբակալելու, ապա նաեւ կալանավորելու հիմք։

Հատկանշական է, որ իրավապահներն իրենց անունը մաքրելու համար փաստացի ձերբակալել, ապա կալանքի են տարել մարդու, որի նկատմամբ օրեր առաջ քրեական հետապնդում չէին հարուցել՝ գործուն զղջման համար և, միևնույն ժամանակ, հայտնի չէ՝ արդյո՞ք գործը քննող քննիչը և հսկող դատախազը, որի որոշմամբ էլ հետապնդում չէր իրականացվել, որևէ պատասխանատվության ենթարկվել են, թե ոչ։ Քրեական հետապնդում չհարուցելու որոշումը վերացնելու պարագայում, այո, իրավապահները կարող են և պետք է խափանման միջոց կիրառեն մեղադրյալի նկատմամբ, սակայն այս պարագայում հարց է առաջանում՝ որն է եղ»ել կալանավորման հիմքը,արդյոք քրեական պետը փորձել է ազդել քննիչի, ապա նաեւ դատախազի վրա՝ իր նկատմամբ հետապնդում չիրականացնելու համար։

Այժմ Ղայթմազյանին մեղսագրվում է ՀՀ քրեական օրենսգրքի 196-րդ հոդվածի 2-րդ մասի 3-րդ կետով նախատեսված արարք՝ անչափահասին ֆիզիկական ուժեղ ցավ և հոգեկան տառապանք պատճառելը, ինչի համար որպես պատիժ է նախատեսվում ազատազրկումը՝ 3-7 տարի ժամկետով և գործուն զղջալու ինստիտուտը չի կարող կիրառվել ծանր հանցագործության դեպքում, մինչդեռ, արարքի գնահատականն ի սկզբանե տրվել էր անչափահասի նկատմամբ ֆիզիկական ներգործության հատկանիշներով, ինչը ոչ մեծ ծանրության հանցանք է։ Հետևապես, հարց է առաջ քաշվում, թե արդյո՞ք Դիլիջանի քրեական հետախուզության պետը չի օգտագործել իր պաշտոնեական դիրքը, իսկ Տավուշի մարզի դատախազը հովանավորչություն չի ցուցաբերել, ինչի հետևանքով հետապնդում չէր իրականացվել և այս պայմաններում արդյո՞ք իրավապահները չպետք է բարձրացնեն գործը քննող քննիչին, հսկողություն իրականացնող դատախազին, նաև՝ Տավուշի մարզի դատախազ Գոռ Ալոյանին պատասխանատվության ենթարկելու հարցը, քանզի այս պարագայում գործ ունենք արդեն համակարգային կոռուպցիայի հետ։

Հիշեցնենք, որ դեպքի մասին հայտնի դարձավ օրերս. մամուլում տարածվեց կադրերը, որտեղ տեսանելի էր, թե ինչպես է Ներքին Գործերի Նախարարության Տավուշի մարզի Դիլիջան քաղաքի քրեականի պետ Արսեն Ղայթմազյանը ծեծում 16-ամյա տղային։
Հետագայում պարզվեց, որ միջադեպը գրանցվել է մոտ 1,5 ամիս առաջ՝ ապրիլի 10-ին։ Նույն օրը հանցագործության մասին հաղորդում է ներկայացվել, ՀՀ ՔԿ Տավուշի մարզային քննչական վարչությունում ՀՀ քրեական օրենսգրքի 195-րդ հոդվածի 2-րդ մասի 3-րդ կետով նախաձեռնվել է քրեական վարույթ և կատարվել նախաքննություն։ Քրեական վարույթի շրջանակներում 16-ամյա պատանին, որը ռեստորանային համալիրում մատուցող է աշխատում, տուժող է ճանաչվել, սակայն տղային դաժանաբար ծեծի ենթարկելու համար պաշտոնյայի նկատմամբ քրեական հետապնդում այդպես էլ չէր հարուցվել՝ պաշտոնյայի «զղջման» հիմքով։ Փաստացի գործը փորձ էր արվել ծածկադմփոց արվել և միայն բարձրացված աղմուկից հետո վերադաս դատախազի որոշմամբ վերացվեց քրեական հետապնդում չիրականացնելու որոշումը։ Ղայթմազյանին մեղադրանք է ներկայացվել Քրեական օրենսգրքի 196-րդ հոդվածի 2-րդ մասի 3-րդ կետով (անչափահասին ֆիզիկական ուժեղ ցավ կամ հոգեկան ուժեղ տառապանք պատճառելը): Նա ձերբակալվել, ապա՝ կալանավորվել է։
ՆԳՆ պաշտոնյայի լիազորություններն այս պահին ժամանակավորապես կասեցված են՝ պայմանավորված ծառայողական քննությամբ։

Հեղինակ՝ Իզաբել Սահակյան

Աղբյուր` Փաստինֆո