Փաստ ինֆո

Ճանաչածս ամենակրտսեր շուշեցին Նարեն է․ 9 տարեկան աղջնակն արդեն 3-րդ տարին է, որ իր ամենասիրելի տոնը Շուշիում չի նշում։ Ձևավորված ավանդույթ ունեին՝ ամեն տարի հունիսի 1-ն ընտանիքով Ջդրդուզում էին նշում։

«Ջդրդուզը շատ եմ սիրում։ Ամեն առավոտ հայրիկը մեզ վերցնում էր ու գնում էինք այնտեղ։ Մարզվում էինք, պիկնիկ էինք անում․․․ Այնքան ուրախ էր անցնում օրերը․․․Իսկ հունիսի 1-ին պարտադիր պաղպաղակ էինք ուտում, հետո գնում գնում Ջդրդուզ»,-«Փաստինֆո»-ի հետ զրույցում  հիշում է 9-ամյա աղջնակը։

Նարեենց տունը Ջդրդուզին մոտ էր․ բնության այն հրաշագեղ տեսարանը, որ բացվում է այդ բարձունքից, աղջկա հիշողության մեջ բավականին վառ է տպավորվել, ու շատ հաճախ նաև արտացոլվում է նրա նկարներում․․․

Հարցիս՝ ինչ երազանքներ ունի, Նարեն ամենակարևորն է նշում՝ այս տարի սեպտեմբերի 27-ին վերադառնալ Շուշի․․․

«Ես ուզում էի մկրտվել Ղազանչեցոցում, բայց չհասցրեցի․․․Պատերազմն սկսվեց․․․Հիմա ամենաշատն ուզում եմ, որ Շուշին նորից ազատագրենք ու գնամ Ղազանչեցոցում մկրտվեմ»,-ասում է աղջնակը։

Ղազանչեցոցի անունը տալիս Նարեի ձայնի մեջ յուրահատուկ ուրախություն է զգացվում։ Ասում է՝ դասընկերներին ամենաշատը Ղազանչեցոցի ու Ջդրդուզի մասին է պատմում, քանի որ ամենաուրախ հիշողությունները դրանց հետ են կապված։

Աբովյանի թիվ 7 դպրոցում, որտեղ հաճախում է արդեն երկու տարի, Նարեն շատ ընկեր ունի, բայց ամենամտերիմը հադրութեցի երկու երեխեների հետ է։ Հարցին՝ իսկ ինչո՞ւ հենց այդ բալիկների հետ ես շատ մոտիկ, նա պատասխանում է․ «Որովհետև իրենք գիտեն Շուշիի մասին, խոսելու շատ թեմաներ ունենք․․․»։

Ֆիզիկապես՝ Աբովյանում, մտքով ու հոգով Շուշիում է Նարեն երեք տարի։ Զրույցի ընթացքում մեկ էլ ուրախ ձայնով բացականչում է․ «Մի քանի օր առաջ բակում պատահական Նարեին տեսա․ ինքը Շուշիի մեր բակից էր․․ Շատ էի ուրախացել․ չգիտեի, որ իրենք էլ են Աբովյան եկել»։

Նարեի հետ անվերջ կարելի է խոսել ապագայի պլանների, ընթերացած գրքերի մասին․ ցանկացած թեմա միշտ բերում, շաղկապում է ՝ Շուշիի հետ։ Արցախում՝ շրջափակման մեջ գրեթե կես տարի ապրող երեխաներին էլ երկու մաղթանք ունի՝ ուժեղ լինեն ու է՛լ պատերազմ բառը չլսեն․․․

Հարցիս՝ որոշե՞լ ես, թե ինչ ես դառնալու, երբ մեծանաս, միանգամից պատասխանում է․ «Դատավոր, որպեսզի դատեմ բոլոր էն չար մարդկանց, ովքեր թուրքերի պես են վարվում մեզ ու մեր երկրի հետ․․․»։

Աղբյուր` Փաստինֆո