Փաստ ինֆո

Այսօր Արցախն ու Հայաստանը կանգնած են անվտանգային ու գոյաբանական լուրջ խնդիրների առջև, բայց ես հիմա ստիպված եմ խոսել մի միջադեպից, որը մի կողմից տհաճ է ինձ համար, որովեհտև ինքս մեծ հարգանք ունեմ պետական ինստիտուտների հանդեպ և գիտակցում եմ պատգամավորի դերը հասարակությունում, բայց մյուս կողմից ունեն իրավիճակ, որ կուսակցության խմբային շահերից դրդված խեղաթյուրվում է իրականությունը, գործում են երկակի ստանդարտներ, տիրում է իշխանական անպատժելիության մթնոլորտ, իրականացվում՝ անթույլատրելի արարքներ։ Այս մասին ԱԺ-ում հայտարարեց «Հայաստան» խմբակցության պատգամավոր Մհեր Սահակյանը, որին անձեռնմխելիությունից զրկելու միջնորդագիրն այս պահին քննարկվում է ԱԺ-ում։

Մանրամասնելով դեպքից՝ Սահակյանը նշեց, որ վեճի ժամանակ Վլադիմիր Վարդանյանը ագրեսիվ վարքագիծ է ցուցաբերել, ինքը չի միջամտել այնքան ժամանակ, մինչև այն պահը, երբ իր համար ակնհայտ դարձավ, որ Վարդանյանը, չարաշահելով իր լիազորությունները, կողմնակալ ու սադրիչ պահվածք էր ցուցաբերում՝ գոռալով և ընդդիմադիր պատգամավորներին նկատողություն անելով։

«Երբ հերթական անգամ վարողը, ձեռքը սեղանին հարվածելով, ցանկանալով ընդգծել քննարկումը վարողի և իշխանական պատգամավոր լինելու իր առավելությունները, ցուցադրաբար նայելով աչքիս մեջ, երբ ոչինչ չէի արտահայտվել, մեղադրանքներ հնչեցնելով պահանջեց լռել, ես՝ ձեռքս հարվածելով սեղանին, ոտքի կանգնելով իմ տեղից՝ պահանջեցի, որ հարգանք ցուցաբերի ընդդիմադիր պատգամավորների նկատմամբ և կողմնակալ վերաբերմունք չդրսևորի, այդ պահին Վլադիմիր Վարդանյանը, չհանդուրժելով իմ նկատողությունը, տեղից վեր կանգնելով, բղավելով, որ ում վրա ուզի, երբ ուզի, կարող է բղավել, մոտեցավ ինձ և ես, հաշվի առնելով այդ ագրեսիվ վարքագիծը, բղավելով արագ ինձ մոտենալը, հարվածեցի՝ զուտ ինքնապաշտպանական նկատառումներից ելնելով»,- նշեց Մհեր Սահակյանը։

Սահակյանը նաև ընդգծեց՝ իր արարքներում խուլիգանությունը, խուլիգանական դրդումն ի սպառ բացակայում են, իսկ հարվածը հասցվել է ինքնապաշտպանության նկատառումներից ելնելով, իր համար հետաքրքիր է՝ արդյո՞ք ինքնապաշտպանության հանգամանքը քննության առարկա դարձվել է։

«Տիկին Վարդապետյան, Դուք կատա՞կ եք անում։ ԱԺ նախագահը թքում է քաղաքացու վրա, իշխող խմբակցության ղեկավարը սպառնում է լեզու և ականջ կտրել՝ ՄԻՊ-ի թեկնածուին, Դուք խուլիգանության հատկանիշներ չեք տեսնում, բայց իմ արարքի մեջ եք տեսնում, ով ընդամենը հարգալից վերաբերմունք էր պահանջում։ Արդյո՞ք սա երկակի ստանդարտներ չեն»,-նշեց Սահակյանը՝ հավելելով, որ դատախազը չի հայտնել նաև, որ առաջինը բղավել և ձեռքը սեղանին խփել է Վլադիմիր Վարդանյանը։
«Տպավորություն է, որ մեղադրանքը կազմելիս գլխավոր դատախազն ընթերցել է միայն Վլադիմիր Վարդանյանի ցուցմունք»,- նշեց նա։
Սահակյանը նշեց, որ, եթե ինքնապաշտպանության սահմաններն անցել է, ինքը պատրաստ է պատասխանատվության ենթարկվել, ավելին, ինքը կողմ կքվեարկի՝ իրեն անձեռնմխելիությունից զրկելու միջնորդագրին։

Աղբյուր` Փաստինֆո