Փաստ ինֆո

Քննարկումը նորմալ հունով ընթանում էր, մի պահ պատգամավորները սկսեցին բարձրաձայն խոսել։ Այս մասին լրագրողների հետ ճեպազրույցում նշեց ՔՊ-ական Վլադիմիր Վարդանյանը, ով ընդդիմադիր Մհեր Սահակյանի հետ միջադեպից հետո հայտնվել էր հիվանդանոցում։

«Ես փորձեցի ասել հետևյալը՝ ժողովուրդ ջան, եկեք վերադառնանք բովանդակային քննարկման փուլ։ Հետո պարոն Սահակյանը ասեց՝ չեք կարա մեր վրա ձայն բարձրացնեք, ասեցի՝ ես նիստը վարում եմ և շարունակում եմ վարել, բա՝ չեք կարա, չեք կարա, մոտեցավ ինձ որովհետև, կանգնել էի ու առանց որևիցե բան անելու հարձակվեց վրես ու դիմեց փախուստի»,-պատմեց Վարդանյանը։

Նա նաև ասաց, որ ինքը չի գնացել ընդառաջ, ինչը կարող էր իր հանդեպ հարձակման պատճառ դառնալ. «Ես քայլ դեպի պատգամավոր Սահակյանը չեմ արել, մնացել եմ այդ հատվածում, նա ինքն է եկել դեպի ինձ։ Ես որպես նիստը վարող կատարել եմ իմ իրավաչափ գործառույթները»։

Իր վնասվածքի մասին էլ Վարդանյանը հայտնեց հետևյալը. «Բժշկական միջամտություն տեղի է ունեցել, երկու կար են դրել։ Հարվածը բավական ծանր էր»։

Իսկ իր ո՞ր արտահայտությունն է այդքան վրդովվեցրել ընդդիմադիր պատգամավորին, որ նման քայլի է գնացել, Վլադիմիր Վարդանյանը մեկնաբանեց, թե իր վարած նիստերին որևէ վիրավորական բառ ինքը թույլ չի տվել որևէ քննարկման կամ նիստի ընթացքում։

«Նույնսիկ «դու»- ով խոսալ կամ բառ, որ կարող էր անձի մոտ նման հոգեբանական հուզմունք առաջացնել, չի եղել»,- վստահեցրեց միջադեպից տուժած պատգամավորը։

Ինչ վերաբերում է ընդդիմադիր պատգամավորների արձագանքին, Վլադիմիր Վարդանյանը նշեց, որ Արծվիկ Մինասյանը, Գեղամ Նազարյանը դեպքից հետո մոտեցել են իրեն, ափսոսանք հայտնել, որ նման բան կատարվեց. «Զարմանալիորեն հենց պարոն Նազարյանն ասաց՝ «շատ վատ բան ստացվեց, ինքը պետք է պատժվի», բայց հիմա տեսնում եմ մամուլում հրապարակումներ առ այն, որ ես եմ նախահարձակ եղել, պրովոկացիա արել։ Սրանք մանիպուլյացիաներ են»։

Վարդանյանը նշեց, որ հաշտեցման փորձեր եղել են՝ Արծվիկ Մինասյանը փորձել է հանդարտեցնել իրավիճակը։

Աղբյուր` Փաստինֆո