Փաստ ինֆո

Վերջին տարիներին Ադրբեջանի ղեկավարի գրեթե բոլոր ասածներն իրականություն են դարձել, իսկ Հայաստանի իշխանությունը ներկայացնող անձի բոլոր հայտարարությունները մի քանի օր անց փուչիկի նման պայթել են։ Կառավարության նիստում ՀՀ վարչապետի այսօրվա հայտարարությունը, թե ադրբեջանցիները ոչ մի հայկական բարձունք էլ չեն գրավել, հերթական դեպքերից է։ «Փաստինֆո»-ի հետ զրույցում նման կարծիք հայտնեց «Հայրենիք» կուսակցության խորհրդի անդամ Խաչիկ Գալստյանը։

«Ադրբեջանն ինչ ասում է կամ արդեն իրականություն է, կամ մոտ ապագայում իրականություն պետք է դառնա։ Այն, որ ինքը ժողովրդի թիկունքում պայմանավորվում է՝ փաստ է. մեկ ասում է, որ ոչ մի պայմանավորվածություն չկա, հետո հայտարարում է, որ բանավոր պայմանավորվածությամբ տարածքներ է հանձնել։ Հիմա էլ խոսում է, որ Ադրբեջանի հետ պայմանավորվել են, ո՞ւմ հաշվին եք պայմանավորվել, դրա մասին ո՞վ է իմացել, դու Ադրբեջանի հետ խոսել ես և դա քո հանրությունից, քո հասարակությունի՞ց թաքուն ես պահել»,- նշեց նա։

Գալստյանը կասկածներ ունի, որ Նիկոլ Փաշինյանն օպերատիվ կապի մեջ է Ադրբեջանի հետ և անձամբ Ալիևի հետ է քննարկում անելիքներն ու ավելի շատ իրականացնում է Բաքվի բռնապետի հանձնարարականները՝ խուսանավելով և՛ ԵՄ դիտորդական առաքելության եվրոպացի գործընկերներից, և՛ ռուս խաղաղապահներից։

«Նա ուղիղ երկխոսում է Ալիևի հետ և այն, ինչ անում է նա հիմա Հայաստանի գլխին՝ Ալիևի ուղիղ հանձնարարկանն է»,- ասաց «Հայրենիք» կուսակցության գլխավոր քարտուղարը։

Գալստյանի դիտարկմամբ՝ ՀՀ –ն օրվա իշխանությունների տաղանդի «շնորհիվ» բացարձակապես միայնակ է մնացել անվտանգության ապահովման հարցերում, հասցրել է հարաբերությունները փչացնել բոլոր դաշնակիցների հետ և տուրք տալով թուրք-ադրբեջանական տանդեմի նկրտումներին՝ ՀՀ դարպասները բացել է թուրքերի և ադրբեջանցիների առջև. կառավարության շենքում նստած անձն օրնիբուն խոսում է խաղաղության դարաշրջանից և անդադար կրկնում՝ այդ դարաշրջանն ինքն ամեն գնով բացելու է։

«Ամեն գինը ՀՀ տարածքներն օրեցօր կրճատելն է, հայ զինվորի արյամբ շաղախված սահմանները հանձնելն է, ուրիշ գին այստեղ չկա, հետևաբար՝ Նիկոլ Փաշինյանի հռետորաբանությունն է ուղիղ ճանապարհ բացել հենց Ադրբեջանի և Թուրքիայի լկտի ու ցինիկ պահվածքի համար։ Ուրիշ բացատրություն չկա և այստեղ պետք է Հարվրդն ավարտած չլինել հասկանալու համար, թե սրանք ուր են տանում»,- ընդգծեց Գալստյանը։

Նրա խոսքով՝ ինչպես բոլոր կենդանի օրգանիզմները, պետությունը ևս կառավարվում է գլխի, այս դեպքում իշխանության կողմից։ Մեր դեպքում իշխանությունը կամ անգլուխ է, կամ գիտակցաբար սպասարկում է թուրք-ադրբեջանական շահերը։ Նման իրավիճակում օրգանիզմը կարող է թփրտալ, անկանոն շարժումներ անել, ինչպես, օրինակ, տարբեր հասարակական-քաղաքական գործիչներ, ընդդիմադիր տարբեր ուժեր կարող են պիկետներ անել, բողոքի ցույցեր կազմակերպել, դժգոհություն հայտնել, ֆեյսբուքյան գրառումներ անել, բայց ամեն ինչ կախված է գլխից, այդ գլուխը շուտափույթ պետք է փոխել, հեռացնել։

Նախորդ բոլոր նմանատիպ փորձերը դատապարտված են եղել ձախողման. փորձը ցույց է տվել, որ տարաբնույթ փողոցային անհնազանդության և քաղաքական դեմարշներն ու հայտարարությունները բավարար չեն օրվա իշխանությանը հեռացնելու համար։

«Չգիտեմ՝ էլ ի՞նչ պետք է լինի, միգուցե արդեն թուրքական յաթաղանը յուրաքանչյուրիս տան դիմաց պետք է չոքի, որ նոր գիտակցենք, թե ինչ աղետի առջև ենք կանգնած։ Օրենքով թույլատրված գրեթե բոլոր գործիքները մենք օգտագործել ենք, եղել են և՛ հաջողություններ այդ պայքարում, եղել են և՛ հիասթափություններ, անհաջողություններ, այնուամենայինվ, կարծում եմ, որ ելքեր կան, ելքերը բազմաթիվ են, միգուցե այս պահին մեր երկիրը կարող են դուրս բերել միգուցե խելագար անհատները, որոնց այս պահին դեռ պետք է սպասել»,- եզրափակեց Գալստյանը։

Հիշեցնենք, որ ադրբեջանական ԶԼՄ-ներն այսօր տեղեկություն են տարածել, թե Ադրբեջանի ԶՈՒ-ն հայկական կողմի նոր բարձունքների է տիրացել։ Այսօրվա՝ մարտի 30-ի, կառավարության նիստում ՀՀ վարչապետ Նիկոլ Փաշինյանը հայտարարեց, որ 2022 թվականի օգոստոսին ձեռք բերված պայմանավորվածության համաձայն` Լաչինի միջանցքի երթուղին փոխվել է, գործարկվել է նոր ճանապարհ։ Ըստ այդմ՝ նախօրեին Հայաստանն ադրբեջանական կողմին հայտնել է, որ պայմանավորվածության համաձայն` Կոռնիձորի կամրջից հետո ճանապարհը շարունակվելու է միայն Հայաստանի տարածքով և սահմանապահ զորքերն այդ հատվածում ստանձնելու են ՀՀ սահմանի պետական պահպանությունը։

Աղբյուր` Փաստինֆո