Փաստ ինֆո

Մարտի 25-ին Ռուսաստանի հայերի միությունում տեղի է ունեցել խորհրդակցություն, որի ընթացքում քննարկվել է նաեւ Հայաստանի կողմից ՄՔԴ-ի Հռոմի կանոնադրության վավերացման հետ կապված հարցը, ֆեյսբուքյան իր էջում գրել է Ռուսաստանի հայերի միության նախագահ Արա Աբրահամյանը։

«Չնայած այն հանգամանքին, որ ՀՀ Ազգային ժողովն այս հարցը դեռ չի քննարկել (որոշումն ուժի մեջ կմտնի միայն խորհրդարանի կողմից վավերացումից հետո), այդ քայլը խիստ բացասաբար է ընդունվել հայ հասարակության մեջ՝ ինչպես Հայաստանում, այնպես էլ Ռուսաստանում և այլ երկրներում։

ՌՀՄ ակտիվի խորհրդակցության մասնակիցների դիրքորոշումը հանգում է հետևյալին․

Այս որոշումն առաջին հերթին ուղղված է հայոց պետականության շահերի և Հայաստանի ու Արցախի բնակչության անվտանգության դեմ, որն այսօր, անկախ ամեն ինչից, երաշխավորում և ապահովում է հենց Ռուսաստանը, որի հետ Հայաստանին կապում են ռազմավարական դաշնակցային հարաբերությունները ռազմաքաղաքական, տնտեսական և հումանիտար ոլորտներում ոչ միայն երկկողմ հիմունքներով (102-րդ ռազմաբազա, սահմանապահներ, խաղաղապահներ, էներգակիրներ, մի շարք կենսական նշանակության ապրանքներ և այլն), այլև ՀԱՊԿ և ԵԱՏՄ շրջանակներում:

Ռուսաստանի հայերի միությունը ակնկալում է, որ Հայաստանի Հանրապետության Ազգային ժողովը քվեարկության ժամանակ առաջնային կդնի առաջին հերթին Հայաստանի քաղաքացիների, ինչպես նաև Ռուսաստանի շուրջ երեք միլիոնանոց հայ համայնքի շահերը, որի կողմից տասնյակ տարիների ընթացքում շարունակաբար զգալի տնտեսական օգնություն է ցուցաբերվում Հայաստանի բնակչությանը:

Հաշվի առնելով հասարակական հնչեղությունը՝ մենք կարծում ենք, որ և Հայաստանի քաղաքացիներին, և սփյուռքահայերին հետաքրքիր կլիներ իմանալ Հայաստանի վարչապետի և նախագահի դիրքորոշումը, որոնք կարող էին հրապարակավ արտահայտվել այս հարցի վերաբերյալ, քանի որ այն կրում է քաղաքական բնույթ, այլ ոչ թե վկայում է հայաստանյան դատական համակարգի իբր ժողովրդավարության և անկախության դրսևորման մասին, ինչպես փորձում են ներկայացնել մի շարք հակահայկական գործիչներ:

Ինչ վերաբերում է իշխանությունների ներկայացուցիչների այն պնդմանը, թե նման որոշմամբ պայմաններ են ստեղծվում ալիևյան ռեժիմի պատերազմական հանցագործությունների վերաբերյալ ՄՔԴ (Հաագայի դատարան) հնարավոր դիմելու համար, ապա հարկ է հիշեցնել, որ Ադրբեջանը, ինչպես, ի դեպ, տարածաշրջանի գրեթե բոլոր մյուս երկրները՝ Իրանը, Վրաստանը, Իսրայելը, Թուրքիան և այլն, ՄՔԴ – ի Հռոմեական կանոնադրության մասնակից չէ և իրեն բնորոշ ոճով բացարձակապես անտեսում է նման որոշումները, ինչպես, օրինակ, մեկ ամիս առաջ ՄԱԿ-ի Միջազգային դատարանի կայացրած որոշումը, որը պարտավորեցրեց Բաքվին բացել Լաչինի միջանցքը։

ՌՀՄ-ն Հայաստանի իշխանություններին կոչ է անում համակողմանի հավասարակշռված մոտեցում և ինքնուրույնություն ցուցաբերել և վերանայել Միջազգային քրեական դատարանի Հռոմի կանոնադրության վավերացման հարցը»,- ասված է հայտարարության մեջ:

Աղբյուր` Փաստինֆո