Փաստ ինֆո

ՀՀ նախկին գլխավոր դատախազ Արթուր Դավթյանին սանձող մահակը Նիկոլ Փաշինյանի ձեռքերում է 2019թ-ից ի վեր։

Պարզվում է դեռեւս նրա պաշտոնավարման ժամանակ Հատուկ քննչական ծառայությունում նյութեր են նախապատրաստվել Արթուր Դավթյանի դեմ՝ հայտարարագրերում ենթադրյալ կեղծ տվյալներ ներկայացնելու մասին ու մերժել քրեական գործի հարուցումը, որը կարող է վերսկսվել ցանկացած պահի։

Մամուլում բազմիցս տեղեկություններ են շրջանառվել Արթուր Դավթյանի՝ հնարավոր ապօրինի հարստացման մասին, իսկ բոլորովին վերջերս՝ արդեն Դավթյանի պաշտոնավարման ավարտից հետո հայտնի դարձավ, որ Դավթյանի հայրն աշխատանքի է անցել խիստ կասկածելի, եթե չասենք համակարգային կոռուպցիոն գործարքի արդյունքում բաժնետոմսերի մի մասը կառավարությանը նվիրաբերված ԶՄՊԿ- ում՝ բավականին բարձր վարձատրվող պաշտոնում։

Հաշվի առնելով կոռուպցիոն ռիսկերը և հայտարարված՝ կոռուպցիայի դեմ մղվող պայքարը՝ «Փաստինֆո»-ն գրավոր հարցում էր ուղարկել ՀՀ գլխավոր դատախազություն՝ պարզելու, թե արդյո՞ք դատախազությունն ուսումնասիրել է արդեն նախկին գլխավոր դատախազ Արթուր Դավթյանի գույքի և եկամուտների օրինականությունը, արդյո՞ք քննարկման առարկա է դարձվել նաև Արթուր Դավթյանի հոր նշանակումը՝ ԶՄՊԿ-ում, սակայն պարզվեց, որ Արթուր Դավթյանի ապօրինի հարստացման հարցը քննության առարկա է դարձվել իր պաշտոնավարման օրոք։

«ՀՀ նախկին գլխավոր դատախազ Արթուր Դավթյանի և նրան փոխկապակցված անձանց կողմից հայտարարագրերում ենթադրաբար կեղծ տվյալներ ներկայացնելու, հայտարարագրման ենթակա տվյալները թաքցնելու, ինչպես նաև՝ առերևույթ ապօրինի հարստացման փաստի առթիվ ՀՀ հատուկ քննչական ծառայությունում նախապատրաստվել են նյութեր և 2019թ. դեկտեմբերի 30-ին որոշում է կայացվել հանցագործության դեպքի բացակայության հիմքով քրեական գործ հարուցելը մերժելու մասին»,- նշել են գլխավոր դատախազությունից։
Հատկանշական է, որ քրեական գործի հարուցումը մերժելու մասին որոշումը կայացվել է հենց Արթուր Դավթյանի պաշտոնավարման տարիներին, ասել է թե՝ թե՛ քննչական մարմինը, թե՛ հսկողություն իրականացնող դատախազությունը կաշկանդվածություն են ունեցել գործի օբյեկտիվ, բազմակողմանի քննություն իրականացնելու հարցում։ Առնվազն զարմանալի կլիներ, եթե հանկարծ Արթուր Դավթյանի անմիջական ենթակայության ներքո գործող դատախազը չհաստատեր քրեական գործի հարուցումը մերժելու մասին որոշումը, կամ՝ հանձնարարություն տար քննիչին՝ իր վերադասի վերաբերյալ կատարել բազմակողմանի եւ օբյեկտիվ քննություն, նշանակել փորձաքննություններ, պարզել, թե օգտագործված շինանյութն իրականում ինչ գնի է եղել եւ որրտեղից, ում միջոցով է գլխավոր դատախազը այն ձեռք բերել։

Այլ խոսքով՝ ցանկացած պահի Նիկոլ Փաշինյանը կամ նրան հաջորդած իշխանությունների կամքով հետագայում կարող է վարույթը վերսկսվել, քննություն իրականացվել ։ Ըստ այդմ, չի բացառվում, որ կոռուպցիոն հնարավոր չարաշահումներն էլ եղել են Դավթյանի հետագա պաշտոնավարման, ինչպես նաև՝ այս իշխանությունների նկատմամբ լոյալ վերաբերմունքի, նրանց առ այսօր «հլու-հնազանդ» ծառայելու պատճառներից մեկը։ Թերևս, ի թիվս այլնի, նաև այդ հանգամանքով պայմանավորված էր, որ Դավթյանի պաշտոնավարման տարիներին քաղաքական հետապնդումներին նոր թափ հաղորդվեց, փոխարենը՝ ծածկադմփոց էր արվում բոլոր այն գործերը, որոնց թելերը տանում էին դեպի այս իշխանությունները։ Իրավիճակ չփոխվեց անգամ Արցախյան երրորդ՝ 44-օրյա պատերազմից և Նիկոլ Փաշինյանի կողմից ստորագրված կապիտուլյացիոն ակտից հետո, երբ Նիկոլ Փաշինյանի կողմից առերևույթ պետական դավաճանության, սահմանադրական կարգի տապալման, պաշտոնեական լիազորությունների չարաշահման վերաբերյալ ներկայացված բոլոր հաղորդումները կցվեցին մեկ գործի և «ջրվեցին»։

Հեղինակ՝ Իզաբել Սահակյան

Աղբյուր` Փաստինֆո