Փաստ ինֆո

Կորոնավիրուսի դեմ պայքարում առողջապահության ոլորտում հայտնաբերված կոռուպցիոն չարաշահումների գործի շուրջ աղմուկը կրկին մարում է։

Շուրջ մեկ տարի առաջ հարուցված գործի քննությանը թափ հաղորդվել էր միայն վերջերս, կատարվեցին աղմկոտ ձերբակալություններ, ցուցադրաբար խուզարկություն կատարվեց Երեւանի քաղաքապետի տեղակալ, առողջապահության նախարարի նախկին տեղակալ Գեւորգ Սիմոնյանի աշխատասենյակում, ապա՝ ձերբակալեցին թե նրան, թե գործող առողջապահության նախարար Անահիտ Ավանեսյանի ընկերուհուն՝ Թոքաբանության ազգային կենտրոն» ՓԲ ընկերության դեղակայուն բաժանմունքի վարիչ Լուսինե Եղիազարյանին ու էլի տարբեր մարդկանց։ Հայտարարեցին, թե մեկ տասնյակից ավել մարդ է ներգրավվել գործով։ Սակայն փաստացի այսօր միայն երեքն են կալանքի տակ՝ Գևորգ Սիմոնյանը, «Մեդլայն» ԲԿ տնօրեն Բաբկեն Շահումյանը, նույն ԲԿ փոխտնօրեն Լիլյա Հակոբյանը, Լուսինե Եղիազարյանի նկատմամբ որպես այլընտրանքային խափանման միջոց է ընտրել տնային կալանքը։

Մեզ հայտնի է դարձել, որ օրերս հարցաքննվել էր նաև «Սուրբ Գրիգոր Լուսավորիչ» ԲԿ գլխավոր բժիշկը, որը քրեական վարույթով մեղադրյալի կարգավիճակ դեռևս չունի։

Առողջապահության նախկին նախարար Արսեն Թորոսյան շտապեց կասկածի տակ դնել քննության որակը, օբյեկտիվությունն ու պրոֆեսիոնալիզմը՝ խոստանալով պարբերաբար հանրության ներկայացնել մանրամասներ՝ կոռուպցիայի դեմ պայքարի շրջանակներում ձեռնարկված քայլերի մասին։ Հրապարակային այս նախազգուշացումը գնահատվել էր որպես կոմպրոմատների հրապարակայնացման վտանգ, ավելին՝ այդ մասին ակնարկներ էր եղել նաեւ մասնավոր զրույցներում ու արդյունքում եղավ այն, որ երկու օր հասարակությանը զբաղեցնելուց հետո իշխանությունները մոռացան այդ գործի մասին։

Արսեն Թորոսյանի «շանտաժը» փաստացի տեղ է հասել, իշխանությունները հասկացել են՝ Թորոսյանի «դարակներում պահված» տվյալները կարող են հանրայնացվել, իշխանական միֆերը «կջրվեն», եթե իրավապահները որոշեն քրեական հետապնդում իրականացնել նրա նկատմամբ։

Արդյունքում՝ իրավապահներն այս փուլում բռնել են գործը ծածկադմփոց անելու ճամփան, ու միաժամանակ փորձում հսկողության տակ պահել Թորոսյանին՝ նրա դեմ առավել հիմնավոր մեղադրանքներ գտնելու ու կոմպրոմատներով ձգված պահելու համար։

Աղբյուր` Փաստինֆո