Փաստ ինֆո

Այսօր լրանում է Ադրբեջանի կողմից Արցախի շրջափակման 100-րդ օրը։ 120 հազար մարդ՝ այդ թվում ավելի քան 30 հազար երեխա, արդեն 100 օր է՝ զրկված են մարդու տարրական իրավունքներից։ Համամարդկային արժեքների մասին ելույթներ ունեցող, բայց արցախահայության նույն այդ իրավունքների՝ արդեն 100 օր շարունակվող կոպտագույն խախտումներն անտեսող միջազգային կառույցների ուշադրությունը հրավիրելու համար Ստեփանակերտի Վերածննդի հրապարակում այսօր հանրահավաք է նախատեսվում։

«Աշխարհի ուշադրությունը պետք է կրկին հրավիրենք շրջափակման մեջ գտնվող 120 հազար արցախցիների՝ այդ թվում 30 հազար երեխաների վրա։ Ադրբեջանցի ահաբեկիչների պատճառով, որոնք 100 օր է՝ փակ են պահում Արցախի կյանքի ճանապարհը, արցախահայությունը զրկված է մարդկային տարրական իրավունքներից։ Արցախի երիտասարդական կառույցները, ՀԿ-ները, ուսանողությունը, քաղաքական ուժերը կոնսոլիդացվել են, որպեսզի ևս մեկ անգամ փաստենք, որ շարունակելու ենք պայքարել՝ սեփական հողում ապրելու համար, ինչպես նաև ևս մեկ անգամ հիշեցնենք այն կարմիր գծերը, որը որևէ պարագայում որևէ մեկը չպետք է հատի։ Հանրահավաքը կմեկնարկի ժամը 18-ին, բայց մինչ այդ կլինեն տարբեր քննարկումներ, հանդիպումներ»,-«Փաստինֆո»-ի հետ զրույցում ասաց Արցախի «Արդարություն» կուսակցության երիտթևի ղեկավար, «Վերնատուն» վերլուծական կենտրոնի հիմնադիր ղեկավար Արշակ Աբրահամյանը։

Վառելիքի սղության պատճառով շրջաններում ապրող բազմաթիվ արցախցիներ չեն կարողանալու ներկա գտնվել հանրահավաքին, բայց, մեր զրուցակցի խոսքով,նրանք էլ տեղերում հավաքվելով՝ ցույց կտան, որ արցախայությունը՝ անկախ սոցիալական բազմապիսի խնդիրներից, ներքաղաքական խնդիրներից, միակամ է կարևորագույն՝ Արցախի ինքնորոշման հարցում։

«Հանրահավաքին պարտադիր ներկա են գտնվելու նաև հոգևորականները։ Մեզ կաջակցեն նաև աշխարհի տարբեր կետերում ապրող մեր հայրենակիցները։ Առավոտյան իմացա, որ Ջավախքում ևս, ի աջակցություն մեզ, հանրահավաք է նախատեսված։ Այսօրվա հանրահավաքը կարևոր է նաև այն առումով, որ ընդգծենք ադրբեջանցի ահաբեկիչների հետ մեր համատեղ կեցության անհնարինության փաստը։ Նկատենք, որ վերջին օրերին տեելգրամյան ալիքներում պտտվում է Լաչինի միջանցքը փակած կեղծ էկոակտիվիստ-ահաբեկիչներից մեկի տեսանյութը, որտեղ ասվում է, թե Նովրուզի օրը ահյ պիտի մոռթեն։ Աշխարհը պետք է հասկանա, որ նման արնախում ահաբեկիչների հետ արցախահայության համատեղ կեցությունն անհնար է»,-նշեց Աբրահամյանը։

Հանրահավաքին, մեր զրուցակցի խոսքով, Արցախի շրջափակման պայմաններում միջազգային հանրության ցուցաբերած անգործությունը դատապարտող կոչեր կհնչեն տարբեր լեզուներով։

Աղբյուր` Փաստինֆո