Փաստ ինֆո

Երևանի ընդհանուր իրավասության դատարանում՝ դատավոր Ջոն Հայրապետյանի նախագահությամբ, այսօր շարունակվել է մարտադաշտն ինքնակամ լքելու մեջ մեղադրվող Իշխան Վահանյանի գործով դատական նիստը։

«Փաստինֆո»-ի թղթակցի հաղորդմամբ՝ այսօրվա նիստին հարցաքննվել է տուժող Ռուսլան Թումանյանը, որը Արցախյան երրորդ՝ 44-օրյա պատերազմին նորակոչիկ է եղել, մասնակցել է պատերազմին՝ Վահանյանի ենթակայության գումարտակի կազմում և ստացել վիրավորում։ Նա դատարանում հայտնեց, որ Խուռհատ սարից նահանջելիս վիրավորներին օգնել է իջեցնել, ապա՝ վերադարձել, այդ ժամանակ գումարտակի հրամանատարը չի բարձրացել իր հետ, թե ինչու՝ հստակ պարզաբանում տուժող չուներ։ «Մարդկային դաժան իրավիճակ էր, վայրկյանը մեկ՝ վիրավորներ ու զոհեր ենք ունեցել, հնարավոր է՝ ցանկության բացակայությամբ պայմանավորված լիներ»,- նշեց տուժողը։ Սարը բարձրանալիս տուժողը տեսել է, թե ինչպես է զորքն իջնում, ինքն էլ է միացել, պատմում է, որ չգիտեին, թե ուր են գնում, միայն հետևում էին հրամանատարներին՝ Վ. Վարդանյանին, Հ. Մուրադյանին, հետագայում իմացել է, որ Վանք գյուղի ուղղությամբ են գնում։

«Երկար շարասյուն է եղել, ցրված է եղել, ուղղակի հետևում ես՝ շարքը ոնց է գնում»,- պատմեց տուժողը՝ հայտնելով, որ Իշխան Վահանյանին այդ ընթացքում չի տեսել, իրեն ասել են, որ վիրավոր է, թողել ու հեռացել է, ինքն ականատես չի եղել՝ ոչ վիրավորվելուն, ոչ՝ հեռանալուն։ Այն, որ Վահանյանի վիրավորման մասին իմացել է ուրիշներից՝ տուժողը դատարանում մի քանի անգամ հայտնեց, սակայն, պարզվում է, որ դա հակասում է նրա՝ նախաքննական ցուցմունքին։ Դատախազ Գևորգ Ավետիսյանը տուժողի ցուցմունքներում հակասություններ արձանագրեց և միջնորդեց հրապարակել նախաքննական ցուցմունքը, համաձայն որի՝ ինքը տեսել է, թե ինչպես է Վահանյանը, արագ քայլելով, առանց որևէ վիրավորանք ունեցողի տպավորություն թողնելու գնացել ու նստել ավտոմեքենան, հեռացել, ինչը տեսել են նաև այլ զինծառայողներ և դա իրենց մոտ զարմանք ու հիասթափություն է առաջացել, բայց չի հիշել, թե ինչ տեսակի մեքենա է նստել։ Ավելին, նախաքննության ընթացքում արդեն տուժողի կարգավիճակով հարցաքննության ժամանակ է նաև հստակ արձանագրել, որ իր աչքով է տեսել դա։ Նրա նկատմամբ նախաքննական մարմնում Հակասությունների առնչությամբ Թումանյանը պնդեց իր դատարանում տված ցուցմունքը, նշեց՝ հստակ չի հիշում։

Հակասություններ կային ցուցմունքի նաև այլ դրվագում, մասնավորապես, դատարանում տուժողը նշեց, որ տեղյակ են եղել, որ գնում են Հադրութի ուղղությամբ՝ նախապես տեղյակ լինելով, որ այնտեղ հակառակորդ կա, դատարանում խոսք գնաց նաև տանկերի մասին, մինչդեռ, նախաքննության ընթացքում նա նշել էր, որ չգիտեն, թե որ ուղղությամբ են գնում և որ Հադրութն արդեն հակառակորդի տիրապետության տակ է, տանկերի մասին ևս որևէ խոսակցություն չկար։

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Նշենք, որ այս գործով անցնող միակ մեղադրյալը Իշխան Վահանյանն է։ Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո