Փաստ ինֆո

Վրաստանում բողոքի զանգվածային ակցիաների ու բախումների ֆոնին իշխող «Վրացական երազանք» և «Ժողովրդի ուժ» կուսակցությունները հետ են կանչել «օտարերկրյա գործակալների» մասին օրինագիծը։

«Ցանկանում ենք տեղեկացնել հանրությանը, որ «Օտարերկրյա ազդեցության թափանցիկության մասին» օրենքի շուրջ ընթացող քաղաքական գործընթացների վերաբերյալ խորհրդակցություններ են տեղի ունեցել «Վրացական երազանք»-ի քաղխորհրդի, «Ժողովրդի ուժ»-ի պատգամավորների միջև։

Մենք տեսնում ենք, որ ընդունված օրինագիծը հակասություններ է առաջացրել հասարակության մեջ։ Ստի մեքենան կարողացավ օրինագիծը ներկայացնել բացասական լույսի ներքո և մոլորեցնել հասարակության որոշակի հատվածին։ Օրինագիծը կեղծ պիտակավորվել է որպես «ռուսական օրենք», և դրա առաջին ընթերցմամբ ընդունումը հանրության մի մասի աչքում ներկայացվել է որպես եվրոպական կուրսից շեղում։

Բացի այդ, արմատական ուժերին հաջողվել է երիտասարդության մի մասին ներքաշել անօրինական գործողությունների մեջ։ Շնորհակալություն հերոս իրավապահներին, ովքեր համբերատար և ամենաբարձր չափանիշներով արձագանքեցին բռնությանը։

Ամենից շատ մենք պետք է հոգ տանենք մեր երկրում խաղաղության, հանգստության և տնտեսական զարգացման, ինչպես նաև Վրաստանը եվրաինտեգրման ճանապարհով առաջ տանելու մասին։ Ուստի՝ մեր յուրաքանչյուր համաքաղաքացու էներգիան անհրաժեշտ է ծախսել ոչ թե առճակատման, այլ երկիրը ճիշտ ուղղությամբ զարգացնելու վրա։

Հաշվի առնելով վերը նշվածը, մենք՝ որպես իշխող ուժ, պատասխանատու, հասարակության յուրաքանչյուր անդամի առջև, որոշել ենք առանց վերապահումների հետ կանչել մեր կողմից ներկայացված օրինագիծը»,- ասված է հայտարարության մեջ։

Նշենք, որ երեկ երեկոյան Թբիլիսիի կենտրոնում՝ Ռուսթավելիի կենտրոնական պողոտայում բողոքի զանգվածային ակցիա է տեղի ունեցել. վրացիները բողոքում են «օտարերկրյա գործակալների» մասին օրենքի ընդունման դեմ։

Գիշերային բողոքի զանգվածային ցույցերը մայրաքաղաքի կենտրոնում վերածվել են անկարգությունների ու բախումների ցուցարարների ու հատուկ ջոկատայինների միջև։ Ցուցարաների դեմ կիրառվել են հատուկ միջոցներ՝ ջրցան մեքենաներ ու արցունքաբեր գազ, բերման է ենթարկվել մի քանի տասնյակ ցուցարար։

Աղբյուր` Փաստինֆո