Փաստ ինֆո

Արցախում գարնանացանի աշխատանքների ակտիվ փուլի մեկնարկը տրված է։ Օկուպացված տարածքներում ապօրինաբար տեղակայված ադրբեջանական դիրքերից, սակայն, ամեն կերպ խոչընդոտում են աշխատանքներին՝ պարբերաբար կրակ բացելով հողը մշակող գյուղացիների ու գյուղտեխնիկայի ուղղությամբ։

Մասնավորապես, վերջին օրերին ադրբեջանցիները շատ են ակտիվացել. հրաձգային զինատեսակներից մի քանի անգամ կրակ են բացել Արցախի Մարտունու շրջանի Մյուրիշեն և Բերդաշեն համայնքների հողատարածքներում աշխատող գյուղտեխնիկայի ուղղությամբ՝ այդ կերպ փորձելով ահաբեկել գյուղացիներին ու թույլ չտալով մշակել սեփական հողը։

«Հողօգտագործողները տրակտորով իրականացվում էին այգու միջշարային տարածքների մշակություն, էտի ու ձևավորման աշխատանքներ, երբ սկսել են կրակել։ Ադրբեջանական սադրանքների պատճառով գյուղացիները ստիպված են եղել դադարեցնել աշխատանքն ու դուրս գալ տարածքից։ Ադրբեջանը նպատակ է հետապնդում այդպիսով թույլ չտալ արցախցուն՝ սեփական հողում գյուղատնտեսությամբ զբաղվել, ինչը կարող է հանգեցնել պարենային լուրջ ճգնաժամի՝ եթե սկզբնական շրջանում ոչ ամբողջ Արցախի մասշտաբով, ապա կոնկրետ տնտեսությունների մասով՝ հաստատ»,- «Փաստինֆո»-ի հետ զրույցում ասաց Արցախի գյուղատնտեսության նախարարի տեղակալ Վիլեն Ավետիսյանը։

Մարտունու շրջվարչակազմի ղեկավարի տեղակալ Մասիս Զարգարյանն էլ մեզ հետ զրույցում նշեց, որ շրջանի սահմանամերձ բոլոր հողատարածքներում ներկա պահին դադարեցված են գյուղտեխնիկայով աշխատանքները։

«Գյուղտեխնիկա առայժմ չի մտնում դաշտ, միայն բանվորներ են կարողանում աշխատել, ընդամենը էտի աշխատանքներ են անում՝ բացառապես խաղաղապահների ներկայությամբ։ Հիմա գարնանացան մշակաբույսերի ցանքսի նախապատրաստական աշխատանքները պետք է կատարենք, նոր այգիներ հիմնենք, բայց քանի դեռ ադրբեջանցիները կրակում են, և այս պայմաններում խաղաղապահները դեռևս չեն երաշխավորում մարդկանց անվտանգությունը, անորոշ ժամանակով դադարեցված են աշխատանքները»,- «Փաստինֆո»-ին ասաց Զարգարյանը։

Ադրբեջանցիների կողմից հրադադարի պահպանման ռեժիմի խախտումների մասին, ինչպես նշեցին մեր զրուցակիցները, տեղեկացվել է Արցախում տեղակայված ՌԴ խաղաղապահ զորակազմի հրամանատարությունը, և գյուղատնտեսական աշխատանքների անվտանգ կազմակերպումն ապահովելու ուղղությամբ աշխատանքներ են տարվում:

Զարգարյանը հավելում է՝ մարդիկ տրամադրված են, որ անմշակ հող չպիտի մնա Արցախում, ու խաղաղապահների կողմից անվտանգության երաշխիքներ ստանալուն պես՝ գյուղացիները լծվելու են գործի։

Փոխնախարարն էլ շեշտում է՝ ադրբեջանցիները սխալ հաշվարկներ են արել՝ մոռանալով արցախցու համառության ու հողին կառչած լինելու մասին։ «Թշնամու փամփուշտից հրաշքով փրկված արցախցին սադրանքների հաջորդ օրը վերադառնում է դաշտ կամ այգի և շարունակում մշակությունը»,-ասաց Արցախի գյուղատնտեսության փոխնախարարը։

Աղբյուր` Փաստինֆո