Փաստ ինֆո

Արցախի և Ադրբեջանի ներկայացուցիչների հանդիպումը Իվանյանում է կայացել միայն այն պատճառով, որ այդ վայրում են աշխարհագրորեն տեղակայված ռուս խաղաղապահ զորամիավորման հրամանատարությունը, և, նաև հրապարակված լուսանկարները վկայում են, որ դա եղել է իրենց գրասենյակում։ «Փաստինֆոյի» եթերում ասել է ՀՀ արտակարգ դեսպանորդ և լիազոր նախարար Էդգար Ղազարյանը՝ նկատելով, որ հանդիպման և՛ նախաձեռնությունը, և՛ բովանդակությունը ԵՄ առաքելության հետ որևէ ընդհանրություն չունի ։

Բանախոսի խոսքերով, շատ անհասկանալի է հանդիպող կողմերի կարգավիճակը։ Թե ի՞նչ պաշտոնական կարգավիճակ ունեն, ովքե՞ր են այն մարդիկ, որոնք մասնակցել են, ի՞նչ լիազորություններով են մասնակցել, և ի՞նչ հարցեր են քննարկել։ ՀՀ արտգործնախարարն ասում էր, որ Բաքվի և Ստեփանակերտի միջև պետք է ուղիղ շփումներ լինեն։ Հնչեցնել մայրաքաղաքների անունները շփումներում՝ նշանակում է, որ դրանք պետք է ունենան նույն իրավական կարգավիճակը, այսինքն Ադրբեջանի իշխանությունները պետք է շփվեն Արցախի իշխանությունների հետ։

«Իլհամ Ալիևը Արցախի նախագահի հետ ուղիղ շփումներ պատրաստ չի իրականացնել։ Որոշ տեղեկություններ կային մամուլում, որ այդ հանդիպման մասնակիցներից մեկն էլ եղել է Արայիկ Հարությունյանը։ Այսինքն, սա շատ վատ նշան է, որ Ա․ Հարությունյանը համաձայնվում է հանդիպել և քննարկումներ ծավալել ոչ թե Ադրբեջանի նախագահի, այլ նրա կողմից նշանակված մարդու հետ»,- հավելեց բանախոսը։

Անդրադառնալով հայ-ադրբեջանական բանակցություններին, Է․ Ղազարյանը նշեց, որ Հայաստանի արտաքին գործերի նախարարը, որը չի հաստատել իր մասնակցությունը Մոսկվայում եռակողմ հանդիպմանը, շատ վաղուց է հաստատել իր մասնակցությունը Անթալիայի դիվանագիտական ֆորումին, և այդ ընթացքում չնախատեսված, արտակարգ աշխատանքային այցելություն է կատարել Թուրքիայի մայրաքաղաք, բանակցություններ է վարել Թուրքիայի արտաքին գործերի նախարարի հետ այն ժամանակ, երբ որ հայկական կողմը ադրբեջանական կողմին էր փոխանցել հայ-ադրբեջանական պայմանագրի վերաբերյալ իրենց պատկերացումները։ «Եվ, եթե նկատել եք, տեքստը գրվում է Ադրբեջանում․ հայկական կողմը լավագույն դեպքում կարծիք է հայտնում դրա վերաբերյալ, որը նրանք չեն ընդունում»,- հավելեց բանախոսը։

Բանախոսը այն կարծիքին է, որ Հայաստանի իշխանությունները, որպեսզի կարողանան իրենց վերջնական պարտությունը, կապիտուլյացիան ձևակերպեն՝ անվանել են խաղաղության պայմանագիր։ «Իր բովանդակությունը ամբողջությամբ ենթադրում է նոր պատերազմ և փաստաթղթավորված կապիտուլյացիա։ Բացի այդ, գոյություն ունի իրավական կողմ․ Հայաստանը և Ադրբեջանը երբեք իրար պատերազմ չեն հայտարարել։ Խաղաղության պայմանագիր պետք է կնքվի այն ժամանակ, երբ պատերազմ է հայտարարվել։ Սա կանխելու միակ տարբերակը Ն․ Փաշինյանին իշխանությունից հեռացնելն է»,- եզրափակել է բանախոսը։

Մանրամասները՝ տեսանյութում։

Աղբյուր` Փաստինֆո