Փաստ ինֆո

Թուրքիայի ներքին գործերի նախարարը սկանդալային հայտարարությամբ է հանդես եկել՝ նշելով, որ ավերիչ երկրաշարժը եղել է կազմակերպված ու մեղադրանքի սլաքներն ուղղել դեպի ԱՄՆ։ «Փաստինֆո»-ի եթերում այդ մասին ասել է միջայգայնագետ Գրիգոր Բալասանյանը։

Մասնավորապես, նա արձանագրել է, որ հետաքրքիր զարգացումներ են տեղի ունենում Միացյալ նահանգներ-Թուրքիա հարաբերություններում՝ կապված Թուրքիայում տեղի ունեցած երկրաշարժի հետ։

«Չնայած ՆԱՏՕ-ն և ՆԱՏՕ-ի գլխավոր քարտուղարը հայտարարում են, որ Թուրքիայում տեղի ունեցած երկրաշարժն ամենաահասարսուռն էր ՆԱՏՕ-ի պատասխանատվության գոտում և ամենաշատ մարդկային կյանքեր խլած բնական աղետն էր, սակայն Թուրքիա-ԱՄՆ հարաբերությունները, կարծես թե, այդքան էլ անամպ չեն»,- նշել է Բալասանյանն՝ ավելացնելով, որ օրեր առաջ Թուրքիայի ՆԳ նախարարը բավականին սկանդալային ելույթ է ունեցել, նշելով, որ երկրաշարժը կազմակերպված էր, որովհետև երկրաշարժից մեկ շաբաթ առաջ Թուրքիան հրաժարվեց ՆԱՏՕ-ի հերթական ընդլայնմանը, այն է՝ Շվեդիայի և Ֆինլանդիայի հայտին։

«Թուրքիան չի տալիս իր համաձայնությունը, առաջ քաշելով որոշակի նախապայմաններ, առաջին հերթին՝ Շվեդիայից պահանջելով Շվեդիայում գտնվող քրդական որոշ առաջնորդների արտահանձնումը»,- նշել է միջազգայնագետը։

Ըստ նրա՝ Թուրքիայի նախարարը նշել է, թե իրենք մերժել են ՆԱՏՕ-ին անդամակցելու Շվեդիայի և Ֆինլանդիայի հայտը, ինչի հետևանքով ստացան երկրաշարժ։

«Բառացիորեն նշել է, որ իրենք գիտեն, թե ով է արել դա և ինչ միջոցներով, ըստ էության, մեղադրանք առաջադրելով ԱՄՆ-ին և հաստատելով, որ դա բնական աղետ չէր, այլ կազմակերպված է եղել որոշակի պայթյունների միջոցով»,- ասել է Բալասանյանը։

Մանրամասները՝ տեսանյութում։

Աղբյուր` Փաստինֆո