Փաստ ինֆո

Գեղարքունիքի մարզի Ազատ գյուղի տարածքում տեղակայված զորամասի ինժեներասակրավորային վաշտի կացարանում բռնկված հրդեհի հետեւանքով 15 զինծառայողի մահվան գործով կալանավորված զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գոռ Աղեկյանն առաջադրված մեղադրանքը չի ընդունում։ Այս մասին «Փաստինֆո»-ի հետ զրույցում ասաց Գոռ Աղեկյանի պաշտպան Ժորա Համբարձումյանը։

Գոռ Աղեկյանին մեղսագրվում է զինվորական պաշտոնեական անփութությունը, որն անզգուշորեն առաջացրել է մարդու մահ։ Մասնավորապես, ըստ մեղադրանքի, Աղեկյանը հանդիսանալով պետ և պաշտոնատար անձ, պատասխանատու լինելով զորամասում հակահրդեհային պաշտպանության կազմակերպման ու վիճակի համար, պարտավոր լինելով ապահովելու հրդեհային անվտանգության կանոնները, իր ծառայողական պարտականությունների կատարման նկատմամբ անբարեխիղճ և անփույթ վերաբերմունքի հետևանքով հիշյալ պարտականությունները չի կատարել, այդ թվում նաև` հակահրդեհային պաշտպանության համապատասխան միջոցներով ՀՀ ՊՆ N զորամասի ինժեներասակրավորային վաշտն ապահովելու ուղղությամբ. արդյունքում, անզգուշությամբ առաջացրել է մարդկանց մահ: Պաշտպան Ժորա Համբարձումյանը, սակայն, նշում է՝ գործով ձեռք բերված տվյալներով այլ հանգամանքներ են հաստատվում, սակայն նախաքննության գաղտնիությունից ելնելով չի կարող հրապարակել ձեռք բերված տվյալները։ Բացի այդ, պաշտպանը կարևորեց պատճառահետևանքային կապի բացակայությունը՝ պարտականությունների ենթադրյալ չկատարման և դեպքի հետ։

«Եթե նույնիսկ պայմանականորեն ընդունենք, որ ինչ-որ մի առարկա ենթադրենք չի եղել՝ հրդեհը կասեցնելու ուղղությամբ միջոցներ ձեռնարկելու համար, ապա, միևնույն է, օբյեկտիվորեն նույն շինությունն այնպիսի վիճակում էր գտնվում և հենց կոնկրետ անձի անփույթ գործողությունների հետևանքով, որի համար իր պաշտպանյալը պատասխանատվություն չի կրում։ Այսինքն՝ ոչ համապատասխան վառելիքով, որն արգելված է եղել կանոնագրքով, փորձել են վառարան վառել, հրդեհ է բռնկվել։ Հանրությանն էլ պարզ է, որ հատակը փայտյա է եղել, շինությունը մեկ ելք է ունեցել, եթե այդտեղ կրակմարիչ էլ լիներ, հնարավոր չէր լինի կասեցնել, ուստի, հենց նախաքննության մարմնի կողմից հստակ պետք է պատասխանատու անձը որոշվեր, ինչից հետո միայն մեղսագրվեր այլ ենթադրյալ արարք»,- նշեց փաստաբանը։

Դիտարկմանը, որ սա առաջին դեպքը չէր, ամիսներ առաջ Սյունիքի մարտական դիրքերից մեկում զինվորների հանգստի համար նախատեսված վագոն-տնակում էր հրդեհ բռնկվել, ինչի հետևանքով զինծառայող է մահացել, սակայն իրավապահներն անգամ միջնորդագիր չեն ներկայացրել՝ ուսումնասիրություններ կատարելու, նման դեպքերը կանխարգելելու համար, փաստաբանն արձագանքեց՝ նշելով, որ համապատասխան շինություններում պետք է պայմաններն ի սկզբանե ստեղծված լինեն՝ հնարավոր դժբախտ պատահարներ կանխելու համար. «Բնականաբար քրեական վարույթ է նախաձեռնվում և վարույթով կոնկրետ անձանց մեղադրանք է առաջադրվում, պարզվում է, թե ինչպես է տեղի ունեցել։ Կարող եմ ասել, որ պետք է համակցության մեջ գնահատվի, հստակ պատասխանատու անձը պարզվի։ Այն չափանիշները, որն ի սկզբանե պետք է ապահովված լինեն, դա չի քննարկվում։ Ի սկզբանե պետք է լինի վառարան, ապահովված լինի համապատասխան վառելանյութով, երկու մուտք ու ելք ունենար շինությունը, հատակը չպետք է լինի փայտից և այլն։ Այդ ամենը պետք է ապահովված լինի, միայն դրանից հետո փնտրեն պատասխանատու անձանց»։

Գոռ Աղեկյանը վարույթի շրջանակներում ցուցմունք տվել է, որոնց բովանդակության վերաբերյալ փաստաբանը փակագծեր չբացեց, միայն արձանագրեց, որ առկա տվյալներով հմնավոր կասկածը՝ անձի առնչությունն իրեն վերագրվող արարքին՝ հիմնավոր չէ, միանշանակ չէ։ Կալանավորման միջնորդության մեջ թվարկվել են մի շարք նյութեր, տվյալներ, սակայն այդպես էլ չի երևում պատճառահետևանքային կապը, չի երևում, թե ով է պատասխանատու անձը։ Աղեկյանի մասնակցությամբ առերես հարցաքննություն դեռևս չի կատարվել, սակայն կիրականացվեն, որոշ անձանց ցուցմունքների միջև կան հակասություններ։
«Ցուցմունքներն ընդհանրական են։ Գործով ձեռք բերված տվյալներով չի հաստատվում Գոռ Աղեկյանի հակահրդեհային անվտանգության պահպանման պատասխանատու անձ հանդիսանալու հանգամանքը»,- նշեց Համբարձումյանը։

Գոռ Աղեկյանի կալանավորման որոշման դեմ վերաքննիչ բողոք կներկայացվի։ Պաշտպանության կողմը կվիճարկի թե՛ կալանավորման հիմքերի, թե՛ հիմնավոր կասկածի առկայության հարցը։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։ Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական վարույթի շրջանակներում ձերբակալվել, ապա կալանավորվել էր զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գոռ Աղեկյանը, որը մեղադրվում է զինվորական պաշտոնեական անփութություն կատարելու մեջ, որն անզգուշությամբ առաջացրել է մարդու մահ։

Նույն մեղադրանքով ձերբակալվել, ապա կալանավորվել է նաև զորամասի կոմունալ շահագործման ծառայության պետ, զորամասի հակահրդեհային պաշտպանության և փրկարար աշխատանքների ծառայության պետ, մայոր Մ.Ս.-ն։ Վարույթի շրջանակներում մեղադրանք է ներկայացվել նաև այրվածքներով հոսպիտալացված կապիտանի նկատմամբ՝ ՀՀ քրեական օրենսգրքի 532-րդ հոդվածի 4-րդ մասի հատկանիշներով, այն է՝ զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ:

Հեղինակ՝ Իզաբել Սահակյան

Աղբյուր` Փաստինֆո