Փաստ ինֆո

«Մալաթիա» տոնավաճառում այսօր վաղ առավոտից սկսել են հրդեհի առաջնային սպառնալիք հանդիսացող բոլոր խախտումները շտկել՝ առաստաղներն են փոխում, տանիքների վրայով անցնող վտանգավոր էլեկտրալարերն՝ ապամոնտաժում: Տեղեկությունը «Փաստինֆո »-ի հետ զրույցում հայտնեց տոնավաճառի տնօրեն Սամվել Ավետիսյանը:

Քաղաքաշինության տեխնիկական և հրդեհային անվտանգության տեսչական մարմնի ղեկավար կազմի հետ երեկվա հանդիպումից հետո տեսչական մարմնի մասնագետները մեկ անգամ ևս այցելել են տոնավաճառ, կոնկրետ հանձնարարականներ տվել:

«Համաձայնության ենք եկել: Առավոտյան ժամը 6-ից սկսել ենք իրենց հանձնարարականները կատարել, ես էլ եմ այստեղ, իրենց կողքին, մասնագետներ էլ եմ հրավիրել, մատերիալները բերել ենք, որ բոլորը կարողանանք շուտ վերջացնել»,- նշեց Ավետիսյանը:

Նրա խոսքով՝ տարածքի վարձակալները ևս ներգրավված են աշխատանքներում և ամեն ինչ անելու են, որ մեկ շաբաթվա գործը 2 օրում ավարտեն: Ավետիսյանն ասում է՝ վաղը երեկոյան պահանջվող աշխատանքների 90 տոկոսն արդեն ավարտած կլինեն, մնացածը՝ ընթացքում կշտկեն:

«Մեկ շաբաթվա աշխատանք է, բայց պետք է երկու օրում անենք: Բոլորը մի մարդու նման պատրաստ են օգնել: Տուն չենք գնալու ամբողջ գիշերն աշխատելու ենք: Վաղը իրենց նորից կհրավիրեմ, թող գան, տեսնեն, կարողա ես մի բան այն չեմ անում, որ իմանանք՝ ինչ փոփոխություն անենք: Պլանավորում ենք, որ շաբաթ օրն աշխատելու ենք»,- հավելեց տոնավաճառի տնօրենը:

Հիշեցնենք, որ ՀՀ քաղաքաշինության, հրդեհային և տեխնիկական անվտանգության տեսչական մարմինը որոշել է փետրավարի 1-ից դադարեցնել «Մալաթիա» տոնավաճառի գործունեությունը, քանի որ տնտեսվարողը արձանագրված 17 խախտումից մի քանիսը չի վերացրել։

Երեկ տոնավաճառի աշխատակիցները բողոքի ակցիա էին իրականացում արդեն փակված տոնավաճառի դիմաց։

Ավելի ուշ տոնավաճառի տնօրենն ու մեկ տասնյակ աշխատակիցները հանդիպել են տեսչական մարմնի ղեկավարի հետ և պայմանավորվածություն ձեռք բերել՝ որքան արագ շտկվեն արձանագրված խախտումները, այնքան շուտ տեսչական մարմինը կվերանայի իր որոշումն ու կվերաբացվի տոնավաճառը:

Աղբյուր` Փաստինֆո