Փաստ ինֆո

Վաշտի կացարանում Գեղարքունիքում բռնկված հրդեհը առաջին դեպքը չէր. Ամիսներ առաջ հրդեհ էր բռնկվել նաեւ Սյունիքի մարտական դիրքերից մեկում զինվորների հանգստի համար նախատեսված վագոն-տնակում։ Այն ժամանակ հրդեհը խլեց ժամկետային զինծառայող Պալյան Պողոսյանի կյանքը, սական ՊՆ-ն այն ժամանակ հրապարակային պարզաբանումներով հանդես չեկավ, դատախազաքննչական մարմիններն էլ գործը փորձեցին ծածկադմփոց անել, չպարզեցին հրդեհի առաջացման պատճառները, եղանակը։ Մահվանից վեց ամիս է անցել, սակայն որևէ անձի առ այս պահը մեղադրանք չի առաջադրվել, ինչից հետեւում է, որ խախտումները չեն պարզել ու դրանք անգամ վերացնելու ուղղությամբ միջնորդություն չի ուղարկվել ՊՆ։

Հիշեցնենք, որ այրվածքները ստացել է 2022թ. հուլիսի 17-ին, սակայն դեպքի մասին ՀՀ ՊՆ-ն հայտնել է միայն հուլիսի 25-ին, երբ զինծառայողն արդեն ծայրահեղ ծանր վիճակում էր գտնվում, իսկ դրանից օրեր անց էլ հայտնի դարձավ նրա մահվան մասին։ Հուլիսի 25-ին ՀՀ ՊՆ-ի տարածած պաշտոնական հաղորդագրության համաձայն՝ հուլիսի 17-ին ջերմային 2-րդ աստիճանի այրվածքով Զանգեզուրի կայազորային հոսպիտալ է ընդունվել N զորամասի պարտադիր ժամկետային զինծառայող, շարքային Պալյան Ջիվանի Պողոսյանը: Ըստ պաշտպանական գերատեսչության, Պալյանն այրվածքներ է ստացել դիրքերում, զինվորների հանգստի համար նախատեսված վագոն-տնակում տեղադրված վառարանից բռնկված հրդեհից:

Պալյանի ծնողները որդու մահվան մեջ մեղադրում են իշխանություններին և դիրքի հերթապահ Կարեն Քյարամյանին, որը, ըստ ծնողների, հերթապահի պարտականությունները պատշաճ չի կատարել՝ նշելով, որ Պալյանը և ևս երեք զինծառայող փակված են եղել վագոն-տնակում, մինչև հերթապահը կհասներ և կբացեր դուռը: Ավելին, պարզվում է զինծառայողին ժամանակին պատշաճ բուժօգնություն չէր ցուցաբերվել ի սկզբանե, այրվածքներ ստանալուց հետո զինծառայողի մարմնի կրակը հանգցրել են ջրով և հողով, այրվածքներ ստանալուց հետո հինգ ժամ զինծառայողը մնացել է դիրքում՝ մինչև լուսաբացին տեղափոխել են հիվանդանոց:

Դեպքից վեց ամիս անց զինծառայողի մահվան իրական հանգամանքները դեռևս պարզված չեն: ՀՀ քննչական կոմիտեից «Փաստինֆո»-ի հետ զրույցում հայտնեցին, որ նշված դեպքի առթիվ ՀՀ ՔԿ ԶՔԳՎ ութերորդ կայազորային քննչական բաժնում 2022թ․ հուլիսի 17-ին նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 1-ին մասի հատկանիշներով (Զենքի, ռազմամթերքի, ռազմական տեխնիկայի կամ ռազմական այլ գույքի, ռադիոակտիվ նյութի, պայթուցիկ կամ շրջապատի համար առավել վտանգ ներկայացնող այլ նյութի, սարքի կամ առարկայի հետ վարվելու կանոն խախտելը, որն անզգուշությամբ առաջացրել է մարդու առողջությանը միջին ծանրության վնասի պատճառում կամ խոշոր չափերի գույքային վնաս կամ տվյալ առարկայի ոչնչացում կամ վնասում):

ՔԿ-ից հայտնեցին, որ քրեական վարույթի շրջանակներում որոշումներ են կայացվել Պ․ Պողոսյանին, և ևս 3 անձի տուժող ճանաչելու մասին:

«Նախաքննության ընթացքում որոշումներ են կայացվել նաև դատահրդեհատեխնիկական, դատաբժշկական և դատանյութագիտական փորձաքննություններ նշանակելու մասին, որոնց եզրակացությունները դեռևս չեն ստացվել: Պ. Պողոսյանի՝ մահվան պատճառը պարզելու նշանակվել է դիակի դատաբժկական փորձաքննություն»,- նշեցին ՔԿ-ից՝ հավելելով, որ հարցաքննվել են մարտական դիրքում մարտական հերթապահությունն իրականացնող անձնակազմը, համածառայակիցները, սպայական անձնակազմը, Զանգեզուրի կայազորային հոսպիտալի բժիշկները:

Նրանց փոխանցմամբ՝ նախաքննության ներկա փուլում մեղադրյալի դատավարական կարգավիճակ ունեցող անձինք չկան։
«Ենթադրյալ հանցանքի և հանցանք կատարած անձանց առկայությունը հնարավոր կլինի պարզել նշանակված փորձաքննությունների եզրակացությունները ստանալուց և դրանցից բխող քննչական և վարույթային գործողությունները կատարելուց հետո: Քեական վարույթով նախաքննությունը շարունակվում է»,- նշեցին Քննչական կոմիտեից:

Ասել է թե՝ 6 ամիս հետո անգամ քննչականը չի ստացել դատահրդեհատեխնիկական, դատանյութագիտական փորձաքննությունների եզրակացությունները ու չգիտի, թե ինչի հետեւանքով է հրդեհն առաջացել, իսկ հունվարի 19-ի ողբերգությունից հետո անմիջապես պարզեցին, թե 15 զինվորի կյանք խլած հրդեհն ինչից էր առաջացել։ Ընդ որում, նկատենք, որ այս դեպքում եւս փորձագքննության եզրակացություն դեռ չի ստացվել։

Իսկ դատախազությունն էլ հանկարծ որոշեց աշխատել ու հաղորդագրություն տարածեց, թե հանձնարարվել է ստուգել մյուս կացարանների վիճակը։ Իսկ ինչու դա չէր արվում 6 ամիս առաջ, ինչու դատախազաքննական մարմինները՝ ՊՆ-ի հետ ձեռք-ձեռքի տված անտարբերության մատնեցին զինվորի մահը, չփորձեցին պարզել, թե ինչ վիճակ է տիրում մյուս դիրքերում։ Ինչ է, դրա համար չկար հանրային մեծ պահանջա՞րկ, թե մեկ զինվորի կյանքն իրենց համար այլեւս արժեք չունի ու պետք չէր առկա բարձիթողի վիճակի մասին գնահատականներ հնչեցնել։

Արդյունքում ունեցանք շատ ավելի մեծ ողբերգություն, այս անգամ արդեն՝ 2023 թվականի հունվարի 19-ին, հրդեհի զոհ գնաց 15 հայորդի։ Այս տղաների արյունը նաեւ դատախազների ու քննիչների վրա է, որոնք մոռացել են իրենց անմիջական պարտականություններն ու գործառույթները, որոնք քննություն իրականացնելու ու օբյեկտիվ իրականություն պարզելու փոխարեն լծված են իշխանությունները կեղտերը ծածկելով։ 15 զոհը չէր լինի, եթե զինվորական դատախազությունը 2022 թվականի հուլիսի 17-ին հանձնարարեր ստուգել ոչ զորանոցային պայմաններում գտնվող կացարանները, 15 զոհը չէր լինի, եթե զինվորական քննչական գլխավոր վարչությունը ձեռքերը ծալած չնստեր ու չսպասեր, թե երբ են ստանալու փորձաքննության եզրակացությունը՝ զինվորների վագոն-տնակում հրդեհի առաջացման պատճառի մասին, եթե պաշտպանության նախարար կոչվող անձը հերթով շրջեր ու տեսներ, թե իրականում ինչ պայմաններում են ծառայում իր զինվորները հատկապես այս սահմանամերձ բնակավայրերում, որտեղ ամեն պահի առկա է թշնամու հարձակման վտանգը։

Իսկ հիմա Արգիշտի Քյարամյանը առանց խղղճի խայթ զգալու հայտարարում է, թե «ազնիվ չէ» այլ պատճառ փնտրել 15 զինվորի կյանք խլած հրդեհի համար, բենզինն է պատճառը ու վերջ։ Այո, ազնիվ չէ, ազնիվ չէ, որ Քյարամյանն է ՔԿ ղեկավարը, որը միայն քաղաքական շահ է սպասարկում։

Աղբյուր` Փաստինֆո