Փաստ ինֆո

Թշնամին Սյունիքը կտրելու 3 հարվածային ուղղություն ունի, 3-ի ուղղությամբ էլ աշխատում է. մեկը Ջերմուկն է, երկրորդը՝ Գորիս-Սիսիան-Անգեղակոթ-Նախիջևանն է, երրորդը՝ Մեղրին: Այս մասին «Փաստինֆո»-ի հետ զրույցում հայտնեց ռազմական փորձագետ Հայկ Նահապետյանը՝ մեկնաբանելով սոցցանցերով տարածվող տեղեկություններն առ այն, թե Ադրբեջանը Քարվաճառի կողմից թունելներ է փորում Հայաստանի գրավված տարածքների ուղղությամբ, որպեսզի նոր բախում հրահրի և Սյունիքը կտրի Հայաստանից:

Նրա կարծիքով՝ թունել փորելը բավականին ծախսատար է, թեև չի բացառվում: Փարձագետը, սակայն, ուշադրություն է հրավիրում այն բոլոր ճանապարհների վրա, որոնք վերջին երկու տարիներին Ադրբեջանը կառուցել է, իբր, բեռներ տեղափոխելու համար, բայց ակնհայտ է, որ մայրուղու չափեր ունեցող ճանապարհները նախևառաջ ռազմական տեխնիկա տեղափոխելու համար են նախատեսված:

«Իրենք այդ ճանապարհները կառուցում են մինչև Գորիս, մինչև Ջերմուկ, որ անհրաժեշտության դեպքում տանկերը տրանսպորտով տեղափոխեն: Նրանք այդպիսով նաև անձնակազմի արագ տեղափոխման հարցն են լուծում: Իրենք ամեն օր են պատրաստվում, ուղղակի սպասում են, թե երբ հարմար կլինի ռազմական գործողություններ սկսել»,- ասաց փորձագետը:

Ռազմական գործողություններ սկսելու որոշումներում, սակայն, Ադրբեջանը ինքնուրույն չէ: Ըստ Նահապետյանի՝ նոր ռազմական բախման գնալու համար անհրաժեշտ է աշխարհաքաղաքական ուժային կենտրոնների, այն է՝ Ռուսաստանի, Իրանի՝ եթե ոչ համաձայնությունը, ապա գոնե դիրքորոշումը, այլապես Ադրբեջանը վաղուց արդեն Հայաստանի դեմ նոր պատերազմ սկսած կլիներ:

Նահապետյանի խոսքով՝ եթե Ադրբեջանը ստանա ուժային կենտրոնների համաձայնությունը, ապա Հայաստանում տեղակայված որևէ ԵՄ դիտորդ չի կարող խոչընդոտել ադրբեջանական ռազմական գործողություններին, քանի որ ԵՄ երկրները փոխկապակցված են և կախված են Ադրբեջանից:

«Խոսքն էներգակիրների մասին է, Ադրբեջանի համար գործնականում պրոբլեմատիկ է ոչ թե ԵՄ-ն, այլ ռուսական զինական ներկայությունը, հայ-ադրբեջանական սահմանի այն հատվածներում, որտեղ խոցելի են մեզ համար և Ադրբեջանը կարող է առավելություն ստանալ ռազմական գործողությունների հետևանքով, կարող է զսպել Ադրբեջանի ախորժակը»,- նշեց մեր զրուցակիցը:

Նրա արձանագրմամբ՝ Հայաստանը հրաժարվում է ՀԱՊԿ ռազմական օգնությունից ու հայ-ադրբեջանական սահմանին ՀԱՊԿ դիտորդներ տեղակայելու առաջարկից: Ռազմական փորձագետը ԵՄ առաքելության վերաբերյալ իր խոսքը ամփոփեց հռետորական հարցադրումներով՝

«Իսկ եթե պարզվի, որ այդ դիտորդները եկել են մեկ առաքելությամբ, բայց այլ գործառո՞ւյթ են իրականացնում, ասենք, մեր շահերի դեմ, այդ ինչպե՞ս որոշվեց, որ ԵՄ-ն մեր շահերն է պաշտպանելու, շատ էլ՝ հայտարարեց, մենք այնքան օրինակներ կարող ենք բերել՝ մի բան հայտարարում են Եվրոպական երկրները կամ հավաքական Արևմուտքը, ուրիշ բան անում»,- եզրափակեց ռազմական փորձագետը:

Աղբյուր` Փաստինֆո