Փաստ ինֆո

Գեղամասար համայնքի նախկին ղեկավար Հակոբ Ավետյանը սեպտեմբերյան ռազմական գործողությունների հետևանքով շուրջ 500.000 դոլարի վնաս է կրել. ադրբեջանական հարձակման հետևանքով կարտոֆիլի ցանքատարածություններն անջրդի են մնացել, բերքը սպասվածից պակաս է եղել:

«Մեր հարակից գյուղերը մինչև հոկտեմբերի 5-ը կարտոֆիլը ջրել են, իսկ բերքը «լցնում է» այդ ժամանակ, մեր բերքն ամբողջողվին վարի գնաց, մինիմալ հաշվարկով 500.000 դոլարի վնաս եմ կրել: Նույնիսկ բանվորների փողերը չենք կարողացել տալ, 1 հա-ից՝ 3-4 տոննա քանդելով, ո՞վ կարող է բանվորի փող տալ»,- «Փաստինֆո»-ի հետ զրուցում ասաց Ավետյանը:

Սոթքում նա միակ տուժողը չէ: Ասում է՝ բոլորն են տուժել՝ փոքրից մինչև խոշոր տնտեսություններ, բայց կառավարությունը ո՛չ խոշոր, ո՛չ մանր տնտեսություններին ականջալուր չէ: Մեծ ցանքատարածություններ ունեցող տնտեսություններից մեկի սեփականատերը՝ Պավլիկ Շահսուղարյանը, վարչպետին նամակ է գրել, կառավարությունից նամակը վերահասցեագրել են Գեղարքունիքի մարզպետարան:

Մարզպետն էլ պատասխանել է, թե ցանքատարածությունների վրա արկեր չեն ընկել, կրած վնասը ներկայացնող փաստեր չկան, հետևաբար՝ փոխհատուցում չի կարող լինել:

Նախկին համայնքապետը մարզպետարանի հիմնավորումն անհեթեթ է համարում. տարակուսած է՝ ինչպես է մարզպետը նման անպատասխանատու հայտարարություններ անում:

«Մինչ օրս զորամաս գնացող բարձրավոլտը ամբողջությամբ հոսանքազրկված է: Իմ և Շահսուղարյան Կոլիկի արտեզյաններն այդտեղից են սնուցվում: Մյուս մասը՝ ռմբակոծության պատճառով դուրս է եկել գյուղից ՝ ոչ ոք չէր կարող այնտեղ ջուր աներ, բնական է, որ բերքին տիրություն չեն արել, նրանց կարտոֆիլը ևս փչացել է: Կառավարություն դիմում ենք, ոչ մեկը վեջը չէ, մարզպետն ասում է՝ ոչ մի վնաս չեն կրել»,-նշեց Ավետյանը:

Հիշեցնենք, որ սեպտեմբերի 12-14-ը ադրբեջանական զինուժի նախահարձակ գործողությունների հետևանքով տարբեր ինտենսիությամբ մարտեր էին ընթանում ՀՀ տարբեր բնակավայրերի ուղղությամբ: Թշնամին հրետակոծության էր ենթարկել Սյունիքի, Վայոց Ձորի և Գեղարքունիքի խաղաղ բնակավայրերը, ինչի հետևանքով որոշ բնակավայրերի, այդ թվում՝ Սոթքի, բնակիչները տարհանվել էին:

Աղբյուր` Փաստինֆո