Փաստ ինֆո

Երևանի ընդհանուր իրավասության դատարանում՝ դատավոր Ջոն Հայրապետյանի նախագահությամբ, այսօր շարունակվել է մարտադաշտն ինքնակամ լքելու մեջ մեղադրվող հրամանատար Իշխան Վահանյանի գործով դատական նիստը։

«Փաստինֆո»-ի հաղորդմամբ՝ այսօրվա նիստում հարցաքննվեց վկաներից մեկը՝ պատերազմի մասնակից Վլադիկ Բարսեղյանը, որը նախ չցանկացավ Իշխան Վահանյանի անունը տալ, նշեց՝ չի ցանկանում, քանի որ զորքին թողել փախչել է։ Իրեն ասել են, որ Վահանյանը վիրավորվել է և վիրավոր զինծառայողների հետ գնացել, սակայն վկան նշեց՝ իրականում այդ ծանր վիրավորումը չի եղել, որ դրա համար թողնեն գնան։ Նա անձամբ է տեսել, թե ինչպես է Վահանյանը քայլում, ինչը չէր կարող անել ծանր վիրավորվելու դեպքում։

Վկայի ցուցմունքից կարելի արձանագրել, որ Խուռհատ սարից նահանջելիս զինծառայողները չեն ունեցել ո՛չ հրամանատար, ո՛չ էլ՝ զենք։ Մասնավորապես, վկան պատմեց, որ զենքը նորմալ չի էլ կրակել։ Տուժողների իրավահաջորդների ներկայացուցիչ, փաստաբան Գուրգեն Գրիգորյանը նկատեց՝ խնդիրն այն է, որ հրամանատարը փախչել է, բայց ավելի վատ, ավելի ծանր հանցագործություն է, երբ չաշխատող զենքով երկու ամսվա զինծառայողին հանում են դիրք պահելու։ Նա, ինչպես և նրանից առաջ գործով ցուցմունք տվող գրեթե բոլոր վկաները պատմեց հրամանատարության բացակայության և խառնաշփոթի մասին։ Պարզվեց՝ Իշխան Վահանյանի նահանջից հետո վաշտի հրամանատարներից մեկը հրաման էր տվել նահանջել, մեկ այլ հրամանատար՝ պաշտպանվել, բայց 20 հոգով չեն կարողացել 6-7 ադրբեջանցու հետ մարտի բռնվել, իսկ հստակ, թե որտեղ են եղել 4 սպաները՝ վաշտերի հրամանատարները, վկան չկարողացավ մատնանշել։

Նիստերի դահլիճում գտնվող ծնողներից մեկը հարց ուղղեց վկային՝.«Որ Խուռհատ սարի վրա փոխհրաձգություն եղավ, դուք որ 20 հոգով թողեցիք, փախաք, բա մնացածը, տղա ջան, այ հրամանատարներ, բա մնացածը ուր էին, ուր էիք փախչում։ Թողեցք փախաք, բա մնացածը, տղա ջան»։ Ծնողի հարցը վկան թողեց անպատասխան։ Տուժողի իրավահաջորդի ներկայացուցչի հարցին՝ ում մեղքով նրանք հայտնվեցին այդ իրավիճակում, ճիշտ վարվեցին իրենց հետ, թե՝ ոչ։ Այս հարցին ևս պատասխան չտրվեց։

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Նշենք, որ այս գործով անցնող միակ մեղադրյալը Իշխան Վահանյանն է։ Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Մանրամասները՝ տեսանյութում

Աղբյուր` Փաստինֆո