Փաստ ինֆո

Հայաստանում ԵՄ դիտորդական առաքելությունը պարտավոր էր արձանագրել անցած տարվա սեպտեմբերյան գործողությունների հետևանքով ադրբեջանական ապօրինի ներխուժման փաստը ՀՀ սուվերեն տարածք և առարկայական հայտարարություններ անել հայկական տարածքներն օկուպացրած ադրբեջանական ագրեսորների վայրագ գործողությունների վերաբերյալ, մինչդեռ այդ առաքելությունն իրականացնողները սահմանափակվեցին հեռադիտակներով դիտարկումներ անելով: Այս մասին «Փաստինֆո»-ի հետ զրույցում ասաց քաղաքագետ Գարիկ Քեռյանը:

«ԵՄ դիտորդական առաքելությունից հայ հասարակությունն ամբողջովին հիասթափված է, որովհետև նրանք միայն որոշակի հեռավորությունից նայում էին սարերի գագաթին, հայկական կողմից նրանց ձեռքով-ոտքով ինչ-որ բաներ էին պատմում, բացատրություններ էին տալիս, ուրիշ ոչինչ: Օկուպացրած տարածքներում ոչ մի դիտարկումից հետո կոնկրետ փաստական, եզրակացություն, հայտարարություն կամ զեկույց ԵՄ փաստաթղթերում չեղավ»,- նշեց նա:

Քեռյանի խոսքով՝ հայ-ադրբեջանական հակամարտության կարգավորման գործընթացում ստեղծվել է երկակի իրավիճակ. մի կողմից մենք գիտենք, որ հակամարտության կարգավորման միակ լեգիտիմ ճանաչված հարթակը ԵԱՀԿ Մինսկի խմբի համանախագահությունն է, որին, ի դեպ, իր համաձայնությունն է տվել նաև եվրոպական ղեկավարությունը, մյուս կողմից՝ ԵԱՀԿ-ն թողնելով մի կողմ, ԵՄ-ն իր դիտորդական առաքելությունն է ուղարկել Հայաստան:

Նշենք, որ վերջին օրերին տեղեկություններ տարածվեցին, որ ԵՄ-ն պատրաստվում է նոր, մոտ 200 հոգանոց դիտորդական առաքելություն գործուղել Հայաստան, որը տեղակայված կլինի ոչ միայն հայ-ադրբեջանական, այլ նաև Հայաստանի սահմանների ողջ երկայնքով:

«Փաստացիորեն եվրոպական երկու կառույցների միջև տեսնում եմ որոշակի անհամաձայնություն, նույնիսկ հակասություն, որը ցանկալի չէ: ԵՄ առաքելության ներկայիս դիտորդական առաքելությունը անշուշտ Ռուսաստանի կողմից չի դիտվի որպես բարեկամական քայլ, որովհետև այսօր ամբողջ հավաքական Արևմուտքը Ռուսաստանի հետ պատերազմի մեջ է, և ԵՄ դիտորդական առաքելությունը ռուսական ղեկավարության շրջանում ուղղակի գրգռելու է որոշակի հակահայկական տրամադրություններ»,- ընդգծեց Քեռյանը:

Քաղաքագետի կարծիքով՝ Հայաստանի սահմաններին ԵՄ դիտորդներ տեղակայելով, մենք թույլ ենք տալիս, որ մեր ռազմավարական դաշնակից Ռուսաստանի դեմ պատերազմող բևեռը ներկայություն ունենա տարածաշրջանում, իսկ թե որքանով առաքելությունը կարող է արդյունավետ լինել, ի տարբերություն նախորդի, դժվար է ասել:

«Տա Աստված, որ դա արդյունավետ լինի և նպաստի որոշակի հարցերի լուծմանը, ֆիքսի, որ Ադրբեջանը մեր սուվերեն տարածք է մտել, նախորդը չարեց, հիմա սա կանի թե չի անի՝ չգիտեմ: Պետք է այդ առաքելությունը գա, տեսնենք՝ ինչ գործունեություն է ծավալելու, հետո նոր կարծիք հայտնենք: Առանց գործունեություն ծավալելու կարծիք հայտնելն անշնորհակալ գործ է»,- նկատեց քաղաքագետը:

Հիշեցնենք, որ ԵՄ դիտորդական առաքելության ժամկետն ավարտվել է 2022 թվականի դեկտեմբերին: Եվրամիությունը՝ Հայաստանի, Ադրբեջանի, Եվրոպական խորհրդի և Ֆրանսիայի ղեկավարների պայմանավորվածության հիման վրա հոկտեմբերի 20-ին դիտորդներ էր տեղակայել Ադրբեջանի հետ սահմանի հայկական կողմի երկայնքով՝ տեղում իրավիճակը վերահսկելու, վերլուծելու և զեկուցելու նպատակով:

Աղբյուր` Փաստինֆո