Փաստ ինֆո

2023թ. իրականում բավականին վճռորոշ տարի է լինելու, նախատեսված են բավականին լուրջ փոփոխություններ և՛ տարածաշրջանում, և՛ աշխարհում: Ինչու՞ հենց 2023թ., որովհետև, հատկապես Թուրքիայի համար սա բավականին կարևոր տարի է: 2023թ. հոկտեմբերի 29-ին լրանում է Թուրքիայի Հանրապետության հիմնադրման 100 ամյակը: Այս իմաստով և՛ Ադրբեջանում, և՛ Հայաստանում արդեն իսկ գիտակցվում են, որ մտել ենք նոր տուրբուլենտ քաղաքական գործընթացների մեջ, և դա անընդհատ հարվածելու է պետությունների քաղաքական համակարգերին: «Փաստինֆո»-ի եթերում ասել է քաղաքագետ Արա Պողոսյանը:

«Ցավոք, շատ են քննարկվում այն ուղերձները, որոնք Հայաստանի վարչապետի կողմից հնչեցին վերջին մամուլի ասուլիսի ընթացքում, սակայն բաց մնացին Ադրբեջանի նախագահի կողմից հնչեցված թեզերը, որոնք հաստատում են այն մտահոգությունները, որ Ադրբեջանը տարածաշրջանի վերաբերյալ ունի սեփական պատկերացումները, և պատրաստվում է ոչ թե խաղաղության, այլ Արցախում էթնիկ զտման»,- նշեց բանախոսը:

Քաղաքագետի դիտարկմամբ, ՀՀ վարչապետի ուղերձներից մեկը վերաբերում էր Արցախի մասին ՀՀ պատկերացմանը: ՀՀ վարչապետի կողմից հստակ նշվեց, թե որն է իր պատկերացումը Արցախի վերաբերյալ: Եվ ըստ դրա, Հայաստանը անելիք չունի այս հարցում, և լավագույն դեպքում կարող է աջակցել Ստեփանակերտի ու Բաքվի երկխոսությանը: «Հայաստանը պաշտոնապես հրաժարվում է Արցախի կարգավիճակի հետ կապված ցանկացած տեսակի բանակցությունից՝ դա վերապահելով Արցախի իշխանություններին: Միտքը վերծանենք՝ «Եթե կարող են՝ թող բանակցեն, մենք կաջակցենք նրանց»»,- հստակեցրեց Ա. Պողոսյանը:

Բանախոսի խոսքերով՝ ՀՀ վարչապետը ամեն կերպ փորձեց ձերբազատվել Արցախից և Արցախի հետ կապված խնդրից: Իսկ վարչապետի արձագանքը, առ այն, որ ՀՀ անվտանգության երաշխավորը ՌԴ-ն է՝ զարհուրելի է: Չկա այնպիսի իրավապայմանագրային բազա, որ Ռուսաստանը ստանձնի ՀՀ անվտանգության երաշխավորի դերը:

Եթե մենք ասում ենք, որ ՀՀ-ն ինքնիշխան պետություն է, դա նշանակում է, որ ՀՀ-ն առնվազն ունի պետականության համար բավարար ատրիբուտներ, որոնից ամենակարևորը սեփական ուժերով իր սահմանների և բնակչության անվտանգության ապահովումն է: Ակնհայտ է դառնում, որ ՀՀ-ն չի պատրաստվում ունենալու այնպիսի ուժային հնարավորություններո, որոնք հնարավորություն կտան պետությանը սեփական ուժերի միջոցով մշտապես ապահովել իր սահմանների և բնակչության անվտանգությունը:

Անդրադառնալով 2023թ. ակնկալվող փոփոխություններին՝ քաղաքագետը նշեց, որ, եթե ՀՀ-ն համաձայնի գնալ խաղաղության պայմանագրի կնքման, ինչը լուրջ զիջումներ է պահանջելու, ապա իրականում Հայաստանը որպես պետական կազմավորում գուցե գոյություն ունենա, բայց որպես կենսունակ պետություն՝ դժվար կլինի ասել, որ կշարունակի գոյատևել: «Արցախում սցենարը այլ է: Արցախում հասարակության կողմից դիմադրություն կա, և մեծ հույս ունեմ, որ վերածնունդը դարձյալ սկսվելու է Արցախից»,- եզրափակեց բանախոսը:

Մանրամասները՝ տեսանյութում

Աղբյուր` Փաստինֆո