Փաստ ինֆո

Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր կայացել է Երևանի ընդհանուր իրավասության դատարանի դատավոր (լիազորությունները կասեցված են) Արուսյակ Ալեքսանյանի, փաստաբան Էրիկ Ալեքսանյանի և դատավորի օգնաական Թամարա Պետրոսյանի գործով առաջին դատական նիստը։

«Փաստինֆո»-ի հաղորդմամբ՝ դատական նիստը կարճ է տևել. դատավորի փաստաբանները նախապես դիմում էին ներկայացրել դատարան՝ խնդրելով հետաձգել դատական նիստը։ Մինչ դատարանը կհետաձգեր այն՝ նախագահող դատավորը հետաքրքրվեց՝ արդյո՞ք ծանոթացել են նյութերին, ստացե՞լ են արդյոք իրավունքների և պարտականությունների վերաբերյալ հուշաթերթը, մեղադրական եզրակացությունը և այլն։ Պարզվեց՝ մեղադրական եզրակացությունը Էրիկ Ալեքսանյանը չէր ստացել, իսկ Արուսյակ Ալեքսանյանը և օգնականը՝ ստացել են երեկ երեկոյան՝ էլեկտրոնային եղանակով։

Արուսյակ Ալեքսանյանը բարձրացրեց՝ ՔԿՀ-ում նյութերին էլեկտրոնային եղանակով ծանոթանալու խնդրահարույց լինելու հանգամանքի մասին։ Մասնավորապես, Արուսյակ Ալեքսանյանը նշեց, որ ամբողջությամբ հնարավորություն չի ունեցել ծանոթանալու դատարան ուղարկված քրեական վարույթի 11 հատոր նյութերին, որովհետև ՔԿՀ-ում գտնվող անձին նյութերը տրամադրել են էլեկտրոնային եղանակով։

«Քննիչն ինձ բանավոր հայտնել է, որ խոսել է ՔԿՀ համապատասխան աշխատակցի հետ և ինձ կտրամադրվի համակարգիչ, բայց հետագայում պարզվեց, որ ՔԿՀ խցերում համակարգիչ, նոթբուք չի թույլատրվում, ժամային սահմանափակումներով ինձ հնարավորություն է տրվել ընդամենը մի քանի օր հաճախել աշխատակցի աշխատասենյակ և օգտվել համակարգչից։ Ես երեք անգամ դիմում եմ գրել և քննիչին, և գլխավոր դատախազին, և՛ նրա տեղակալներին։ Մեղադրյալին, որը երեք ամիս շարունակ կալանքի տակ է, այսինքն՝ ես տանը չեմ, որ էլեկտրոնային տարբերակը տվել եք, ես էլ նստեմ, բացեմ կարդամ, հետո՝ նյութերին ծանոթանալը չի ենթադրում նյութերի ծանոթացում, այլև՝ պաշտպանական տակտիկա մշակել և այլն»,- նշեց Արուսյակ Ալեքսանյանը՝ խնդրելով դատավորին միջամտել, որ մինչև հաջորդ դատական նիստը իրեն տրամադրվի նյութերը՝ թղթային տարբերակով. «Չգիտեմ՝ նյութերն ինձ կտա քննիչը, թե դատախազը, ինձ համար միևնույն է, թե ով կտա, բայց պարտավոր են ինձ նյութերը տալ թղթային տարբերակով, քանի դեռ ես գտնվում եմ ՔԿՀ-ում»։

Նախագահող Վահե Դոլմազյանը նշեց, որ դատարանը կտրամադրի գործի նյութերը՝ թղթային տարբերակով։

Նիստի ընթացքում նախագահող դատավորին վրդովվեցրեց Արուսյակ Ալեքսանյանի և Էրիկ Ալեքսանյանի զրույցը, որի ընթացքում վերջիններս ծիծաղում էին։

Հաջորդ դատական նիստը նշանակվել է հունվարի 13-ին, ժամը՝ 12.00-ին։

Հիշեցնենք, որ հոկտեմբերի 17-ին ԱԱԾ ծառայողները ներխուժել են դատարանի շենք և ձերբակալել դատավոր Արուսյակ Ալեքսանյանին և փաստաբան Էրիկ Ալեքսանյանին։ ՀՀ գլխավոր դատախազը միջնորդություններ էր ներկայացրել ԲԴԽ՝ պահանջելով թույլատրել քրեական հետապնդում հարուցել և ազատությունից զրկել դատավոր Արուսյակ Ալեքսանյանին, որը ժամեր տևած քննության արդյունքում բավարարվել է։ Քրեական վարույթը վերաբերում է քրեական հեղինակությանն առնչվող գործին։

Մասնավորապես, դատարանը որոշել է գրավի դիմաց ազատ արձակել «Ֆազ» մականունով հայտնի քրեական հեղինակություն համարվող Սերգեյ Գրիգորյանին՝ բավարարելով վերջինիս պաշտպան Էրիկ Ալեքսանյանի ներկայացրած միջնորդությունը և այժմ ԱԱԾ-ն դատավորին մեղադրում է ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։ Նույն վարույթի շրջանակներում մեղադրանք է առաջադրվել նաև փաստաբան Էրիկ Ալեքսանյանին, որին ԱԱԾ-ն մեղադրում է դատավոր Ալեքսանյանին պաշտոնեական լիազորություններն անցնելու հարցում օժանդակելու մեջ։ Իսկ որպես «օժանդակություն», ըստ պաշտպանների, դիտարկվել է փաստաբան Էրիկ Ալեքսանյանի կողմից իր փաստաբանական լիազորություններից օգտվելն ու իր իր պաշտպանյալի նկատմամբ ընտրված խափանման միջոց կալանավորումը վերացնելու և այլընտրանքային խափանման միջոցը թույլատրելի ճանաչելու վերաբերյալ միջնորդություն ներկայացնելը։

Արուսյակ Ալեքսանյանը, դատավորի օգնական Թամարա Պետրոսյանը և Էրիկ Ալեքսանյանն իրենց ներկայացված մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո