Փաստ ինֆո

Հայաստանի իշխանություններն ակնհայտ հակառուսական քաղաքականություն են վարում: Սա այն դեպքում, երբ Ռուսաստանն է Արցախի հայության անվտանգության միակ երաշխավորը: Լավ, թե՝ վատ, չգիտեմ, բայց փաստն այն է, որ եթե Արցախում խաղաղապահներ չլինեին, ապա այնտեղ մեկ հայ չէր մնա կամ էլ ցեղասպանության կենթարկվեին: «Փաստինֆո»-ի հետ զրույցում ասել է քաղաքագետ Հրանտ-Մելիք Շահնազարյանը:

Նրա արձանագրմամբ՝ Հայաստան-Ռուսաստան դաշնակցային հարաբերություններ այլևս չկան, հասել ենք մի վտանգավոր փուլի, երբ մեռնում են նաև դիվանագիտական հարաբերությունները՝ երկու երկրների միջև։

«Հարցերը կամ խնդիրները այլևս քննարկվելու են ոչ թե դիվանագիտական հարթակում, այլ՝ Ռուսաստանը փորձելու է ճնշման միջոցով իր շահերն առաջ տանել, ինչը մեծ ռիսկեր է պարունակում մեր տարածաշրջանի համար»,-ասում է նա:

Այսօր Նիկոլ Փաշինյանը կառավարության նիստի ժամանակ հայտարարել էր` եթե ՌԴ–ն օբյեկտիվ կամ սուբյեկտիվ պատճառներով չի կարողանում ապահովել կայունություն ու անվտանգություն ԼՂ–ում, ապա պետք է քննարկում նախաձեռնի ՄԱԿ–ի ԱԽ–ում, ու ԼՂ խաղաղապահ զորախմբին ՄԱԿ–ի լրացուցիչ մանդատով օժտելու կամ ԼՂ լրացուցիչ բազմազգ խաղաղապահ զորախումբ ուղարկելու հարց բարձրացնի։

ՌԴ նախագահի մամուլի քարտուղար Պեսկովն էլ, արձագանքելով Փաշինյանին, ասել էր, որ ռուս խաղաղապահներին ՄԱԿ-ի մանդատ տալու, ինչպես նաև միջազգային ուժերի հնարավոր ներգրավման համար անհրաժեշտ է հակամարտող երկու կողմերի՝ Հայաստանի ևԱդրբեջանի համաձայնությունը:

Հարցին՝ հնարավոր համարո՞ւմ է, որ ռուս խաղաղապահներից բացի այլ երկրի խաղաղապահներ գան Արցախ՝ քաղաքագետը չի բացառում, որ Արևմուտքը նման բան նախաձեռնի և ՄԱԿ-ի մանդատով զորքեր ուղարկի Արցախ:

«Բայց սրա նպատակը Արցախը փրկելը չէ, այլ՝ ռուս խաղաղապահներին Հարավային Կովկասից դուրս մղելը: Իսկ եթե մեր անվտանգային տեսանկյունից նայենք, ապա ոչ մի խաղաղապահ, այդ թվում՝ ռուսները, չեն կարող մեզ տալ այն երաշխիքները, ինչը կարող է տալ հայկական բանակը »,-հավելեց նա:

Ինչ վերաբերում է ԱԽ քարտուղար Արմեն Գրիգորյանի այն պնդումներին, որ ՌԴ-ն Հայաստանին ստիպում է միջանցք տրամադրել Ադրբեջանին, անդամակցել միութենական պետությանը, քաղաքագետը կարծում է, որ նման հայտարարությունների նպատակը հանրության շրջանում հակառուսական տրամադրություններ ստեղծելն է:

Հրանտ Մելիք-Շահնազարյանը հիշեցնում է՝ Արմեն Գրիգորյանի հայտարարությունից մեկ օր անց Անդրանիկ Քոչարյանը հերքեց այն.

«Իշխանության մի ներկայացուցիչ ասում է, թե Ռուսաստանը ճնշում է գործադրում և ստիպում է միանալ Միութենական պետությանը, ճիշտ մեկ օր անց իշխանության մյուս ներկայացուցիչն ասում է, թե նման բան չկա, իրենք իրենց հերքում են, հիմա ո՞ր մեկին հավատաս:

Ինձ թվում է, նրանք բոլորը ստում են և հակառուսական տրամադրություններ են ստեղծում: Այն, որ Ռուսաստանն իր պարտավորությունները պատշաճ ձևով չի կատարում Արցախում, դա փաստ է, բայց պետք է նաև պատճառները հասկանալ:Օրինակ, հայկական կողմը չի գնում Բայրամով-Լավրով հանդիպմանը, ասում են՝ Լաչինի միջանցքում ստեղծված իրավիճակի պատասխանատուն Ռուսաստանն է, պահանջ դնողն էլ Ադրբեջանը, դա իրենց երկուսի խնդիրն է, թող իրենք էլ գնան ու լուծեն այդ հարցը: Հիմա եթե Հայաստանը Արցախին այսպես է վերաբերվում, Ռուսաստանն ինչո՞ւ պետք է Թուրքիայի և Ադրբեջանի հետ կոնֆլիկտներ ունենա: Այսինքն, ամեն ինչ փոխկապակցված է՝եթե պաշտոնական Երևանը գնում է և Արցախը ճանաչում է Ադրբեջանի մաս, հետո գալիս, ասում է՝ Ռուսաստանը թող ճանապարհը բացի, այդպես չի լինում, սա հասարակությանը մոլորեցնել է: Հասարակությունը պետք է իմանա ճշմարտությունը, որ Հայաստանի իշխանությունները ամբողջությամբ հրաժարվել են Արցախից և Արցախի հարցն օգտագործումեն հակառուսական տրամադրություններ տարածելու նպատակով: Մեր իշխանությունները սպասարկում են Արևմուտքի օրակարգը, որը Ռուսաստանին դուրս մղելն է Հարավային Կովկասից, բայց այն, որ Ռուսասատանի փոխարեն այդ դատարկ տեղ զբաղեցնելու է թուրք-ադրբեջանական դաշինքը, դա այս իշխանություններին չի հետաքրքրում »,-ասաց քաղաքագետը:

Աղբյուր` Փաստինֆո