Փաստ ինֆո

Համացանցում տարածվել է ադրբեջանցիների այսօրվա ակցիայի տեսանյութը, որտեղից հետեւում է, որ այսպես կոչված «բնապահպանները» հանդիպում են պահանջում Վոլկովի հետ։

Հիշեցնենք, որ առաջին անգամ քաղաքացիական հագուստներով մի խումբ ադրբեջանցի «բնապահպաններ» Ստեփանակերտ-Գորիս մայրուղին փակել էին դեկտեմբերի 3-ին՝ Արցախում շահագործվող հանքավայրերի կապակցությամբ, իբր, բնապահպանական խնդիրների շուրջ մտահոգություն հայտնելով։ Խաղաղապահների մասնակցությամբ երեք ժամ տեւած բանակցություններից հետո, ի վերջո, ադրբեջանցիները բացել էին ճանապարհը։

Արձագանքելով ադրբեջանցիների ակցիային՝ Արցախի Հանրապետությունը հայտարարեց, որ Արցախի Հանրապետության ընդերքը պետության բացառիկ սեփականությունն է, որը օգտագործվում է բնապահպանական և սոցիալական պատասխանատվության միջազգային առաջադեմ չափորոշիչներին համապատասխան: Այդ չափորոշիչների շրջանակներում Արցախի Հանրապետությունը հոգ է տանում իր բնակչության առողջության ու բնության պահպանման մասին՝ չնայած միջազգայնորեն չճանաչվածությամբ և հակամարտությամբ պայմանավորված տարբեր դժվարություններին: Միջազգային մակարդակի փորձագետների ներգրավմամբ մեր պարբերական ուսումնասիրությունները որևէ նշանակալի բնապահպանական ռիսկեր չեն արձանագրել ընդերքօգտագործման հետ կապված՝ ըստ անհրաժեշտության ձեռնարկելով կանխարգելիչ միջոցներ:

Այդուհանդերձ, Արցախը հայտարարել էր, որ պատրաստ է նույնիսկ միջազգային փորձագիտական խումբ հրավիրել՝ բնապահպանական ռիսկերը լրացուցիչ գնահատելու և համակարգը բարելավելու նպատակով:

Հետագայում պարզվեց, որ խաղաղապահները բանակցել են Ադրբեջանցիների հետ ու թուլատրել նրանց «ճանաչողական» այցը՝ Դրմբոնի և Կաշենի հանքավայրեր՝ առանց Արցախի իշխանությունների ու հանքավայրի ղեկավարության հետ համաձայնեցնելու։ Սա առաջացրել էր տեղի բնակիչների ու հանքավայրի աշխատակիցների դժգոհությունը, որոնք թույլ չէին տվել դեկտեմբերի 10-ին ադրբեջանցիների մուտքը հանքավայրի տարածք ու այցը չեղարկվել էր։ Ադրբեջանն անգամ նոտա է հղել ՌԴ պետդումային՝ ի նշան դժգոհության, իսկ այսօր կրկին փակվել է ճանապարհը։

Նշենք, որ իրականում ադրբեջանցիները ցանկանում են խլել հանքավայրերն ու իրենց տնօրինությամբ կազմակերպել դրանց շահագործումը։ Ըստ տեղեկությունների՝ հուլիսի 5-ին Ալիևը հրամանագիր է ստորագրել, ըստ որի՝ Արցախի Դրմբոնի և Կաշենի հանքավայերը շահագործման են հանձնվել Բրիտանական Anglo Asian Mining ընկերությանը:

Ավելին, ադրբեջանական կողմը խոստացել էր բրիտանացիներին ապահովել հանքավայր ազատ մուտք գործելու հնարավորությունը, իսկ այժմ փորձում է կատարել խոստումը։

Աղբյուր` Փաստինֆո