Փաստ ինֆո

Իշխող ուժը ջնջել է «Արցախի Հանրապետություն» բառակապակցությունը, փոխարենը ավելացրել «Ղարաբաղի հայություն»։ Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Իշխան Սաղաթելյանը։

Նրա խոսքով՝ օրեր առաջ Ադրբեջանի խորհրդարանն ընդունել է մի հայտարարություն, որով աղավաղել է Ղարաբաղյան համակարտության ողջ էությունն ու բովանդակությունը հակահայ բազմաթիվ ձևակերպումներով է հանդես եկել, հիմա ԱԺ ընդդիմությունը նախաձեռնե։ է. որ ՀՀ ԱԺ-ն հանդես գա հայտարարությամբ՝ դատապարտելով Ադրբեջանի խորհրդարանի հայտարարությունը։ Սաղաթելյանի փոխանցմամբ՝ իրենց պատրաստած հայտարարությունը երեք սկզբունքի վրա է հիմնված։ Մասնավորապես, առաջին, հայտարարությունում հստակ նշվում է Արցախի ինքնորոշման իրավունքի մասին, կարգավիճակի մասին, ինչպես նաև ՀՀ հանձնառության մասին:

«Հայտարարության տեքստը ներկայացվել է ՔՊ խմբակցությանը, իրենք ներկայացրել են իրենց առաջարկությունները: Իրենց առաջարկության մեջ ջնջել են «Արցախի Հանրապետություն» բառակապակցությունը, դրա փոխարեն ավելացրել են «Ղարաբաղի հայություն»: Որտեղ կա ինքնորոշման իրավունքի իրացում, ջնջել են, ինչպես նաև Հայաստանի հանձնառության մասը: Այսինքն հայտարարության բուն տեքստն ամբողջությամբ աղավաղել են:

Ստացվում է, որ Ֆրանսիայի ԱԺ-ն և Սենատը հանդես են գալիս հայտարարությամբ, Արցախի խորհրդարանը հանդես է գալիս հայտարարությամբ, իսկ Հայաստանի ԱԺ-ն հրաժարվում է հայտարարությամբ հանդես գալուց»,-ասաց Սաղաթելյանը։

Նա ընդգծեց, որ ԱԺ հայտարարության նախագծում որևէ քաղաքական գնահատական չկա, այն վերաբերում է բացառապես Արցախին եւ Հայաստանին:

Աղբյուր` Փաստինֆո