Փաստ ինֆո

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, ընթանում է հասարակական-քաղաքական գործիչ Ավետիք Չալաբյանի գործով դատական նիստը, որի ընթացքում հարցաքննվում են վկաները։

«Փաստինֆո»-ի թղթակցի հաղորդմամբ՝ այսօրվա նիստին նախատեսված էր նաև Ագրարային համալսարանի ՈՒԽ նախագահ Թոռնիկ Ալեյանի հարցաքննությունը, սակայն Ալեյանը, որն առանցքային վկան է, չի ներկայացել նիստին՝ լինելով պատշաճ ծանուցված։

Դատարանում հարցաքննվեց Ագրարային համալսարանի ուսանողներները։ Նրանցից մեկը՝ Մաշա Վարդանյանը պատմեց, որ համալսարանում որպես հրավիրյալ դասախոս աշխատող Էմմա Սարգսյանը, որի հետ ինքը հեռու բարեկամական կապեր ունի՝ մորական կողմից, իրեն էր դիմել՝ խնդրելով փոխանցել իրեն ՈՒԽ նախագահ Թոռնիկ Ալեյանի հեռախոսահամարը, ինչից հետո ինքն այլևս ոչինչ չի իմանում։

«Ասել է՝ համալսարանի համար «թույն» ծրագրեր ունի, դրա համար էլ խնդրել է ՈՒԽ նախագահի հեռախոսահամարը»,- նշեց վկան՝հավելելով, որ այդ ժամանակ պետական քննություններ էին եւ իր ելումուտը համալսարան՝ հազվադեպ էր. «Ես այնպիսի քաոսային իրավիճակում էի։ Պետականներն ինձ համար ավելի առաջնային էր, քան որ երկրում այդպես էր, քաղաքական գործընթացներով չէի հետաքրքրվում ընդհանրապես»։ Թոռնիկ Ալեյանի հետ ՈՒԽ շրջանակներում է շփվել, ինքը Ֆակուլտետի ՈՒԽ նախագահն է, այլ խոսակցություններ երբեք չի եղել, Ավետիք Չալաբյանին՝ չի ճանաչում, առաջին անգամ է տեսնում։ Դատախազի հարցին՝ արդյո՞ք խոսակցություն երբևէ եղել է՝ ուսանողներին 1000 դրամով ինչ-որ աշխատանքի ներգրավելու վերաբերյալ, վկան հավաստացիացրեց՝ ինքը երբեք որևէ խոսակցություն չի լսել։ Վկա Արմեն Սողոմոնյանը, որը Ագրարային համալսարանի ՈՒԽ փոխնախագահն է, նշեց, որ ինքը որևէ քաղաքական կուսակցության չի հարում, ապաքաղաքական է, որքանով գիտի՝ Թոռնիկ Ալեյանը նույնպես։

«Մայիս ամիսն էր կամ ապրիլի վերջ, եթե չեմ սխալվում։ Էմմա Սարգսյանը հանդիպում է Թոռնիկ Ալեյանին՝ ինչ-որ գործնական առաջարկով, բայց հետո գործնական առաջարկը միանգամից գնում է քաղաքական կողմ, ինչքանով տեղյակ եմ՝ ասում է, որ պետք է հանդիպեն իր քաղաքական ղեկավարներին, դրանից հետո գնում են հանդիպման։ Հանդիպումը եղել է մի մտքով՝ զգուշացնել, որ մեր համալսարանը, մեր կառույցը ապաքաղաքական կառույց է, զուտ մեր կառույցից հեռու մնան, մեր ուսանողները՝ համալսարանից դուրս եթե որեւէ քաղաքական թևին կողմ են լինում, ապա դա արդեն իրենց անձնական որոշելիքն է, բայց համալսարանի ներսում մենք ոչ մի ուսանողի ոչինչ չենք պարտադրում, ստիպում։ Դրանից հետո տարածվեց ձայնագրությունը՝ կիսատ է, թե ինչ է, որտեղ Թոռնիկը խոսում է և ամեն ինչ կարծես իր դեմ էր, որ հարցեր է տալիս և այլն»,-ասաց վկան։

Դատախազի հարցին՝ մինչև ձայնագրության հրապարակումն ով է եղել իր ինֆորմացիայի աղբյուրը՝ Սողոմոնյանը նշեց, որ Թոռնիկ Ալեյանն էր, երբ Էմմա Սարգսյանը հանդիպման էր եկել՝ Թոռնիկ Ալեյանը իրեն և ՈԻԽ մի քանի անդամի տեղյակ էր պահել։ Մինչև այդ՝ Էմմա Սարգսյանի մասին ինքն ընդհանրապես չէր լսել, դեպքի ժամանակ է իմացել, որ հրավիրյալ դասախոս է։ Սողոմոնյանի հավաստմամբ՝ հրապարակային ոչ մի ցույցի ՈՒԽ-ն չի մասնակցել, դասադուլ եղել է՝ 2018թ, երբ ամբողջ համալսարանը դասադուլի է մասնակցել։

Պատասխանելով պաշտպանության կողմի հարցադրումներին՝ վկան պատմեց, որ Թոռնիկ Ալեյանի հետ հանդիպել է ձայնագրության հրապարակումից հետո։ Ըստ նրա՝ Թոռնիկ Ալեյանը հանդիպման մասին ասել էր. «Ձեռք են առնում՝ յուրաքանչյուր ուսանողի համար 1000 դրամ։ Մեր ուսանողի ձայնը ոչ վաճառվում է, ոչ էլ՝ բան։ Չգիտեմ ինչի տեղ են դրել մեր ուսանողներին, որ մտածում են՝ կարող են 1000 դրամով ուսանողի ձայն առնեն, իրոք վիրավորական է, որ մտածում են՝ 1000 դրամով ուսանողը պետք է դուրս գա փողոց»։ Վկայի խոսքով՝ Թոռնիկ Ալեյանը դժգոհություն է հայտնել, սակայն ոչ թե գումարից, այլ՝ այն վերաբերմունքից, որը ստացել էր։

«Այո, այդ հանդիպումից հետո Թոռնիկը եկել է ու մեզ մոտ դժգոհություններ հայտնել, բայց նա ոչ թե դժգոհ էր գումարից, այլ այն վերաբերմունքից, որը ստացել էր։ Նա դժգոհում էր, որ սա ձեռք առնելու բան է, որ ուսանողի ձայնը կարան 1000 դրամով առնեն։ Դժգոհ էր վերաբերմուքնից, թե ո՞նց, ուսանողին ինչի տեղ են դնում»,- ասաց վկան։

Սողոմոնյանը դատարանում հայտնեց, որ իրեն որքանով հայտնի է՝ Թոռնիկ Ալեյանը մերժել էր առաջարկը, սակայն պաշտպանության կողմը վկայի ցուցմունքում հակասություններ տեսավ՝ արձանագրելով, որ նախաքննության ընթացքում Թոռնիկ Ալեյանն իրեն հայտնել էր, որ որևէ պատասխան չի տվել։
Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ նախաքննական մարմնի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:

Հեղինակ՝ Իզաբել Սահակյան

Աղբյուր` Փաստինֆո