Փաստ ինֆո

2022թ սեպտեմբերի 13-14-ին ադրբեջանական ռազմական ագրեսիայի հետևանքով զոհված զինծառայողների՝ հայտնաբերված մարմիններն արդեն նույնականացվել են։ ՀՀ քննչական կոմիտեից «Փաստինֆո»-ի գրավոր հարցմանն ի պատասխան հայտնել են, որ նոյեմբերի 28-ի դրությամբ՝ չճանաչված և չնույնականացված մարմիններ չկան։ (Հարցման պատասխանը ստացել ենք՝ նախքան ադրբեջանցիների կողմից եւս 13 հայ զինծառայողի մարմին Հայաստանին հանձնելը.- խմբ)։

Հիշեցնենք, որ սեպտեմբերի 12-ի լույս 13-ի գիշերը՝ ժամը 00:05-ից, Ադրբեջանի ԶՈՒ ստորաբաժանումները Գեղարքունիքի, Սյունիքի եւ Վայոց Ձորի մարզերի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ՝ կիրառելով նաև ԱԹՍ-ներ, ականանետային-հրթիռահրետանային միջոցներ։

ՔԿ ԶՔԳՎ-ում նույն օրը քրեական վարույթ է նախաձեռնվել՝ ՀՀ քրեական օրենսգրքի 140-րդ հոդվածի 1-ին մասի 2-րդ կետով (պատերազմ վարելու արգելված եղանակների կիրառմամբ պատերազմական հանցագործությունները, որը դրսևորվել է քաղաքացիական օբյեկտների վրա հարձակումով) և

ՀՀ ՔՕ 149-րդ հոդվածի 1-ին մասով (պետության քաղաքական կամ ռազմական գործողությունները փաստացի ղեկավարող կամ վերահսկող կամ ուղղորդող անձի կողմից ագրեսիա պլանավորելը, նախապատրաստելը, նախաձեռնելը կամ իրականացնելը)։

Զոհված զինծառայողների վերջնական թիվն առ այս պահը հայտնի չէ։ Սեպտեմբերի 23-ին հանձվել էր 6 հայ զինծառայողի մարմին, սեպտեմբերի 20-ին՝ 95, սեպտեմբերի 17-ին՝ 32 մարմին, հոկտեմբերի 27-ին՝ 10 զինծառայողի մարմին։ Վերջին անգամ Ադրբեջանը հայկական կողմին է փոխանցեկ 13 զինծառայողի մարմին՝ նոյեմբերի 28-ին։ Նիկոլ Փաշինյանը հոկտեմբերի 14-ին ԱՊՀ պետությունների ղեկավարների խորհրդի հերթական նիստի ժամանակ հայտնել էր, որ ագրեսիայի հետևաքով զոհերի և անհայտ կորածների թիվը գերազանցել է 210-ը։

Հոկտեմբերի 4-ին ադրբեջանական գերությունից հայրենադարձվել են 17 հայ զինծառայողներ, սակայն համացանցում տարածված են նաև ագրեսիայի հետևանքով գերեվարված զինծառայողների՝ ադրբեջանցի զինծառայողների կողմից արտադատական սպանությունների կադրերը, ինչը ևս մեկ անգամ փաստում է, որ ռազմագերիների թիվն առավել մեծ է և չի բացառվում, որ Ադրբեջանը հայ ռազմագերիներին սպանում, ապա ռազմական հանցագործությունը քողարկելու նպատակով հայկական կողմին փոխանցում է մարմինները՝ նրանց ներկայացնելով որպես ռազմական գործողությունների ընթացքում զոհերի։

ՀՀ քննչական կոմիտեից «Փաստինֆո»-ի գրավոր հարցմանն ի պատասխան հայտնել են, որ նոյեմբերի 28-ի դրությամբ՝ չճանաչված և չնույնականացված մարմիններ չկան, բակայն խուսափել են նշել, թե քանի մարմին է նույնականացվել։ Նշենք, որ նոյեմբերի 28-ին հայկական կողմին փոխանցված 13 զինծառայողների մարմինների նույնականացման աշխատանքներն արդեն սկսվել են։ Նշանակվել են դատաբժշկական և դատագենետիկական փորձաքննություններ։
Ինչ վերաբերում է ռազմական ագրեսիայի հետևանքով գերության մեջ հայտնված և հոկտեմբերի 4-ին հայրենադարձված զինծառայողներին, ապա ՔԿ-ից հայտնել են, որ բոլոր 17 հայ զինծառայողները ճանաչվել են տուժող։ Հայրենադարձված գերիների՝ ծառայությունը շարունակելու վերաբերյալ հարցադրմանը ՔԿ-ից չեն պատասխանել։ ՔԿ փոխանցմամբ՝ ագրեսիայի հետևանքով գերության մեջ հայտնված հայ զինծառայողների սպանության, ինչպես նաև՝ զինված ընդհարման ժամանակ կամ օկուպացված տարածքում ենթակայի կողմից նշված հանցանքի կատարումը կանխելու համար պետի, հրամանատարի, վերադասի կամ պաշտոնատար անձի կողմից իր լիազորությունների սահմաններում բոլոր հնարավոր միջոցները չձեռնարկելու՝ անգործություն դրսևորելու, փաստերով ՀՀ քրեական օրենսգրքի 137-րդ և 148-րդ հոդվածների հատկանիշներով նախաձեռնվել են քրեական վարույթներ, որոնք միացվել են ագրեսիայի փաստով նախաձեռնված վարույթին։

«Ձեռնարկվում են անհրաժեշտ քննչական և վարութային այլ գործողություններ՝ նախաքննության պատշաճ, համակողմանի և բնականոն ընթացքն ապահովելու նպատակով»,- նշել են Քննչական կոմիտեից։

Հեղինակ՝ Իզաբել Սահակյան

Աղբյուր` Փաստինֆո