Փաստ ինֆո

«Մեր հանրությունը այլեւս միատարր չէ եւ երբեւէ, երեւի, չի էլ եղել։ Կարծում եմ, որ հանրության մեջ կան կարծիքներ եւ կարող եմ հավակնել արտացոլելու նրա մի մասի կարծիքը առ այն, որ Ռուսաստանը ոչ թե մեր դարավոր բարեկամն ու դաշնակիցն է, այլ մեր դարավոր ախոյանն ու թշնամին։ Ես վստահ եմ, որ այս այցը, որը կարող է լինի, կարող է եւ չլինի, քանի որ հստակություն չկա, մի մեծ շրջան է փակելու»,- «Փաստինֆո»-ի հետ զրույցում ասաց Հայաստանի եվրոպական կուսակցության նախագահ Տիգրան Խզմալյանը՝ անդրադառնալով ՀԱՊԿ գագաթնաժողովի շրջանակում Պուտինի սպասվող այցի կապակցությամբ նախատեսվող բողոքի ակցիաներին, որոնց կազմակերպիչներից մեկն էլ Տիգրան Խզմալյանն է։

Ըստ Խզմալյանի, սա կարող է լինել ՌԴ նախագահի վերջին այցը Հայաստան։ «Պուտինն առաջին անգամ Հայաստան էր ժամանել 22-23 տարի առաջ, որը, իմ տպավորությամբ, ստուգայց էր՝ հոկտեմբերի 27-ի սպանդից առաջ, ինչը, իմ խորին համոզմամբ, ռուսական եւ տեղական հատուկ ծառայությունների համատեղ գործողություն էր, նա միայն դրանից 2 ամիս անց դարձավ ՌԴ նախագահ։ Հիմա, իմ կարծիքով , այդ արյունալի շրջանն ավարտվում է, եթե նա գա, ապա գալիս է վերջին անգամ, շուտով նա գահավիժելու է, դա անխուսափելի է, եւ ինձ թվում է, որ մեր ազգի գոնե մի մասը՝ ժողովրդավարական նկրտումներով, պետք է արժանապատվություն ունենան դահճի դեմքին ասելու, որ նա դահիճ է»,-համոզմունք է հայտնում Խզմալյանը։

Նշենք, որ Հայաստանի արեւմտամետ շրջանակները «Ո՛չ ՀԱՊԿ-ին, դուրս ՀԱՊԿ-ից» կարգախոսներով նոյեմբերի 23-ին բողոքի ցույց են նախաձեռնել Ազատության հրապարակում։ Հակառուսական ակցիաներ իրականացնելու կոչերը տարածվում են ՖԲ սոցիալական ցանցով, որոնցից մեկում, օրինակ, Տիգրան Խզմալյանը քաղաքացիներին կոչ է անում անձնագրերով գնալ իրենց գրասենյակ եւ ստանալ ԵՄ ու ԱՄՆ դրոշներ՝ Պուտինին դիմավորելու համար։

Խզմալյանը չի կարծում, թե հակառուսական ակցիաները կարող են խնդիրներ ստեղծել Հայաստանի համար, որը ՀԱՊԿ անդամ է եւ դաշնակցային, ռազմավարական հարաբերություններ ունի ՌԴ-ի հետ։ Ըստ նրա, Հայաստանի անվտանգության գլխավոր սպառնալիքը հենց Ռուսաստանն է։ «Ռուսաստանի ներկայությունը Հայաստանում եւ նրա ազդեցությունը ապահովեցին մեր աղետալի պարտությունը 2020 թվականին եւ որքան երկար է մնում Ռուսաստանը այստեղ , այնքան շարունակվելու են մեր աղետները։ Դա իմ խորին համոզմունքն է»,-պնդում է նա։

Հարցին, թե արդյո՞ք այս պնդումը կարելի է անել այն պարագայում, երբ օրինակ, արցախահայության ֆիզիկական անվտանգությունն ուղղակի պայմանավորված է ռուս խաղաղապահների ներկայությամբ, նա պատասխանում է․ «Ռուսները այնտեղ զավթիչ են եւ միայն իրենց թույլտվությամբ են Արաքսի հովտով ազերիները, թուրքերի հետ միասին հասել Շուշի, մտել Քարվաճառ, ուստի մնացած վարկածները ինձ համար համոզիչ չեն»։

Տիգրան Խզմալյանից նաեւ հետաքրքրվեցինք, թե ինչու՞ են իրենց բողոքի ակցիային միանալ ցանկացող քաղաքացիներին կոչ անում մոտենալ կուսակցության գրասենյակ անձնագրերով։ «Անձնագրերով, միայն այն պատճառով, որ ես ուզում եմ այդ դրոշները հետ ստանալ։ Կանխատեսում եմ, որ կարող են գալ մարդիկ ոչ այնքան մաքուր նպատակներով, օրինակ, գործակալներ, որոնք այդ դրոշները կհավաքեն եւ դեն կնետեն, չեն օգտագործի։ Ես ուզում եմ իմանալ, թե ով է ստանում այդ դրոշը եւ ես այն հետ եմ ուզում ստանալ»,-ի պատասխան նշեց Տիգրան Խզմալյանը։

Նա նաեւ համոզմունք հայտնեց, որ նոյեմբերի 23-ին նախատեսվող ցույցը ոստիկանության կողմից կճնշվի։ Ըստ նրա՝իրեն վերջին անգամ ձերբակալել են ՌԴ ԱԳ նախարարի այցի օրը, ուստի ինքն ավելի քաղաքակիրթ ու ավելի եվրոպական ակցիա է առաջարկում՝ որ ՀԱՊԿ շարասյուները տեսնելիս քաղաքացիները մեջքով շրջվեն եւ արհամարհանք ցուցադրեն եւ պարզեն ԵՄ դրոշները։

«Իմ պես մտածողները համարում են, որ Հայաստանի տեղը ոչ թե ՀԱՊԿ-ն է կամ ԵԱՏՄ-ն, այլ ԵՄ-ն եւ ՆԱՏՕ-ն»։

Նշենք, որ Հայաստանի եվրոպական կուսակցությունը մաս է կազմում Նիկոլ Փաշինյանի հետ արտախորհրդարանական ուժերի գործակցության ձեւաչափին։ Արդյո՞ք իրենց աշխարհաքաղաքական մոտեցումներն այդ հանդիպումներին ներկայացնում են եւ ինչպիսի՞ արձագանք են ստանում Փաշինյանից։ Տիգրան Խզմալյանն այս հարցին պատասխանեց․«Մեր առաջին իսկ հանդիպման ժամանակ ասել եմ, որ ես մասնակցում եմ մեկ օրակարգով՝ Հայաստանի եվրաինտեգրացման, որը համապարփակ խնդիր է՝ եւ՛ քաղաքական, եւ՛ տնտեսական, եւ՛ ռազմական, եւ՛ մշակութային։ Ես կարող եմ մի քանի օրինակներ բերել, Հայաստանը հիմա այլ կերպ է քվեարկում ՄԱԿ-ում եւ եվրոպական ատյաններում, այլեւս ՌԴ-ին կողմ եւ Ուկրաինային դեմ չի քվեարկում։ Սա մեր պահանջներից մեկն էր։ Երկրորդը՝ օգտագործվում են այն քաղաքական գաղափարները, որ մենք առաջարկել ենք եւ չտեսնել, դա անհնար է։ Մենք գնահատում ենք, որ մեր առաջարկների, գոնե մի մասը իրականացվում է, օրինակ, Նյու-Յորք այցից առաջ ես պնդում էի, որ Արցախի սպառնալիքը նկարագրվի որպես ցեղասպանության սպառնալիք, նա այդ խոսքը չարտասանեց ՄԱԿ-ի անվտանգության խորհրդի նիստում, բայց, եթե հիշում եք, Փաշինյանը վերջերս արտասանեց հենց դա։ Նման օրինակները քիչ չեն եւ բոլորը չեմ կարող բացահատ ասել, որովհետեւ որոշակի պայմանավորվածություններ ունենք։ Ես այդքան մռայլ չեմ նայում իրավիճակին, որովհետեւ գիտեմ, որ Հայաստանի վերաբերյալ որոշումն ընդունված է, Հայաստանը ընդունվում է որպես ժողովրդավարական երկիր»։

Տիգրան Խզմալյանը համոզված է, որ Հայաստանը ստանալու է ժողովրդավարությունից բխող բոլոր դրական հետեւանքները, այդ թվում՝ Արցախի հարցում։ Նա Ֆրանսիայի Սենատի որոշումը այդ համատեքստում է դիտարկում։ Միեւնույն ժամանակ, չի կարծում, որ Միացյալ Նահանգները, շրջանցելով հայտնի 907-րդ բանաձեւը, ռազմական օգնություն է տրամադրում Ադրբեջանին, որը օգտագործվում է, այդ թվում, Հայաստանի դեմ։ Ամերիկացի սենատոր Մենենդեսի կազմակերպած լսումներին այդ մասին հնչած հարցին, Խզմալյանի խոսքով, հստակ պատասխան է տրվել, որ օգնություն է տրամադրվում մաքսանենգության դեմ եւ, որ խոսքը հետախուզական սարքերի մասին է։

Աղբյուր` Փաստինֆո