Փաստ ինֆո

Ամերիկան 350 մլն. դոլար է հատկացրել Իրանի հարևան երկրներում հակաիրանական տրամադրություններ առաջացնելու համար։ «Փաստինֆո»-ի եթերում նման հայտարարությամբ է հանդես եկել իրանագետ, Միջին Արևելքի հարցերի փորձագետ Հարութ Արթին Առաքելյանը՝ խոսելով Իրան-Ադրբեջան լարված հարաբերությունների և տարածաշրջանային զարգացումների մասին։

Նրա խոսքերով՝ Իրան-Ադրբեջան հարաբերություններում լարվածությունը նորություն չէ, պարզապես Իրանը երկար տարիներ վարվել է իր արևելյան դիվանագիտությանը համապատասխան, այն է՝ հարևանների հետ կոմպրոմիսների գնալը և սրացումներից խուսափելը: Սակայն Ադրբեջանը ներկայումս և Արցախյան պատերազմից հետո հատկապես, տարածաշրջանում իր դիրքը ավելի է ամրապնդում՝ հայտնվելով Իրանի հանդեպ տարածաշրջանում սահմանափակումների կիրառման կիզակետում:

«Երկար տարիներ Արևմուտքը փորձում է Իրանին շրջափակել բոլոր ճանապարհներով, և վերջին կետը, որով Իրանը կարող է Ռուսաստանի և Եվրոպայի հետ հարաբերություններ ունենալ՝ Ադրբեջանն ու Հայաստանն են: Ուստի Իրանը շատ խիստ էր վերաբերվում Հայաստանի տարածքային ամբողջականության դեմ ցանկացած ոտնձգության, որը Ադրբեջանը կամ Թուրքիան կանեն»,- հավելեց իրանագետը:

Վերջին շրջանում բոլոր այն ուժերը որոնք օգնեցին Ադրբեջանին և սատարեցին Արցախյան պատերազմում՝ այժմ իրենց վճարածն են պահանջում, և Ադրբեջանին տանում են այն ուղղությամբ, որը նախատեսված էր այդ օգնության դիմաց: «Ադրբեջանը այն երկիրը չէ, որը Իրանի հանդեպ կարողանա հոխորտալ և դրա տակից դուրս գա: Այստեղ կարող ենք տեսնել Իսրայելի, Թուրքիայի ականջները, որոնք հենց այդ պատճառով էլ աջակցեցին Ադրբեջանին Արցախյան պատերազմում, որպեսզի այն տարածքները, որոնք բռնագրավվեցին Արցախից՝ հիմնականում վերաբնակեցվեն ոչ թե ադրբեջանցիներով, այլ ահաբեկիչներով և վերածվեն Իրանի դեմ աշխատող ռազմական կենտրոնների»,- նշեց բանախոսը:

Փորձագետի դիտարկմամբ՝ Արցախի վերջին պատերազմում մեծ քանակությամբ զենք և ռազմամթերք բերվեց տարածաշրջան, որ միայն Հայաստանի դեմ կռվելու համար չէր: Դա հիմնականում մեսիջ էր Իրանին, և Արևմուտքը իր ռազմավարությամբ նպատակ ունի Իրանը առանձնացնել Չինաստանից և Ռուսաստանից: Բնական է, որ այստեղ ևս Իսրայելն ու Թուրքիան են դերակատար, քանի որ Ադրբեջանին մատակարարված զենքը իսրայելական էր: Ամերիկան, անգամ վերջին իրանական ցույցերին 350 մլն. դոլար է հատկացրել Իրանի հարևան երկրներում հակաիրանական տրամադրություններ առաջացնելու համար:

«Մենք գնում ենք դեպի մեծ պատերազմ, որի պատճառը նոր աշխարհակարգի համար Ամերիկայի հետ մրցակցող ուժերն են: Այս պայքարը հիմնականում տնտեսական է: Ուստի Ամերիկան փորձում է ակտիվացնել բոլոր սառեցված հակամարտությունները: Հուսով եմ, որ Հայաստանը կկարողանա ստեղծված իրավիճակից քիչ վնասներով դուրս գալ»,- եզրափակեց իրանագետը:

Մանրամասները՝ տեսանյութում

Աղբյուր` Փաստինֆո