Փաստ ինֆո

Շուրջ 8 ամիս Ազգային ժողովի նիստերը բոյկոտելուց հետո՝ ընդդիմությունը որոշել է վերադառնալ խորհրդարան: Համենայնդեպս, «Պատիվ ունեմ» խմբակցությունն արդեն հայտարարել է իր որոշման մասին, իսկ «Հայաստան» խմբակցությունը դեռ քննարկում է:

Ընդդիմության բոյկոտի և խորհրդարան վերադառնալու վերաբերյալ «Փաստինֆո»-ն զրուցել է «Հայաստան» խմբակցության պատգամավոր Վահե Հակոբյանի հետ:

-Պարո՛ն Հակոբյան, ընդդիմությունը չի հերքում, որ պատրաստվում է վերադառնալ խորհրդարան և մասնակցել ԱԺ մեկնարկելիք նստաշրջանին, «Պատիվ ունեմ»-ի ձեր գործընկերներն արդեն, ըստ էության, հաստատել են սա: Ի՞նչ կասեք այս մասին.

-«Հայաստան» խմբակցությունը քննարկում է խորհրդարան վերադառնալ-չվերադառնալու հարցը, բայց դեռ որոշում չունենք, որոշում լինելու դեպքում կտեղեկացնենք:

 -  Եթե ամեն դեպքում ձեր խմբակցությունը որոշի վերադառնալ խորհրդարան, որը՞ կլինի  ձեր դիրքորոշումը, քանի որ կան խոսակցություններ, որ դուք անձամբ դեմ եք խորհրդարան վերադառնալուն.

 -Թույլ տվեք հիմա չպատասխանել այդ հարցին:

- Հնարավո՞ր է վայր դնեք ձեր մանդատը, մամուլը ևս սրա մասին հաճախ գրում է.

-Ոչ, անհեթեթություն է դա, չգիտեմ էլ, թե ով է տարածում նման բաներ:

- Պարո՛ն Հակոբյան, ըստ ձեզ, ի՞նչ տվեց ընդդիմության  բոյկոտը, ի՞նչ խնդիր լուծեց այն.

 -Տվեց այն, որ ինչքան էլ Նիկոլի թիմը փորձի թաքցնել, բայց ԱԺ-ում քաղաքական ճգնաժամ էր, իսկ նրանք երազում են, որ մենք վերադառնանք խորհրդարան, որ իրենք էլ հանրությանը, միջազգային  հանրությանն ասեն, թե այստեղ առողջ մթնոլորտ է: Ո՛չ, Հայաստանում այսօր առողջ մթնոլորտ չկա, չի էլ կարող լինել: Իրենց երազանքների գագաթնակետն է, որ ընդդիմությունը վերադառնա խորհրդարան, իրենք էլ ցույց տան, թե մեր քաղաքական կյանքում ամեն ինչ առողջ է, ունենք ընդդիմություն, իշխող ուժ և «բարեկեցիկ տեսքով» ապրում ենք՝ քաղաքական կյանքի մասին է խոսքը:

Մենք բոլորին ցույց տվեցինք, որ մեզ մոտ իշխանության երեք թևերը բռնագրավված են մեկ անձի կողմից, որի անունը Նիկոլ Փաշինյան է: Այս ուղղությամբ մենք շարունակում ենք ակտիվ աշխատանքը, հատկապես, միջազգային հարթակում

Մեր խնդիրը մեկն է՝ Նիկոլի հեռացումն իր խմբակով հանդերձ: Այս խնդիրը լուծված կհամարենք այն ժամանակ, երբ Նիկոլին հեռացնենք, իսկ մնացածը մասնակի լուծումներ են:

-Ընդդիմությունը մշտապես հայտարարել է, որ խորհրդարան վերադառնալու է իր սեփական օրակարգով: Եթե ամեն դեպքում վերադառնաք ԱԺ և մասնակցեք հաջորդ նստաշրջանին, ո՞րն է լինելու ձեր օրակարգը, ի՞նչ օրակարգով եք վերադառնալու:

 -Մենք դեռ սեպտեմբերին հայտարարել ենք, որ վերադառնալու ենք խորհրդարան մեր սեփական օրակարգով: Երբ վերջերս ԱԺ-ում հայտարարությունների ժամին մեր յոթ գործընկերները գնացին և հայտարարություններ արեցին, նշանակում է, որ սա մեր օրակարգն է, որոշել էինք, որ ասելու բան ունենք, մեր ընտրողների հետ զրուցելուց հետո հարցեր կային, որ պետք է բարձրաձայնեինք, գնացինք ու բարձրաձայնեցինք: Հիմա եթե կլինի  օրենքի նախագիծ, որը մենք պետք է առաջ բերենք, կգնանք, ԱԺ-ում կնստենք ու անկախ նրանից՝ քվորում կլինի թե ոչ, այդ հարցերը կբերենք առաջ: Սա է մեր օրակարգը, բացի սրանից՝միջազգային հանրության և մեր հասարակության հետ ակտիվ աշխատանք է լինելու:

Աղբյուր` Փաստինֆո