Փաստ ինֆո

Նիկոլ Փաշինյանի հայտարարության մեջ շատ վտանգավոր մեսիջ եմ տեսնում, որի միջոցով, կարծես, փորձ է արվում հանրության ականջին նստացնել, որ Արցախի ՊԲ-ն կարող է լուծարվել, ինչն էլ իր հերթին հանգեցնելու է Արցախի ամբողջական հայաթափման: «Փաստինֆո»-ի հետ զրույցում նման տեսակետ է հայտնել քաղաքագետ Արա Պողոսյանը՝ մեկնաբանելով Նիկոլ Փաշինյանի Արցախի ՊԲ-ի վերաբերյալ այսօր հնչեցրած հայտարարությունը:

Հիշեցնենք, որ Նիկոլ Փաշինյանն այսօր կառավարության նիստի ժամանակ հայտարարել էր, թե ԼՂ-ում Հայաստանի բանակ չկա.

«Լեռնային Ղարաբաղի հայության ցեղասպանության նախապատրաստության շրջանակներում է Ադրբեջանի նախագահը Հայաստանին մեղադրում Լեռնային Ղարաբաղում բանակ ունենալու մեջ: Լեռնային Ղարաբաղում Հայաստանի բանակ չկա, կա Լեռնային Ղարաբաղի պաշտպանության բանակ, որը թերևս լուրջ խոչընդոտ է ցեղասպան քաղաքականությունը կյանքի կոչելու համար: Իմ ընկալումն այն է, որ Լեռնային Ղարաբաղի հայությունը բանակ ունի միայն ու միայն ցեղասպանության ենթարկվելու վտանգի պատճառով»,-ասել է Փաշինյանը։

Նա նաև նշել էր, որ Սոչիում առաջարկել է Լեռնային Ղարաբաղի շուրջ ստեղծել ապառազմականացված գոտի, միջազգային երաշխիքներով, որի արդյունքում նման մասշտաբի պաշտպանության բանակ ունենալու կարիք Լեռնային Ղարաբաղը կարող է և չունենալ:

Քաղաքագետ Արա Պողոսյանի դիտարկմամբ՝ Փաշինյանի այս հայտարարությունը, ըստ էության, Արցախի պաշտպանության բանակի լուծարման մասին էր, իսկ Արցախի ՊԲ լուծարումը, զրուցակցի խոսքով, տանելու է Արցախի «նախիջևանացման».

«Արցախն առանց զինված ուժերի Նախիջևան կդառնա, որտեղ հայի գոյությունը վտանգված է լինելու: Եթե չկա ռազմական ուժ, որը կերաշխավորի արցախահայության անվտանգությունը, ապա այնտեղ ապրելն անհնար կդառա, ինչքան էլ ուզում ասա, թե դա ապառազմականացված գոտի է, իսկ ո՞վ է երաշխավորելու մարդկանց կյանքը և ազատությանը: Շատ վատատեսական սցենար է, բայց կարծում եմ նրա հայտարարության մեսիջը սա էր, եթե նա նույնիսկ չի գիտակցում»,-ասաց Արա Պողոսյանը և հավելեց, որ Արցախի պաշտպանության բանակի լուծարման մասին նույնիսկ ակնարկը թշնամական հայտարարություն է, որովհետև այն արցախահայության գոյության համար մեկ երաշխավորն է:

Քաղաքագետը, միևնույն ժամանակ, չի բացառում, որ նոր «նոյեմբերի 9-ի հայտարարություն» կնքվի, որի դեպքում արդեն հղում արվի ՊԲ-ի լուծարմանը:

Մեր դիտարկմանը՝ այն դեպքում, երբ Ադրբեջանն ամեն օր զինում է իր բանակը, իր սպառազինությունն է ավելացնում, ինչպե՞ս է հայկական կողմը խոսում Արցախի ՊԲ լուծարման մասին, կամ ինչո՞ւ մենք նույնը չենք պահանջում Ադրբեջանի բանակի դեպքում, Արա Պողոսյանը նշեց, որ, նոյեմբերի 9-ից հետո իրավիճակը փոխվել է, ուժերի հարաբերակցությունը խախտվել է, ուստի Հայաստանը չի կարող պահանջել թեկուզ Արցախի հատվածում ադրբեջանական բանակի զինաթափում կամ դուրսբերում:

Նիկոլ Փաշինյանը թեև գրեթե ամեն օր խոսում է Ադրբեջանի հետ «խաղաղության պայմանագիր» կնքելու մասին, անգամ ժամկետ է նշում՝ մինչև տարեվերջ, այսօր կառավարության նիստի ժամանակ հայտարարեց, որ «Ալիևը ոչ միայն սպառնում է, այլ նախապատրաստում է Լեռնային Ղարաբաղի հայության ցեղասպանություն»:

Անդրադառնալով Նիկոլ Փաշինյանի այս հայտարարությանը՝ Արա Պողոսյանը նշեց՝ էլեմենտար անմեղսունակություն է, երբ մի կողմից խոսում է ցեղասպանության վտանգի, մյուս կողմից էլ անվտանգային ինչ-որ երաշխիքների մասին.

«Ես զարմանում եմ, որ նոր են հասկանում սա, երբ սրա մասին մենք խոսում ենք՝ նոյեմբերի 9-ից սկսած:

Ցավում եմ, որ կա մեկը, ով հավատում է՝թե խաղաղություն է լինելու, մենք մեր մաշկի վրա ենք զգալու դրա դառը պտուղները: Խաղաղություն երբեք չի լինի այնպիսի պետությունների միջև, որոնց ուժերի բալանսը խախտված է, այս դեպքում կողմերից մեկը միշտ գերակա դիրքում է լինելու և փորձելու է թույլից պոկել ամեն ինչ՝ այդ թվում՝ պետականությունը, որևէ մեկը թող չկասկածի, որ Ադրբեջանը սրան գնալու է»,-ասաց նա:

Քաղաքագետը շեշտում է՝ նախքան խաղաղության գնալը՝ կողմերը պետք է նախ պայմանավորվեն կրակի դադարեցման շուրջ.

«Չի կարող խաղաղության մասին քննարկում լինել՝ իրար վրա կրակելուն զուգահեռ, սա նաև ինդիկատոր է, որ խաղաղություն չի լինելու անգամ խաղաղության պայմանագիր կնքելուց հետո»:

Աղբյուր` Փաստինֆո