Փաստ ինֆո

Դատավորների միության նախագահի և փոխնախագահի ընտրության կարգը տեղի է ունենում դատավորների ընդհանուր ժողովում, իսկ ընդհանուր ժողովի աննախադեպ բարձր մակարդակը, Ալեքսանդր Ազարյանի ստացած ձայների քանակը ևս վկայում է այն մասին, որ նա ունի բարձր լեգիտիմություն։ Այս մասին լրագրողների հետ զրույցում ասաց Երևանի ընդհանուր իրավասության դատարանի դատավոր, Դատավորների միության փոխնախագահ Արթուր Ստեփանյանը՝ չհամաձայնելով պնդումներին, որ Դատավորների միությունը դատական համակարգում որևէ ընդդիմադիր պատնեշի է հանդիպում։

Ինչ վերաբերում է ԲԴԽ հետ հարաբերություններին, դատավորը նշեց, որ որպես այդպիսին հարաբերություններ չկան, բայց եղել է, երբ Ալեքսանդր Ազարյանը դիմել է ԲԴԽ-ին, կատարեցին որոշակի գործողություններ, հայտարարությամբ հանդես եկավ, ուղղակի հասկանալի չէր՝ դա հայտարարության արձագանքն էր, թե սեփական նախաձեռնությամբ։

Լրագրողի դիտարկմանը, որ դատավորների, որոնց մասին ԶԼՄ-ները գրում են, որ վերջիններս իշխանահաճո են, պատվերներ են կատարում, նրանց և Դատավորների միության միջև բախումներ են լինում, դատավոր Արուսյակ Ալեքսանյանը նաև հեռացել է Միությունից, Ստեփանյանբ արձագանքեց՝ նշելով. «Դատական իշխանությունում, այդ թվում, Դատավորների միությունում դիմություն-ընդդիմություն չկա, մի դատավորների համայնք է, բնական է, որ յուրաքանչյուրս կարող ենք ունենալ տարբեր կարծիքներ, առավել ևս, դատավորները, քանի որ դատավորներն ամեն օր իրականացնում են արդարադատություն, հասարակ քաղաքացիական գործերով ես կարող եմ մի մոտեցում կարող եմ ունենալ, մյուս դատավորը՝ մեկ այլ, բայց դա չի նշանակում ընդդիմանալ։ Արուսյակ Ալեքսանյանը դիմումը գրեց՝ հեռացավ, դա իր ցանկությունն էր, որովհետև անդամակցելը և հեռանալը ցանկությամբ է»։ Դատավորը զերծ մնաց մեկնաբանելուց Արուսյակ Ալեքսանյանի նկատմամբ քրեական հետապնդմանը։

Ինչ վերաբերում է ԲԴԽ անդամ Գրիգոր Բեքմեզյանի հրաժարականին, նրա հայտարարություններին և բարձրացված խնդիրների մասին, Ստեփանյանը նշեց, որ Դատավորների միությունը հետևել է ԲԴԽ նախկին անդամ Գրիգոր Բեքմեզյանի հայտարարություններին, իսկ թե ինչ է պատրաստվում անել միությունը՝ այս պահին դատավորը զերծ մնաց բարձրաձայնելուց՝ նշելով, որ դեռևս պետք է քննարկվի։

Աղբյուր` Փաստինֆո