Փաստ ինֆո

Սոչիի հանդիպումը հայկական կողմի հերթական պարտությունն էր՝ արդեն ռուսական հովանու ներքո անցկացվող բանակցություններում. այդ հանդիպմանը հայկական կողմի շահերը ներկայացնող չկար: «Փաստինֆո»-ի հետ զրույցում հայտարել է քաղաքագետ Էդգար Էլբակյանը՝ անդրադառնալով հոկտեմբերի 31-ին Սոչիում կայացած Փաշինյան-Պուտին-Ալիև հանդիպմանը:

Ամփոփելով հանդիպման արդյունքները՝ քաղաքագետն արձանագրում է՝Սոչիի հանդիպման արդյունքում Ռուսաստանին հաջողվեց Հարավային Կովկասում պահպանել իր դիվանագիտական ներկայությունը, Ադրբեջանը ստացավ այն, որ հանդիպման արդյունքում ընդունված հայտարարության մեջ Արցախի մասին նույնիսկ տեղանվանական հիշատակում չեղավ, ինչը համահունչ է իրենց պետական շահին, իսկ Հայաստանը ոչինչ չշահեց, ընդհակառակը՝ տուժեց, քանի որ, ըստ նրա, Հայաստանի շահը ներկայացնող կողմ չկար:

Սոչիի հանդիպումից առաջ Արցախի Հանրապետության ԱԺ-ն հրավիրել էր արտահերթ նիստ, ինչին զուգահեռ Ստեփանակերտում տեղի էր ունեցել բազմահազարանոց հանրահավաք, որի ժամանակ՝ հստակ պահանջ ներկայացվեց առ այն, որ Հայաստանի Հանրապետության ո՛չ մի իշխանություն իրավունք չունի հրաժարվել Արցախի ժողովրդի անվտանգությունն ապահովելու առաքելությունից կամ ընդունելի համարել որևէ փաստաթուղթ, որտեղ ինքնիշխան Արցախի Հանրապետության գոյությունը կասկածի տակ կդրվի։

Ամրագրելով, որ Արցախը երբեք չի եղել և չի լինելու անկախ Ադրբեջանի կազմում՝ Արցախից հայտարարեցին, որ Արցախն Ադրբեջանին բռնակցելու ցանկացած փորձ կհանդիսանա միջազգային իրավունքի կոպտագույն խախտում և հայ ժողովրդի նոր ցեղասպանության իրագործման պաշտոնական արտոնագիր, հետևաբար նման բովանդակությամբ փաստաթղթերը Արցախի Հանրապետության համար անընդունելի են։

«Պահանջում ենք Հայաստանի Հանրապետության իշխանություններից՝ միջազգային հարթակներում հանդես գալ հայկական երկու հանրապետությունների միասնական շահերը պաշտպանելու դիրքերից՝ հիմք ընդունելով առկա հիմնարար փաստաթղթերը, մասնավորապես՝ Հայաստանի Հանրապետության Անկախության հռչակագիրը և Գերագույն խորհրդի 1992 թվականի հուլիսի 8-ի պատմական որոշումը», - նշված է ԱԺ -ի ընդունած հայտարարության մեջ, որը հրապարակվեց հանրահավաքի ժամանակ։

Ի պաշտպանություն Արցախից հնչեցված պահանջների՝ նոյեմբերի 5-ին «Դիմադրության » շարժումը հանրահավաք է հրավիրել Երեւանում:

Թե ի՞նչ ակնկալիքներ կան այս հանրահավաքից և այս պահին ի՞նչ խնդիր կարող է լուծել այն՝ Էդգար Էլբակյանն ասաց.

«Մենք ունենք ուղղակի և անուղղակի վկայություններ, որ Տավուշից, Արարատից հողերի հանձնումը, միջանցքի տրամադրումը կանխվել են «Դիմադրության շարժման» շնորհիվ, սրա մասին ինչպես վերլուծական աշխատանքի արդյունքում արված եզրակացություներն են վկայում, այնպես էլ՝ թշնամիները խոստովանությունները: Մենք կարող ենք կրկնել սա և առկախել այս սպասվող կապիտուլացիան, բոլորին ցույց տալ, որ Հայաստանում կա իրական քաղաքական ինքնություն, որը ներկայացված չէ պետական մակարդակով»,-ասաց նա:

Մանրամասները՝ տեսանյութում

Աղբյուր` Փաստինֆո