Փաստ ինֆո

Փաստացի, աշխարհն Արցախը ճանաչել է անկախ պետություն, ես հերքում եմ, թե միջազգային հանրությունը Ադրբեջանի մաս է դիտարկել Արցախը: Դա Ադրբեջանի բարեկամ երկրները, առաջինը՝ Թուրքիան է ճանաչել, մյուսների պարագայում չի կարելի ասել, թե Արցախը ճանաչել են Ադրբեջանի կազմում: «Փաստինֆո»-ի հետ զրույցում հայտարարել է քաղաքագետ Արթուր Ղազարյանը՝ հակադարձելով Նիկոլ Փաշինյանի այն պնդումներին, թե միջազգային հանրությունը, բոլոր պետությունները, առանց բացառության, Արցախը համարում են Ադրբեջանի մաս:

Փաշինյանը նման հայտարարությունն է արել այսօր՝ ՔՊ համագումարի ժամանակ. «Եթե աշխարհում կա երկիր, որը Ղարաբաղը չի համարում Ադրբեջանի մաս, թող այդ մասին հրապարակային արտահայտվի, որևէ մեկը թող տպավորություն չստեղծի, թե իրավիճակն այլ է», - ասել է նա:

Քաղաքագետ Արթուր Ղազարյանը մեզ հետ զրույցում հակադարձում է Փաշինյանին՝ շեշտելով, որ դե ֆակտո Արցախը ոչ միայն ճանաչված է եղել, այլ նաև իր պետական ատրիբուտներով անկախ պետություն է եղել:

«ԱՄՆ-ն ևս ճանաչել է Արցախի գոյության փաստը, երբ որպես օգնություն գումար էր տրամադրում, կարող էր չէ՞ տրամադրել, օրինակ՝ Ադրբեջանին կամ Հայաստանին, բայց Արցախին առանձին է ուղարկել օգնություն, այսինքն, փաստացի, ճանաչել է Արցախը»,-նկատում է Արթուր Ղազարյանը:

Բացի սա՝ քաղաքագետը հիշեցնում է, որ ընդամենը երկու օր առաջ ՌԴ նախագահ Վլադիմիր Պուտինը լրիվ հակառակն էր ասում՝ ակնարկելով, որ ժամանակին ազատագրված շրջաններից 5-ը զիջելու պարագայում՝ կարելի էր Արցախի կարգավիճակի հարցը լուծել և Արցախին կարգավիճակ տալ.

«Պուտինի մտքերը հակասում են Փաշինյանի հայտարարություններին, չես հասկանում՝ ով է ճիշտ, բայց, ամեն դեպքում, չեմ կարծում, որ ճիշտ է մտածել, թե բոլոր երկրները Արցախը ճանաչում են Ադրբեջանի կազմում»,-ասաց Արթուր Ղազարյանը:

Մեր դիտարկմանը, ինչպե՞ս է ստացվում, որ նույն Ալիևը տարիներ առաջ դժգոհում էր, որ փակ դռների հետևում իրեն ստիպում ենճ անաչել Արցախը, իսկ հիմա Փաշինյանը լրիվ հակառակն է ասում՝ քաղաքագետն արձագանքեց ՝ այս տարիների ընթացքում առաջին հերթին դիվանագիտական լուրջ աշխատանք չի տարվել, ուստի մեր բանակցային դիրքերը թուլացել են, երկրորդ՝ հայ հասարակությունը պատրաստ չի եղել միասնական ճակատով հանդես գալ՝ թշնամական տրամադրությունների և անգամ պատերազմի դեմ.

«Սխալը սխալի հետևից թույլ տվեցինք, արդյունքում ունեցանք այն, ինչ ունենք, այսօր եղածն էլ հարցականի տակ է դրված արդեն»,-հավելեց զրուցակիցը։

Հարցին՝ այս պահին հավանական համարո՞ւմ է, որ բանակցությունների միջոցով հայկական կողմին հաջողվի Արցախի կարգավիճակի հարցը կրկին բանակցային սեղան բերել, քաղաքագետը նշեց՝ ոչինչ բացառված չէ, անհնար ոչինչ չկա, ռեսուրս միշտ էլ կգտնվի, սակայն ժամանակը հօգուտ մեզ չի աշխատում.

«Սրան զուգահեռ վարչապետն է փորձում գործընթացն արագացնել, ասում է՝ մինչև տարվա վերջ փորձում եմ խաղաղության համաձայնագիր կնքել: Այս պահին մեր և արցախահայության շահերից չի բխում սա, ուստի փաստաթղթի ստորագրումը ավելի կբարդացնի իրավիճակը, արցախահայությունն անելանելի իրավիճակում կհայտնվի»,-ասաց նա:

ՔՊ համագումարի ընթացքում Նիկոլ Փաշինյանը նաև անդրադարձել է ճանապարհների ապաշրջափակման թեմային: Նա մի կողմից խնդրահարույց է համարել, որ Հայաստանի և Ադրբեջանի քաղաքացիները սահման հատելիս առերեսվեն հայ կամ ադրբեջանցի սահմանապահների, մաքսավորների հետ, մյուս կողմից էլ նշել է, թե Ադրբեջանը այդ ճանապարհների օպերատորությունը կարող է հանձնել ում ուզում է, անգամ՝ Թուրքիային.

«Մենք ասում ենք էս գլխից, որ պատրաստ ենք այդ օպերատորությունը պատվիրակել Ռուսաստանի սահմանապահ զորքերին: Ադրբեջանը կարող է պատվիրակել ում ուզում է, օրինակ՝ Թուրքիային»,- հայտարարել է Նիկոլ Փաշինյանը:

Քաղաքագետը անհասկանալի է համարում՝ ի՞նչ տարբերություն՝ սահմանապահը ադրբեջանցի կլինի, թե՝ թուրք.

«Ինձ համար, որպես հայ մարդ, տարբերություն չկա՝ Ադրբեջան, թե Թուրքիա: Դեռևս մեր երեխաների արյունը թաց է, կորուստները շատ են, ազգովի դեպրեսիոն վիճակում ենք, այս դեպքում թշնամական վերաբերունքը ադրբեջանցու կամ թուրքի նկատմամբ թարմ է, տարբերություն չկա, սահմանապահը թուրք կլինի, թե՝ ադրբեջանցի»,-ասաց Արթուր Ղազարյանը:

Աղբյուր` Փաստինֆո