Փաստ ինֆո

«Ռուսաստանի հնարավորություններն արդեն ավելի հարաճուն են դառնում, ինչը հանարավորություն է տալիս Կրեմլին առավել կտրուկ արձագանքել զարգացումներին Անդրկովկասում: Երկրորդ, ինձ մոտ այնպիսի տպավորություն է, որ հավաքական Արեւմուտքը հնարավորին ու անհնարին ջանքերը գործադրում է՝ պոկելու Հայաստանը Ռուսաստանից»- «Փաստինֆո»-ի հետ զրույցում այս մասին ասաց ռազմական փորձագետ Դավիթ Ջամալյանը՝ անդրադառնալով Հայաստանի սահմանին ԵՄ քաղաքացիական առաքելության ֆոնին ռուսական ակտիվությանը եւ մասնավորապես, Մարիա Զախարովայի հայտարարությանը, թե նախատեսվում է ՀԱՊԿ հավաքական անվտանգության խորհրդի արտահերթ նիստ գումարել եւ քննարկել Հայաստանին տրամադրվելիք աջակցության հարցը:

Միեւնույն ժամանակ, ռազմական փորձագետը նկատում է, որ գործադրվող ջանքերով ու շտապողականությամբ հանդերձ, Արեւմուտքը շատ անկեղծ է: «Կոնգրեսականներն եկան ու ասացին, որ Արցախը պետք է մնա Ադրբեջանի կազմում, Տոյվո Կլաարը հայտարարում է, թե պետք է լուրջ քննարկել Արցախի հայության իրավունքների հարցը եւ այլն: Մենք պետք է ֆիքսենք հետեւյալը՝ հավաքական Արեւմուտքի դիրքորոշումն այն է, որ Արցախը պետք է լինի Ադրբեջանի կազմում, ավելին, շարունակություն կա՝ Սյունիքն էլ պետք է լինի կամ Ադրբեջանի կազմում կամ նվազագույնը, Սյունիքի կոմունիկացիաները պետք է միջանցքի տրամաբանությամբ գործեն, պարզապես, այդ երկրորդ հատվածը բացահայտ չեն հասում՝ հասկանալով, որ պատերազմի սթրեսի մեջ ժողովրդին չի կարելի մատուցել այդ ամբողջ հակահայկականության ծավալը»:

Ջամալյանի խոսքով, ԵՄ առաքելությունը գրոշի արժեք, իրականում, չի կարող ունենալ, որովհետեւ, լավագույն դեպքում այն կարող է զեկույց հրապարակել, որի վրա Ադրբեջանը թքած ունի: Ինչ վերաբերում է Ադրբեջանի դիրքորոշմանը եւ փաստին, որ նա հրաժարվել է իր սահմանին տեղակայել ԵՄ դիտորդներին, Ջամալյանի խոսքով վկայում է նաեւ այն մասին, որ Ադրբեջանը, մի կողմից չի ցանկանում հարաբերությունները փչացնել ՌԴ-ի հետ, մյուս կողմից էլ՝ Բաքվում հասկանում են, որ այդ ամենը հայ հասարակությանը մոլորեցնելու համար է, իսկ իրականում արեւմտյան դիրքորոշումը պրոադրբեջանական է:

«Դա ընդամենը արվում է հայ հասարակությանը արեւմտամետ դարձնելու եւ մոլորեցնելու համար: ԻՆչ վերաբերում է ռուս-իրանական հակազդեցությանը, ապա այն օրինաչափ է եւ ավելի հարաճուն է դառնալու: Առողջ հայրենասիրական ուժերը պետք է հստակ դնեն հարցը, որ Արցախը չպետք է լինի Ադրբեջանի կազմում: Այդ դիրքորոշումը համահունչ է տարածաշրջանում դաշնակից Ռուսաստանի եւ բարեկամ Իրանի հեռահար շահին: Թուլացած Հայաստանի պարագայում Արցախի հայապատկանության երաշխավորը դաշնակից Ռուսաստանն ու բարեկամ Իրանն են, ավելին, թուլացած Հայաստանի ռեսուրսների վերականգնման երաշխիքը նրանց հետ հարաբերությունների խորացումն է»,- կարծում է Ջամալյանը:

Հարցին, թե արդյո՞ք, սառույցը, այսպես ասած հալեցնում է գործող իշխանությունը՝ Իրանից ԱԹՍ-ների գնման հայտով, ռազմական փորձագետ պատասխանեց. «Մինչեւ առաջին իրանական ԱԹՍ-ը չպայթի ադրբեջանական մի հենակետի վրա, ես չեմ հավատա, թեեւ, սկզբունքորեն չեմ բացառում, որ բարեկամ եւ դաշնակից երկրների ճնշման ներքո նիկոլական իշխանությունը գնա ինչ-որ քայլերի, բայց մինչեւ այդ ԱԹՍ-ները գործնական կիրառում չստանան, ես չեմ հավատա, որովհետեւ, տրամաբանական հարց է առաջանում, թե ինչու չէր նախկինում դա արվում: Այսուհանդերձ, եթե այդ քայլն արվել է, շատ լավ է, դա մեր զինվորների կյանքին է առնչվում»:

Ամփոփելով Ջամալյանը եւս մեկ անգամ շեշտեց, որ ՌԴ-ն ավելի ինտենսիվ է հետեւում զարգացումներին, ավելի կտրուկ է ընդգծում իր տեղն ու դերը ռեգիոնում եւ հաշվի առնելով բարեկամ Իրանի աննախադեպ հայամետ դիրքորոշումը, պետք է հետեւյալ եզրակացությունն անենք. «Իշխանափոխությունից հետո կա Հայաստանի Հանրապետության պետականության վերականգնման լրջագույն աշխարհաքաղաքական ռեսուրս, որը պետք է խելամիտ օգտագործել: Այդ դեպքում մենք կունենանք հայապատկան Արցախ՝ իր նախկին սահմաններով եւ գուցե շատ ավելի մեծ հաջողություններ, որոնց մասին հիմա խոսելը, գուցե անիրական թվա»:

Աղբյուր` Փաստինֆո