Փաստ ինֆո

Հայաստանի վրա Ադրբեջանի վերջին հարձակումը 36-ամյա Գևորգ Ստամբոլցյանին թույլ չտվեց տեսնել երրորդ զավակին: Սեպտեմբերի 13-ի լուսադեմին թշնամու անօդաչու թռչող սարքի հարվածից Գևորգը զոհվում է՝ հասցնելով միայն կնոջից խոստում ստանալ, որ հանուն երեխաների պետք է պինդ մնա:

«Սեպտեմբերի 13-ի լուսադեմին՝ ժամը 4:45 զանգել է տուն, կնոջը հրաժեշտի խոսքեր ասել ու դրել: Ասել է՝ թուրքերը լցվում են, էլ չենք կարող դիմադրել: Դե, քանի որ քույրս հղի է, ասել է՝ ինչ էլ լինի, հանուն ձեզ ու երեխու, ձեզ լավ կնայեք»,-«Փաստինֆո»-ին պատմում է Գևորգի կնոջ եղբայրը՝ Մխիթար Հակոբյանը:

Գևորգենց դիրքից, Մխիթարի խոսքով, ոչ ոք ողջ չի մնացել: Տղաները, սակայն, մոտ 5 ժամ կատաղի մարտ են վարել: Դիրքի անձնակազմի մղած մարտի մասին Մխիթարն ու հարազատները հետո են իմացել՝ ադրբեջանցիների՝ համացանցում դրած տեսանյութից:

«Թշնամու դրած տեսանյութում երևում էր, թե ինչպես է ԱԹՍ-ն հարվածում դիրքին: Մինչ այդ տղաները շրջանաձև պաշտպանության էին անցել: Ոչ ոք ողջ չի մնացել…»,-ասում է մեր զրուցակիցը:

Մխիթարը, ինչպես և քրոջ ընտանիքը, Սոթքից են: Նրա խոսքով՝ Շորժայի ուղղությամբ հարձակումն սկսել է կեսգիշերից շուտ:
«Ժամը 00:05-ն չկար, որ այդ հատվածում պայծառ լուսավորություն էր երևում: Ճիշտ է, պայթյունի ձայները դեռ չէին լսվում, բայց պահ առ պահ ուժեղ լուսավորություն էր նկատվում, որը մեր տնից պարզ տեսնում էինք: Հասկացել էինք, որ մի բան է կատարվում»,-հիշում է Մխիթարը:

Գևորգի մարմինը բավականին ուշ ու մեծ դժվարությամբ են գտել: Հարազատները վերջնականապես հոկտեմբերի 31-ին են համոզվել, որ Վանաձորի դիահերձարանից Մարտունի փոխանցված դիակը Գևորգինն է:

«Շորերով ու բոթասներով ենք ճանաչել: Մարտունի էին ուղարկել, բայց չգիտեին՝ ով է, դեռ չէր նույնականացվել: Ես հագուստով գտա իրեն, բայց որպեսզի լրիվ վստահ լինեինք, որ չենք սխալվում, ԴՆԹ էլ է արվել ու նույնականացվել է…»,-ասում է Մխիթարը:

Գևորգի մարմինը, մեր զրուցակցի պատմելով, անճանաչելի էր. Ադրբեջանն այն հայկական կողմին էր փոխանցել սեպտեմբերի 20-ին՝ 95 մարմինների թվում:

36-ամյա Գևորգ Ստամբոլցյանը պայմանագրային զինծառայող էր. հայկական բանակում ծառայում էր ավելի քան 15 տարի: Մխիթարի խոսքով, ով կնոջ եղբայրը լինելուց առաջ Գևորգի մտերիմ ընկերն էր, ծառայությանը նվիրված զինվորական էր:

Ջերմուկում զոհված 19-ամյա Կարենը թառահար էր.սովորում էր 4-րդ կուրսում, սակայն հրաժարվել էր տարկետման հնարավորությունից ու հենց իր դիմումի հիման վրա էլ բարձրացել դիրքեր

Ծանր վիրավոր 19-ամյա ժամկետայինը ծառայակից ընկերներին ստիպել է իրեն թողնել ու փրկվել. նրա մարմինն Ադրբեջանը փոխանցել է մեկ շաբաթ անց՝ անճանաչելի վիճակում

Աղբյուր` Փաստինֆո