Փաստ ինֆո

Ադրբեջանը, Հայաստանի իշխանությունների անգործության և միջազգային հանրության լռության ու գազային էյֆորիայի ներքո, շարունակում է իր հերթական վայրագությունները և մեր զինվորների խոշտանգումը:

«Փաստինֆո»-ի հետ զրույցում հայտարարել է ԱԺ Մարդու իրավունքների պաշտպանության և հանրային հարցերի մշտական հանձնաժողովի նախկին նախագահ Նաիրա Զոհրաբյանը՝ անդրադառնալով երեկ տելեգրամյան ալիքներում տարածված հայ գերիների խոշտանգման հերթական տեսանյութին:

Նաիրա Զոհրաբյանը շեշտում է՝ Ադրբեջանը րոպե առաջ պետք է դատապարտվի որպես ռազմական հանցագործ, բայց այսօր Հայաստանը միայնակ է մնացել՝ ՀՀ իշխանությունների վարած ապաշնորհ քաղաքականության արդյունքում.

«Այսօր Հայաստանի խորհրդարանը, իշխանությունը և ընդդիմությունը միասին, զրո արդյունավետությամբ են աշխատում, ընդհանրապես չեն աշխատում միջազգային կառույցների հետ: Մենք տեսնում ենք, որ ՀՀ իշխանությունը՝ ի դեմս Նիկոլ Փաշինյանի, այսօր ընդամենը մեկ խնդիր ունի՝ րոպե առաջ բավարարել թուրք-ադրբեջանական տանդեմի օրակարգը և ստորագրել Հայաստանի կապիտուլյացիայի, այն է՝ ֆեյք «խաղաղության օրակարգը»:

Մեզ հետ զրույցում Զոհրաբյանը վստահեցրեց, որ Ադրբեջանը շարունակել և շարունակելու է իր վայրագությունները, քանի դեռ մեր բանակցողը Նիկոլ Փաշինյանն է.

«Ես վստահեցնում եմ՝ «խաղաղության պայմանագրից» հետո նոր դուռ է բացվելու լայնամասշտաբ պատերազմի համար, քանի որ Ալիև-Էրդողան զույգի համար պատմական հնարավորություն է ստեղծվել՝ հասնելու իրենց նպատակներին»,-ասաց Զոհրաբյանը:
ԱԺ նախկին պատգամավորը շեշտում է՝ ո՛չ իշխանությունը, ո՛չ էլ ընդդիմությունը ոչինչ չեն անում՝ Ադրբեջանի վայրագությունները կանխելու և դրանք միջազգային հանրությանը ցույց տալու համար.

«Եթե օգտագործեին ողջ գործիքակազմը, մենք հիմա պետք է տեսնեինք մեր խորհրդարանի պատգամավորներին եվրոպական տարբեր երկրներում ոչ թե կրուիզներ անելիս, այլ՝ օրինակ ՄԱԿ-ի, ԵԽԽՎ-ի դիմաց հացադուլ անելիս, և ոչ միայն իշխանական, այլ նաև ընդդիմադիր պատգամավորներին: Իսկ ի՞նչ է անում ընդդիմությունը՝ նիստերին չի գնում, փողոցում չի պայքարում, բայց գործուղումների , չգիտես ինչու, ՔՊ-ական պատգամավորների հետ վազելով գնում է, եթե իրենց թվում է, որ ժողովուրդն այս ամենը չի տեսնում և սրա գնահատականը չի տալու, խորապես սխալվում են»,-ասաց Զոհրաբյանը:
Ինչ վերաբերում է միջազգային հանրությանը, ապա Զոհրաբյանի տպավորությամբ՝ միջազգային հանրությունը անգամ չի էլ փորձում կանխել Ադրբեջանի վայրագությունները,

«ԵՄ առաջին դեմքերը, բացի իրենց դոշին ՀՀ դրոշը փակցնելուց և իրենց լանչի ժամանակ Եվրոպառլամենտի բուֆետ դիմաց ակցիա անելուց ՝ այլ պատժիչ գործիքակազմ չեն կիրառում, ավելին՝ ԵՄ առաջին դեմքերը հայտարարել են, որ որևէ գազային պայմանագիր Ադրբեջանի հետ չեն չեղարկելու, որևէ սանկցիա չեն կիրառելու, իսկ Ադրբեջանը շատ լավ գիտի, որ ԵՄ-ն և Արևմուտքը կախված են իր գազային ասեղից, ուստի Ալիևը շարունակելու է ռազմական հանցագործությունները»,-ասաց ԱԺ նախկին պատգամավորը:

Աղբյուր` Փաստինֆո