Փաստ ինֆո

ՀՀ ինքնիշխան տարածքի նկատմամբ սեպտեմբերի 13-ի ադրբեջանական ագրեսիայի հետևանքով Գորիս խոշորացված համայնքի բնակավայրերը մեծ վնասներ են կրել:
«Փաստինֆո»-ի հետ զրույցում Գորիս համայնքի ղեկավարի տեղակալ Իրինա Յոլյանը հայտնեց, որ թշնամու կրակոցների հետևանքով շուրջ 5 բնակելի տուն է վնասվել, 4-ը՝ Վերիշենում, 1-ը՝ Ակներում: Ուրբաթ օրվա դրությամբ՝ այդ բնակարանների տերերը փոխհատուցում ստացել են՝ մարզպետարանի միջոցով:

Լուրջ վնասներ են կրել Խնձորեսկ և Ներքին Խնձորեսկ բնակավայրերի ֆերմերները:

Իշխանասարի հատվածից էլ մոտ 8000 գլուխ մանր եղջերավոր անասուն է հափշտակել թշնամին.

«Մեր ֆերմերները այդ հատվածում են հիմնականում արածեցնում, ռմբակոծության ժամանակ թշնամին հափշտակել է նրանց անասունները: Շարժական տնակներ են եղել նաև, որոնք ֆերմերների գիշերակացի համար են նախատեսված եղել, բայց պատերազմից հետո ստիպված հետ են քաշվել այդտեղից»,-ասաց Իրինա Յոլյանը:

Նրա հաղորդմամբ՝ բացի մանր եղջերավոր անասուններից՝ թշնամին հափշտակել է 17 ձի, ինչպես նաև ավտոմեքենաներ.

«Բոլոր վնասները ու կորուստները հաշվարկվել են, քարտեզագրվել են, ուղարկվել են կառավարություն և մարզպետարան, որպեսզի հնարավոր միջոցներ ձեռնարկվեն՝ վնասները փոխհատուցելու համար»-ասաց Յոլյանը:

Նկատենք, որ Հայաստանի դատախազաքննչական մարմիններն այս պահի դրությամբ անհետեւանք են թողել ադրբեջանցիների կողմից հայ գյուղացիների գույքի հափշտակության դեհքերը։ ՀՀ դատախազությունից «Փաստինֆո»-ի գրավոր հարցմանն ի պատասխան հայտնել են, թե հափշտակությունների վերաբերյալ տվյալներ չեն ստացել։

Ի դեպ, հափշտակությունների վերաբերյալ «Փաստինֆո»-ին ավելի վաղ հայտնել էր նաեւ Սյունիքի մարզպետի տեղակալը, բայց դատախազության համար տեղական ինքնակառավարման մարմինների հայտարարություններկ, փաստորեն, «տվյալներ» չեն։

Աղբյուր` Փաստինֆո