Փաստ ինֆո

«Չկրակելու մի երաշխիք կա, երբ հակառակորդը իմանա, որ ավելի ուժեղ պատասխան է ստանալու, մնացածը հեքիաթների ու երազանքների դաշտից է՝ անկախ նրանից, թե որ պետությունը ինչ երաշխիք է տալիս, որովհետեւ թուրքին ու ադրբեջանցուն կանգնեցնելու միակ ձեւը ուժի ցուցադրությունն է, նրանք իրենց էությամբ ուժապաշտ ժողովուրդներ են եւ ծնկի են գալիս միայն ուժի առաջ»,- «Փաստինֆո»-ի հետ զրույցում նման կարծիք հայտնեց ռազմական փորձագետ Հայկ Նահապետյանը՝ անդրադառնալով Պրահայի հանդիպման արդյունքներով ձեռք բերված պայմանավորվածությանն առ այն, որ Ադրբեջանի հետ սահմանի երկայնքով ԵՄ քաղաքացիական առաքելություն պետք է տեղակայվի:

Հայկ Նահապետյանի խոսքով, թեեւ տարածված հայտարարության մեջ նշվում է քաղաքացիական առաքելության մասին, բաց դա իրականում բառախաղ է, որովհետեւ պարզից էլ պարզ է, որ առաջին քայլը սովորաբար լինում են դիտորդական խմբերը, հետո խաղաղապահ ստորաբաժանումները՝ ՄԱԿ-ի դրոշի ներքո, որը ոչ այլ ինչ է, քան ՆԱՏՕ-ի անդամ երկրների ԶՈՒ-երի ստորաբաժանումը:

«ԱՄՆ-ի եւ ՆԱՏՕ-ի նպատակը Ռուսաստանի հարավային թեւում ՆԱՏՕ-ի զորակազմ բերելն է: Եթե մեր ռազմավարական դաշնակիցը, որը նաեւ մեր անվտանգության երաշխավորն է ու պատերազմում է հավաքական Արեւմուտքի ու ՆԱՏՕ-ի դեմ, ինչի մասին այդ երկրի նախագահն ու ՊՆ-ն են ասում, իսկ նրա դաշնակիցը նրա թշնամիներին իր տարածք է հրավիրում ՝ ինչ-որ առաքելության անվան տակ, կարծում եմ՝ որոշ ժամանակ հետո Ռուսաստանը համարժեք կեցվածք կդրսեւորի»,-ասաց Նահապետյանը:

Ռազմական փորձագետը շեշտում է ՝ Հայաստանի ռազմաքաղաքական այդ որոշումը բխում է ՀԱՊԿ-ից դուրս գալու եւ 102-րդ ռազմաբազան Հայաստանից հեռացնելու պետական քաղաքականությունից:

Բացի այդ՝ քայլեր են իրականացվում նաեւ նոր ատոմակայանի կառուցման անվան տակ էներգետիկ ինքնիշխանության 40 տոկոսը ապահովող Մեծամորի ատոմակայանը փակելու, Գազպրոմ Արմենիայի նկատմամբ վերահսկողություն իրականացնելու ուղղությամբ, ինչը , ըստ Նահապետյանի, տնտեսական էքսպանսիա է :

«Բոլոր ոլորտներում փորձ է արվում անվտանգային ճարտարապետություն փոխել, թե դա ինչ կարժենա, պետք է նայենք Ղազախստանի, Լիբիայի, Սիրիայի եւ այլ երկրների պատկերը, որտեղ ԱՄՆ-ն մտավ անվտանգության երաշխիքներով եւ այդ ժողովուրդներին համոզեցին, տարբեր խոստումներ տվեցին, բայց մեկ գիշերվա մեջ, օրինակ, Սիրիայից, ԱՄՆ զորքերը դուրս եկան, մեկ օրվա մեջ Աֆղանստանից դուրս եկան եւ ամերիկացիների հետ համագործակցած 4-5 միլիոն աֆղանստանցիներ ուղղակի զոհասեղանին դրվեցին։ Քրդերը, որոնք 7-8 տարի իրենց բնակավայրերում ապրելով, փորձում էին պետություն ստեղծել, ամբողջովին թուրքական զինված ուժերի ագրեսիային ենթարկվեցին, որովհետեւ ԱՄՆ-ը մեկ գիշերվա մեջ զորքերը հանեց Սիրիայից: Սա է Ամերիկան»,-ասաց Նահապետյանը:

Ըստ փորձագետի, Փաշինյանի իշխանությունը փորձում է վարդագույն երազներով կերակրել ժողովրդին, իսկ իրատեսական լինելու համար պետք է փաստել, որ ՀԱՊԿ-ում Հայաստանը առանձնապես դերակատարություն չունի եւ 102-րդ ռազմաբազան Հայաստանից հանելն էլ ՌԴ-ի համար խնդիր չէ: «Թող Հայաստանի ռազմաքաղաքական ղեկավարությունը եւ քաղաքացիները գնան ՝ թուրքերի հետ լեզու գտնեն՝ այս պայմաններում: Այն, ինչ Ալիեւն ասում է, Էրդողանի շուրթերին է, երբ նա ասում է Երեւանը մերն է: 100 հազար թուրք ու մի այդքան էլ ադրբեջանցի, երբ գան ու Երեւանում ապրեն, գուցե վտանգն այդ ժամանակ զգա հայ ժողովուրդը, որը կրկին գաղթականի ցուպն է վերցնելու, ինչպես Օսմանյան կայսրության տարիներին»,-եզրափակեց Նահապետյանը:

Աղբյուր` Փաստինֆո