Փաստ ինֆո

Նիկոլ Փաշինյանի ընտանեկան թերթով կազմակերպված արտահոսքի միջոցով, Փաշինյանը փորձ է անում հայ հասարակությանը պատրաստել աշխարհաքաղաքկան ռեվերսի։ «Փաստինֆո»-ի հետ զրույցում նման կարծիք հայտնեց քաղաքական մեկնաբան Հայկ Խալաթյանը։

Հայկ Խալաթյանի խոսքով, Նիկոլ Փաշինյանի ընտանեկան թերթի միջոցով կազմակերպվող արտահոսքերը, առհասարակ, նորություն չեն, բայց նոր է այն հանգամանքը, որ եթե ժամանակին Նիկոլ Փաշինյանը վախենում էր Ռուսաստանին ուղղված բացահայտ մեղադրանքներ հնչեցնել կամ դրանք հնչեցնելուց հետո հրաժարվում էր իր խոսքերից, ապա այժմ նկատելի է հստակ հակառուսական արշավը, որն իրականացվում է թե՛ իշխանության ներկայացուցիչների, թե՛ իշխանական լրատվամիջոցների կողմից։

«Ստեղծված իրավիճակում, իհարկե, որոշակի հակառուսականության հիմքեր տալիս է Ռուսաստանն՝ ինքը, իր քաղաքականությամբ, բայց, իմ կարծիքով, այս արշավի գլխավոր նպատակը հասարակությանն աշխարհաքաղաքական ռեվերսի պատրաստելն է, որը կարծում եմ, բացահայտ կդրսեւորվի Ադրբեջանի հետ խաղաղության պայմանագիրը կնքելուց հետո»,-ասում է Խալաթյանը։

Հիշեցնենք, որ Նիկոլ Փաշինյանի ընտանեկան թերթի՝ ՀԺ-ի կայքը հերթական արտահոսքն է արել՝ հղում անելով «հավաստի աղբյուրին»։ «ՌԴ-ի գործողությունների իմաստը հետևյալն է՝ ցույց տալ Հայաստանի անվտանգային խոցելիությունը, որպեսզի վերջինս րոպե առաջ դիմի «Ռուսաստան-Բելառուս» միութենական պետության մաս դառնալու համար։ Այս տրամաբանությունը զարգացնելու քայլերը Ադրբեջանի ագրեսիվությունն է, ՀՀ-ում տեղակայված ռուսական զորքի իներտությունը, Ռուսաստանի քաղաքական իներտությունը և Հայաստանին զենքի մատակարարման պարտավորությունները չկատարելը»,-գրել է պարբերականը , նաեւ նշելով, որ Ռուսաստանին պետք է ԼՂ հարցի չլուծում, այսինքն, որ ԼՂ հարցը լինի չլուծված, որպես ազդեցության լծակ թե Հայաստանի, թե Ադրբեջանի վրա։ ՌԴ նախագահի մամուլի խոսնակ Դմիտրի Պեսկովը «անհեթեթություն» է հրապարակումը, իսկ ՀՀ ԱԺ նախագահ Ալեն Սիմոյանն էլ ասել է, որ Ռուսաստանի Դաշնությունը չի ստիպում Հայաստանին Միութենական պետության մի մասը դառնալ․ «Նման խոսակցություն չկա և չի էլ կարող լինել, քանի որ Հայաստանի անկախությունն ու ինքնիշխանությունը քննարկման ենթակա չեն»։

Հայկ Խալաթյանը նկատում է, որ ռուսական քաղաքականության յուրահատկությունն է՝ առանձնապես ուշադրություն չդարձնել նման արշավներին։ Ըստ Խալաթյանի, Ռուսաստանը հասցեական կարծիքին մեծ ուշադրություն չի դարձնում նույնիսկ իր երկրում, ինչի վառ ապացույցն այն բազում հարցերն են, որոնք կան ռուս հասարակության մեջ՝ կապված ուկրաինական պատերազմի , ռազմական ղեկավարության բացթողումների հետ, ուստի զարմանալի չէ, որ Հայաստանում հնչող հարցադրումները եւս ՌԴ իշխանություններին շատ չեն մտահոգելու։ Ինչ վերաբերում է միութենական պետության գաղափարին, Խալաթյանն ասաց․ «Եթե նախկինում նույնիսկ այդ գաղափարը կար, ապա այս պահին, տեսնելով, թե ինչ լրջագույն իրավիճակ է Ռուսաստանում ՝ ուկրաինական պատերազմով եւ Արեւմուտքի հետ առճակատմամբ պայմանավորված, դժվար թե Ռուսաստանը ցանկություն ունենա այս պահին զբաղվել Հայաստանին համոզելու՝ մտնել միութենական պետություն»։

Աղբյուր` Փաստինֆո