Փաստ ինֆո

«Լուսավոր Հայաստան» կուսակցության ներկայացուցիչ Դավիթ Խաժակյանի հաղորդման հիման վրա «Քաղաքացիական գիտակցություն» ՀԿ ղեկավար Նարեկ Սամսոնյանի նկատմամբ հարուցված քրեական գործը կարճվել է՝ հանցակազմի բացակայության հիմքով: Այս մասին «Փաստինֆո»-ն տեղեկանում է Նարեկ Սամսոնյանից:

Հիշեցնենք, որ Նարեկ Սամսոնյանը 2021թ դեկտեմբերին ձերբակալվել էր՝ Դավիթ Խաժակյանի հաղորդման հիման վրա՝ ծանր վիրավորանքի հատկանիշներով հարուցված քրեական գործի շրջանակներում: Հատկանշական է, որ սույն հոդվածը չի սահմանում որպես պատիժ ազատազրկում: Դատարանը ոչ իրավաչափ էր ճանաչել Սամսոնյանի ձերբակալությունը և Սամսոնյանն ազատ էր արձակվել հենց դատական նիստերի դահլիճից: Նարեկ Սամսոնյանին մեղադրանք էր առաջադրվել ՀՀ Քրեական օրենսգրքի 137.1-րդ հոդվածով՝ ծանր վիրավորանքի հատկանիշներով: Քրեական գործով ներգրավված էր նաև Վազգեն Սաղաթելյանը:

Քրեական գործը Երևանի ընդհանուր իրավասության դատարանի դատավոր Վահե Միսակյանի վարույթում էր գտնվում: Հուլիսի 1-ից ուժի մեջ է մտել ՀՀ քրեական նոր օրենսգիրքը, որով ծանր վիրավորնքն ապաքրեականացվել էր և, ըստ այդմ, հոդվածի ապաքրեականացման հիմքով վարույթը ենթակա էր կարճման:

Նարեկ Սամսոնյանը տեղեկացրեց, որ միջնորդություն է ներկայացվել՝ հանցակազմի բացակայության հիմքով քրեական հետապնդումը դադարեցնելու և գործի վարույթը կարճելու մասին, որին միացել է նաև մեղադրող կողմը: Դատարանը խորհրդակցական սենյակում որոշում է կայացրել միջնորդությունը բավարարելու և քրեական հետապնդումը հանցակազմի բավակայության հիմքով դադարեցնելու մասին:

Նշենք, որ այսպես կոչված «ծանր վիրավորանքը» քրեականացվել է Նիկոլ Փաշինյանի իշխանության օրոք՝ 2020 թվականի 44 օրյա պատերազմից հետո, որն օգտագործվեց քաղաքական ընդդիմախոսներին լռեցնելու համար։ Նշված հոդվածի ներմուծումը քննադատվել էր նաե միջազգային կառուցների կողմից՝ գնահատվելով որպես հետքայլ։

Հեղինակ՝ Իզաբել Սահակյան

Աղբյուր` Փաստինֆո