Փաստ ինֆո

Ստեղծված վիճակից դուրս գալու համար արցախահայությունը պետք է ոտքի կանգնի և պահանջի հարգել իր ինքնորոշման իրավունքը։ Դա Արցախը փրկելու այս պահին ունեցած մեր միակ հնարավորությունն է։ Միջազգային հանրությունը չի կարող ականջալուր չլինել120 հազար մարդու կամարտահայտմանը։ Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության քարտուղար Դավիթ Գալստյանը։

«Այնպիսի իրավիճակում ենք, որ բոլոր կուսակցական, իշխանական շահերը պետք է մի կողմ թողնել և համերաշխություն սերմանել ժողովրդի մեջ, նրան դարձնել պահանջատեր՝ իր երկրի ճակատագրի հարցում։ Այլ տարբերակ մեզ չի մնացել։ «Հանուն Արցախի պաշտպանության» շարժումը, որին միացել ենք նաև մենք, հենց այդ խնդիրն է, որ պետք է լուծի։ Միջազգային հանրությանը հստակ մեսիջներ է պետք փոխանցել, որ այսօր Արցախում ապրող հայերը, ինչպես մնացյալ ազգերը, իրավունք ունեն օգտվելու ազգերի ինքնորոշման իրավունքից և ինքնորոշվելու այն տարածքում, որտեղ պատմաիրավական առումով ապրել են հազարամյակներ շարունակ»,-ասաց Գալստյանը՝ հիշեցնելով, որ Արցախում բազմաթիվ են այդ իրողությունը փաստող պատմական հուշարձանները, որոնք մի քանի անգամ ավելի հին են, քան Ադրբեջանը։

Գալստյանի դիտարկմամբ՝ Արայիկ Հարությունյանի հրաժարականի պահանջը բխում էր հենց այդ տրամաբանությունից։ Ըստ նրա՝ գործող իշխանության՝ ժողովրդին համախմբելու կոչերը ձևական բնույթ են կրում և իրականում ավելի են մեծացնում պառակտումը։ Մյուս կողմից էլ, նրա պնդմամբ, պարտված իշխանությունը, ինչպես ցույց է տվել փորձը, ժողովրդին համախմբել, նրան վստահություն ներշնչել չի կարող։
«2020թ. մարտ-ապրիլին ասում էինք, որ Փաշինյանն ուզում է Արցախի հարցը մեկընդմիշտ փակել և քարոզարշավի ժամանակ հանրությանը կոչ էինք անում նրա խամաճիկ իշխանությանը՝ ի դեմս Արայիկ Հարությունյանի, քվե չտալ, որ այդ չարաբաստիկ ծրագիրը կյանքի չկոչվի։ Մեզ այդ ժամանակ մեղադրեցին մարդկանց մեջ վախ սերմանելու մեջ։ Ցավոք, հաղթեց Հարությունյանը և արդյունքում այսօր ունենք այն, ինչ ունենք»,-նշեց Գալստյանը։

Արցախի ԱԺ պատգամավորի համոզմամբ՝ Հայաստանն Արցախի անվտանգության երաշխավորից ուղղակի բանակցային կողմ դարձավ Փաշինյանի՝ Արցախի վերաբերյալ արված հայտնի՝ «Արցախը Հայաստան է ու վերջ», «նոր պատերազմ՝ նոր տարածքներ» հայտարարություններից հետո.

«Այդպիսով բանակցությունները տարան փակուղի։ Ադրբեջանն էլ որոշեց փակուղուց դուրս գալ պատերազմով։ Հայկական կողմից բանակցողներն այսօր միայն կապիտուլյացիոն փաստաթուղթ են կարողանում ստորագրել, որը երբևէ խաղաղություն չի բերելու. դա կասկածից վեր է»։

Գալստյանն այն համոզմունքին է, որ Փաշինյանին իշխանության բերողները նրա առաջ պահանջ են դրել՝ մեկընդմիշտ փակել Արցախի հարցը, և հիմա ՀՀ-ի և Ադրբեջանի միջև կռվախնձոր է դարձել Սյունիքը։

Ընդգծելով Հայաստանի ու Արցախի՝ մեկ միասնական անվտանգային համակարգի մաս լինելը՝ Դավիթ Գալստյանը վերահաստատում է այն միտքը, որ մայր Հայաստանի և Արցախի անվտանգությունը, կապերն ու հեղինակությունը վերականգնելու առաջին անհրաժեշտ պայմանը գործող իշխանությունների հեռացումն ու համաժողովրդական կոնսոլիդացիան է։

«1990-ականներին համաժողովրդական շարժումը ցույց տվեց, որ դա աշխատող տարբերակ է, իսկ մենք սխալվելու հնարավորություն չունենք այլևս։ Ըստ այդմ՝ պետք է ընտրենք փորձված ու հաջողած ուղին՝ համաժողովրդական պայքարը»,-եզրափակեց մեր զրուցակիցը։

Աղբյուր` Փաստինֆո