Փաստ ինֆո

Ադրբեջանի սանձազերծած ագրեսիայից հետո ստեղծված սահմանային իրավիճակի և երեկվա ՏԻՄ ընտրությունների արդյունքների վերաբերյալ «Փաստինֆո»-ն զրուցել է «Հայաստան» խմբակցության պատգամավոր, Սյունիքի նախկին մարզպետ Վահե Հակոբյանի հետ:

- Պարո՛ն Հակոբյան, ՀՀ ինքնիշխան տարածքի նկատմամբ ադրբեջանական վերջին ագրեսիայից հետո Հայաստանը  կրկին  մարդկային և տարածքային ցավոտ կորուստներ է ունեցել, ընդ որում, այն վայրերում, որտեղ թշնամին առաջ  է եկել, ամրաշինական աշխատանքներ է անում, դիրքեր է կառուցում: Ինչի՞ հետևանք է այս ամենը.

-Այս ամենը ամենաթողության հետևանք է,  մենք այսօր անատամ կառավարություն ունենք, որը շարունակում է իր որդեգրած, ի սկզբանե մահացած թեզը, որ ամեն գնով գնալու են խաղաղության, հիմա իրենք գնում են խաղաղության՝ մեր ինքնիշխանության հաշվին:

- Իշխանության ներկայացուցիչները, որոնք բազմիցս մեղադրել են ընդդիմադիրներին՝ հասարակության  մեջ խուճապ տարածելու համար, այժմ իրենք են գրեթե ամենօրյա ռեժիմով հայտարարում, որ Ադրբեջանը նոր պատերազմի է պատրաստվում, ընդ որում՝ նաեւ  ուղղությունն են նշում՝ Նախիջևանի կողմից.

-Իսկ ինչո՞ւ են դա անում, իրենք հող են նախապատրաստում, որ երկրորդ կապիտուլացիոն փաստաթուղթը ստորագրեն, որը իրենք պայմանականորեն կոչում են «խաղաղության պայմանագիր», որպեսզի ժողովուրդը հակված լինի, որ ավելի լավ է ստորագրենք, քան էլի պատերազմ լինի, սա ակնհայտ գիծ է, որ այսօր իշխանությունները տանում են:

- Այսինքն սա միայն մարդկանց մեջ խուճապ մտցնելու համա՞ր է արվում, պատերազմի վտանգ չկա՞։

-Այնպես չի, որ պատերազմի վտանգ չկա, բայց ավելի շատ հասարակությանը վախեցնելու համար են անում, որպեսզի համոզեն մարդկանց, որ իրենք պետք է այսպես  կոչված «խաղաղության պայմանագիրը» ստորագրեն:

-Պարոն Հակոբյան, վերջերս ԱԺ-ում Նիկոլ Փաշինյանը հայտարարեց, որ նոր պայմանագիր է պատրաստվում ստորագրել՝ որպես կարմիր գիծ նշելով Հայաստանի «29 հազար 800 քկմ» տարածքը, որից հետո հերքեց իր իսկ ասածը: Փորձագիտական տարբեր շրջանակներ պնդում են, որ Փաշինյանի նշած այս «29 հազար 800 քկմ»-ը չի ընդգրկում ոչ միայն Արցախը, այլ նաև անկլավները, այսինքն նա պատրաստվում է Ադրբեջանին հանձնել նաև անկլավները, սրա մասին ի՞նչ կասեք՝ արդյո՞ք նոր փաստաթուղթ կա դրված բանակցային սեղանին.

-Ես ենթադրում եմ՝ անկլավներն էլ է հանձնելու, բացի սրանից, մենք չգիտենք այդ փաստաթղթի բովանդակությունը։ Մեռանք ասելով՝ հանրայնացրե՛ք այդ փաստաթուղթը, ի՞նչ է դրա մեջ գրված, անկլավնե՞ր է տալիս, գյուղե՞ր է տալիս, ի՞նչ է անելու, ինչի՞ հաշվին, բացի սա՝ Արցախը ի՞նչ կարգավիճակ է ստանալու այդ փաստաթղթով, անցնում է Ադրբեջանի՞ն, սրա համար պնդում ենք, որպեսզի հանրայնացնեն բովանդակությունը:

-Փաշինյանի այս հայտարարությունից հետո մեծ թվով քաղաքացիներ էին հավաքվել ԱԺ-ի  մոտ՝ պահանջելով հստակեցնել՝ ի՞նչ փաստաթուղթ է, մի մասին էլ պահանջում էր Փաշինյանի հրաժարականը, սակայն ինքնաբուխ հավաքը ժամեր անց ցրվեց, քանի որ չկար առաջնորդ, ենթադրվում էր, որ պետք է մարդկանց կազմակերպելու և առաջնորդելու գործը ընդդիմադիրներից որևէ մեկը ստանձնի, ինչու՞ հերթական անգամ ձախողվեց.

-Եթե խոսքը մեր մասին է, մենք չենք էլ փորձել դա կազմակերպել: Այնտեղ տարբեր տեսակի՝ մանր, ուժեղ, էժան ուժերից մարդիկ էին հավաքված, ուստի այնտեղ առաջնորդելն անհնարին էր, հիշո՞ւմ եք՝ մարդիկ ի՞նչ ռեակցիաներ էին տալիս, այնտեղ կային պրովոկատորներ մեծ քանակով, մեզ փորձեցին դնել անելանելի իրավիճակի մեջ, որ մենք ստիպված ինչ-որ քայլերի գնանք, իսկ որ կոչեր էին անում իշխանական պատգամավորներին բերել, ստիպել, որ ստորագրեն իմպիչմենթի փաստաթղթի տակ, բա հաջորդ օրը պատգամավորները եկել էին ԱԺ՝ ո՞ւր էր այդ ժողովուրդը, որ ամբողջ գիշեր ման էր գալիս պատգամավորներին:

-Պարո՛ն Հակոբյան երեկ կայացած ՏԻՄ ընտրությունների արդյունքների  հերթական անգամ «շոկի» ենթարկեց հասարակության մեծ մասին: Անգամ այն համայնքներում, որոնք գործող իշխանության օրոք դարձել են սահմանամերձ՝նույն Իշխանասարը,որի բնակչությունը թշնամու նշանառության  տակ է, ձայն է տվել ՔՊ-ին, այս մասին ի՞նչ կասեք, արդյո՞ք սա արտացոլում է հասարակական տրամադրությունների իրական պատկերը.

-Դա արտոցոլում է մեր այսօրվա իրավիճակը, ինչպե՞ս կարող է Իշխանասարում ՔՊ-ն անգամ մեկ ձայն հավաքի, բայց մենք նաև տեղեկություններ ունենք, որ բազմաթիվ ընտրախախտումներ են եղել, փաստը մնում է փաստ, որ Սյունիքում ՔՊ-ն բոլոր տեղերը հաղթեց, Սիսիանում դեռ պայքար է լինելու, բայց, օրինակ, Քաջարանում հաղթել է, սա է պատկերը:

Ադրբեջանական ագրեսիայի հետևանքով Իշխանասարի բնակչությունը տարհանված է, քիչ թվով մարդիկ կան այնտեղ, արդյո՞ք այս դեպքում ավելի հեշտ չէր ընտրության արդյունքներ կեղծելը, վարչական ռեսուրսի կիրառելը.

 -Իհարկե հեշտ էր, վարչական ռեսուրսը շատ մեծ նշանակություն ունի, եթե օրինակ սպառնում են դպրոցի պահակին, որ 60.000 դրամից կզրկվի, իսկ իր համար սա մեծ գործոն է և հերթական անգամ ամբողջ ուժով աշխատել է վարչական ռեսուրսը՝ գումարած ճնշումներ։

- Ընդդիմադիր շատ գործիչներ՝ ոչ պատգամավորներ, ընտրության արդյունքներից հետո մեղադրում են ժողովրդին, որ այսքանից հետո կրկին ձայն են տվել ՔՊ-ին, որոշ դեպքերում նաև  պիտակավորում են մարզերի բնակիչներին, սրան ինչպե՞ս եք վերաբերվում, արդյո՞ք ճիտ է միայն ժողովրդին մեղադրելը, քաղաքական դաշտն իր մեղավորությունը չունի՞.

-Իսկ ո՞վ է մեղադրում, մենք նախևառաջ պետք է հասկանանք՝ այդ նույն քաղաքական դաշտի ներկայացուցիչները, որոնք մեզ հետ կապ չունեն, իրենք ի՞նչ նպատակ են հետապնդում, ինչքա՞նով են իրենք սպասարկում այս կամ այն ուժերի, անհատների հետաքրքրությունը, այստեղից պետք է սկսել, հետո որոշենք ՝ ճի՞շտ են մեղադրում, միգուցե առաջինհերթին իրենք իրենց մեղադրեն:

-Ի՞նչ  եք կարծում, որպես ընդդիմություն, արե՞լ եք հնարավոր ամեն բան, որպեսզի երկրում այս իրավիճակը չստեղծվի.

-Մաքսիմալը, ինչ հնարավոր էր, սա խորհրդարանական ընդդիմության մասին եմ ասում, մենք արել ենք և շարունակում ենք անել:

Աղբյուր` Փաստինֆո