Փաստ ինֆո

Հայաստանի ու Արցախ նախկին ղեկավարներն ու Վեհափառ հայրապետը լավ են հասկանում հանրային սպասելիքները, նրանք լավ են տեսնում, որ այդ հանդիպումը, ըստ էության, հանրային պահանջ էր, այո, հնչած Իշխան Սաղաթելյանի շուրթերով, բայց դա հանրային պահանջ էր։ «Փաստինֆո»-ի հետ զրույցում նման կարծիք է հայտնել քաղաքագետ Հրանտ Մելիք-Շահնազարյանը՝ անդրադառնալով երեկ երեկոյան Մայր Աթոռում կայացած հանդիպմամը։
«Նրանք, ինչ-որ տեղ նաեւ ստիպված էին վերջապես մի կողմ դնել բոլոր տարաձայնությունները, առկա խնդիրները եւ նստել սեղանի շուրջ»,-ասաց քաղաքագետը՝ շեշտելով, որ քննարկումների շարունակականության մասին հաղորդումն արդեն իսկ թույլ է տալիս ակնկալել, որ հանրությանն առաջարկ կներկայացվի։

Ավելի վաղ տեղեկացրել էինք, որ Մայր Աթոռում կայացել է ՀՀ եւ ԼՂ նախկին նախագահների հանդիպումը Ամենայն Հայոց Կաթողիկոսի հետ։ Մայր Աթոռի տեղեկատվական համակարգից հայտնել էին, որ սեպտեմբերի 22-ին, հրավերով Ն․Ս․Օ․Տ․Տ․ Գարեգին Երկրորդ Ամենայն Հայոց Կաթողիկոսի, Մայր Աթոռ Սուրբ Էջմիածնում տեղի է ունեցել հանդիպում՝ մասնակցությամբ Հայաստանի Հանրապետության նախագահներ Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի և Լեռնային Ղարաբաղի Հանրապետության նախագահներ Արկադի Ղուկասյանի և Բակո Սահակյանի:Հայաստանում ստեղծված իրավիճակի առնչությամբ տեղի է ունեցել շահագրգիռ քննարկում։ Որոշում է ընդունվել շարունակել հանդիպումները։

«Չափազանց կարեւոր է փաստը, որ նախկին նախագահները, ամեն դեպքում, որոշել են միասին քննարկել ստեղծված իրավիճակը եւ միասնական լուծում գտնել եւ միայն այն փաստը, որ այդ հանդիպումները շարունակվելու են, արդեն իսկ խոսում է այն մասին, որ Հայաստանի եւ Արցախի նախկին ղեկավարները եւ Վեհափառ հայրապետը ինչ-որ գործողություն արդեն իսկ նշմարել են, հակառակ պարագայում նման քննարկումներն անիմաստ կլինեին» ,-համոզմունք հայտնեց Հրանտ Մելիք-Շահնազարյանը՝ ընդգծելով, որ միամտություն կլիներ կարծել, թե հասարակությանը ներկայացվելիք առաջարկը կձեւավորվի առաջին իսկ հանդիպման ընթացքում։

Նրա արձանագրմամբ՝ հարցը շատ ավելի լայն համատեքստ ունի, քան զուտ ներքաղաքականը, խոսքը ազգային խնդիրներին ու պետության պահպանմանն է վերաբերում։ «Չեմ բացառում եւ որեւէ խնդիր չեմ տեսնում, եթե Մայր Աթոռն այստեղ ավելի լուրջ դերակատարում ստանձներ։ Կարծում եմ, որ մեկ հանդիպումը նման առաջարկ ձեւավորելու համար բավարար չէ , երեւի թե, բավարար չէ նաեւ երկու, երեք հանդիպումերը։ Ես կարծում եմ, որ զուգահեռ պետք է նաեւ այլ գործընթացներ գնան, նաեւ այլ մակարդակներում՝ հանրության եւ ժողովրդի ողջ ռեսուրսը՝ մտավոր, ուժային, կենտրոնացնելու եւ միասնականության դաշտ բերելու։ Այս աշխատանքը պետք է շարունակվի նախագահների քննարկումներին զուգընթաց»,-կարծում է Հրանտ Մելիք-Շահնազարյանը։

Հարցին, արդյո՞ք երկիրը տեւական գործընթացի ժամանակ ունի, քաղաքագետն արձագանքեց․«Ժամանակ ունենալու հարցը ռացիոնալ դաշտում չէ, այո, իհարկե, որքան Նիկոլ Փաշինյանը շարունակում է զբաղեցնել վարչապետի պաշտոնը, այնքան նոր աղետներ են գալիս Հայաստանի գլխին, բայց, դրա հետ մեկտեղ, նաեւ պարզապես ֆիզիկապես ու տեսականորեն, հնարավոր չէ մեկ օրում լուծում գտնել եւ շատ արագ իրականացնել։ դա գործընթաց է,ո րը պետք է անցնել։ Որքան էլ մենք ցանկանանք արագ տուն ունենալ, պետք է սպասել մինչեւ շինարարությունն ավարտվի»։

Ինչ վերաբերում է հնարավոր ձեւաչափին, որը հոգեւոր ու աշխարհիկ առաջնորդները կարող են ներկայացնել հանրությանը, բանախոսը նշեց․«Կարծում եմ, որ իրենց առջեւ դրված խնդիրը բավական պարզ է՝ նախ, որոշում կայացնել, որ պետք է փոխել այս իշխանություններին, իսկ ես կարծում ե, որ այդ որոշումն արդեն իսկ կայացված է եւ կայացվել է առաջին հանդիպման ընթացքում, երկրորդ, հասկանալ, թե ինչպես են հասնելու առաջին հարցի լուծմանը։ Երրորդ խնդիրն արդեն այն մասին է, թե ինչ թիմով պետք է ներկայանալ։ Իրականում շատ բան չկա անելու, ես չեմ բացառում եւ նույնիսկ ուրախ կլինեմ, որ օրինակ, նույն Բագրատ Սրբազանի թեման, որ այս օրերին շատ քննարկվում է, զարգացում ստանա նաեւ նախագահների եւ վեհափառի քննարկումներում եւ Բագրատ Սրբազանը՝ որպես հոգեւոր առաջնորդ, իր կողքին ունենալով նաեւ քաղաքական առաջնորդներ, կարողանա ձեւավորել մի նոր շարժում կամ ձեւաչափ եւ լուծել ժողովրդի կողմից էլիտաների առջեւ դրված խնդիրները»։

Քաղաքագետը լիահույս է, որ սկսված գործընթացը դրական արդյունք եւ բարեհաջող ավարտ կարող է ունենալ։

Աղբյուր` Փաստինֆո