Փաստ ինֆո

Իմքայլական նախկին պատգամավոր Սոֆյա Հովսեփյանը համոզված է, որ իշխող խմբակցության որոշ ներկայացուցիչների ագրեսիվ ու ցայտնոտային պահվածքը խորհրդարանում պայմանավորված է այն հանգամանքով, որ ԱԺ նախագահ Ալեն Սիմոնյանին այդպես էլ չհաջողվեց խորհրդարանական ընդդիմությանը բերել խորհրդարան՝ իշխանական օրակարգով։ Սոֆյա Հովսեփյանը վստահ է, որ ցայտնոտային վիճակ է ոչ միայն սկանդալային պատգամավոր Քրիստինե Պողոսյանի, այլեւ մյուսների մոտ եւս։

«Եթե հիշում եք, նիստերի հենց առաջին օրը Ալեն Սիմոնյանը առաջարկեց ստեղծված իրավիճակից ելնելով, միասնաբար հայտարարություն ընդունել եւ անընդհատ համերաշխության կոչ էր անում, բայց, որպես իշխող կուսակցության ներկայացուցիչ եւ ԱԺ նախագահ, ինքը պետք է մի կարեւոր գիտակցում ունենա՝ ԱԺ նախագահը պետք է համախմբման ու փոխադարձ հարգանքի կոչերն անի ամբողջ տարվա ընթացքում եւ ոչ թե այն ժամանակ, երբ պատերազմ է, մինչդեռ Ալեն Սիմոնյանը եւ իր հրահանգով նաեւ մյուսները, ամբողջ տարի ԱԺ-ն վերածեցին քաոսի, փորձեցին անարգել այդ մարմինը, եւ երբ կրակոցներ էին, միասնականության կոչ էին անում՝ հրավիրելով մարդկանց իրենց հետ տանել իրենց կեղտոտ բեռը, այն բեռը, որն իրենք են ստեղծել ամբողջ հանրապետության համար»-«Փաստինֆո»-ին ասաց Սոֆյա Հովսեփյանը՝ հավելելով, որ զարմանալի չէ, որ, երբ ընդդիմությանը հաջողվեց իր օրակարգը թելադրել, ցայտնոտի մեջ հայտնվեցին իշխող խմբակցության պատգամավորները եւ հատկապես նրանք, որոնք մշտապես աչքի են ընկել իրենց վարքագծով։

Նախկին պատգամավորը դիտարկմամբ՝ ի տարբերություն նախորդ կոնֆլիկտային իրավիճակների, այս անգամ իշխանական արական սեռի պատգամավորները կանանց միջոցով հրահերցին մթնոլորտը, որովհետեւ ժողովուրդը նրանց ուղղակի կարող էր ասել՝ կռվո՞ղ եք, գնացե՛ք առաջնագիծ։

Հիշեցնենք, խորհրդարանում, երբ «Հայաստան» դաշինքի պատգամավոր Գեղամ Մանուկյանը, ով միակն էր դահլիճում ընդդիմադիրներից, ելույթով ներկայացնում էր երկրում ստեղծված իրավիճակն ու մի շարք խնդիրներ բարձրացնում, քայլական պատգամավորները կոնֆլիկտ հրահրեցին՝ տեղերից ռեպլիկներ հնչեցնելով, իսկ Քրիստինե Պողոսյանը, որը լրագրողների շրջանում արդեն իսկ վաստակել է «շմայսուհի» մականունը իր անզուսպ վարքի պատճառով, մոտեցավ Գեղամ Մանուկյանին եւ սկսեց հաշիվ պահանջել նրանից։ Նույն օրը նույն պատգամավորը սկանդալ էր հրահրել խորհրդարանում աշխատող լրագրողի հետ , վիրավորել էր եւ հեռախոսով փորձել հարվածել նրան, որը նրան հիշեցրել էր 2018թ իրադարձություններից մի դրվագ։

«Իշխանական խմբակցությանը հաջողվեց կանանց միջոցով կազմակերպել անզուսպ կոնֆլիկտը եւ Գեղամ Մանուկյանի ելույթի ժամանակ անզուսպ հռհռոցը, որը, եթե անգամ անեկդոտ պատմեր այդ պահին, Շիրակի մարզի պատգամավորը, որի մարզում այս պահին զոհված եւ դեռ հողին չհանձնված զինվորներ կան, ուղղակի իրավունք չուներ այդպես հռհռալ»։

Սոֆյա Հովսեփյանը համոզված է, որ անգամ երրկրի համար ստեղծված օրհասական պահին Նիկոլ Փաշինյանի կողքին մնալու պատճառը , նրա շուրջը համախմբվածների համար, նախ եւ առաջ արժեքային նմանություններն են։ «Այն մարդիկ, որոնք արժեքային տարաձայնություններ եւ տարբեր մտածողություն ունեին, ուղղակի Փաշինյանի կողքին չեն։ Բնական է, որ պետք է լիներ այդ , այսպես ասած, կոնֆլիկտը»։ Ավելին, նա չի կարծում, որ իշխանական ներկայիս պատգամավորները կմասնակցեն Փաշինյանի իմպիչմենտի գործընթացին, որովհետեւ այնտեղ բոլորը տարբեր կապերով կապված են Փաշինյանին կամ նրա թիմի այլ անդամներին։ Բացի այս, Փաշինյանը կարողացել է գտնել յուրաքանչյուրի թույլ կետը եւ որպես զսպօղակ իր ձեռքում է պահում եւ սա է խնդիրը, որ որեւէ մեկը անգամ ռիսկ չի անի։ Այնտեղ այլեւս չկան մարդիկ, որոնք դեմ կգնան Փաշինյանին, իրենց համար ոչ զինվորն է արժեք, ոչ որեւէ մեկը։ «Որեւէ մեկին տեսա՞ք ցավակցական խոսք կամ ափսոսանքի գրառում զինվորի զոհվելու առիթով կամ կորսված տարածքների մասին, բայց բոլորը միանշանակ հարձակվեցին հանրության վրա՝ պաշտպանելով Փաշինյանին, թե նա որեւէ փաստաթուղթ չի ստորագրել եւ նման խոսակցություն չի եղել»,-ընդգծեց Հովսեփյանը՝ շեշտելով, որ իշխանական պատգամավորներն անգամ իրենց տրված հարցերն են ընթերցում։ Սա արդեն իսկ արժանապատվության մասին է խոսում։

Ինչ վերաբերում է հարցին, թե արդյո՞ք այդ անձինք գիտակցում են, որ իրենք այլեւս մերժված են հասարակության կողմից, նախկին պատգամավորն արձագանքեց՝ միանշանակ կա, թեեւ հասարակության մեջ քծնողների բանակը եւս կա, որն էլ հենց նրանց , այսպես ասած, ապրեցնում է։

«Մի կարեւոր բան պետք է հիշենք՝ իրենք հասկանում են, որ սա իրենց վերջին շանսն է, ինչու՞ այն կորցնեն, շատերը այդ աշխատավարձի կարիքն ունեն, վերջապես, անգործության մատնված լինելով, ստանում են այն, իրենք պարապուրդի մատնված գումարներ են ստանում ։ Մյուս կողմից էլ իշխանությունը շատ լավ մեդիառեսուրսներ ունի, որի միջոցով հարձակվում եւ փորձում է քայքայել մարդուն։ Ամեն ոք չէ, որ այդքան կամքի ուժ կունենա՝ դուրս գալու եւ ասելու, որ որքան էլ ինձ հարվածես, այդ հարվածները քեզ են վերադառնալու»,-նշեց Սոֆյա Հովսեփյանը։

Անդրադառնալով պատասխանատվության խնդրին՝ նա կարծիք հայտնեց, թե իշխանականները, պարզապես, վստահ են, որ այս երկրում որեւէ մեկը պատասխանատվություն չի կրելու։ «Իրենք վստահ են, որ իրենցից որեւէ մեկի հետ որեւէ բան չի պատահելու, բայց ցավալին այն է, որ իրենք չեն հասկանում, որ ընդամենը օգտագործվող գործիք են, որին Նիկոլ Փաշինյանը եւ իր կորիզային թիմը որքան կարող է՝ կօգտագործի ու կփչացնի, ապա դեն կնետի, թողնելով հասարակության դատին, իսկ իրենք՝ իրենց ստեղծածով, թալանածով, գռփածով մի երկրում կապրեն։ Այն շերտը, որն այսօր ընդամենը աշխատավարձ է ստանում եւ կոճակ սեղմում, մնալու է հասարակությանը պատասխան տալու եւ անարգվելու է՝ որքան հնարավոր է։ Ես վստահ եմ, որ այդ սերունդը գալու է, որն իրենց անարգելու է այնպես, որ չկարողանան իրենց տան մեջ հանգիստ ապրել»,-եզրափակեց Սոֆյա Հովսեփյանը։

Աղբյուր` Փաստինֆո