Փաստ ինֆո

Նիկոլ Փաշինյանը դեռևս քարոզարշավի ժամանակ ինքնամոռաց հայտարարում էր, թե խաղաղություն է բերելու, «խաղաղության դարաշրջան» է բացելու, հիմա վերջապես հասկացել է, որ Ադրբեջանը պատրաստ չէ այդ խաղաղությանը և երբեք էլ պատրաստ չի լինելու։ Ավելին, Ադրբեջանը փորձում է իր համար լեգիտիմ հիմքեր ստեղծել՝ ապագայում Հայաստանի բուն տարածքի նկատմամբ նկրտումներ ներկայացնելու համար: «Փաստինֆո»-ի հետ զրույցում նման դիտարկում է արել քաղաքագետ Արա Պողոսյանը՝ մեկնաբանելով Նիկոլ Փաշինյանի՝ Վլադիվոստոկի հայ համայնքի ներկայացուցիչների հետ հանդիպման ժամանակ արված հայտարարություններին:Նշենք, որ Փաշինյանը երեկ բացահայտ հայտարարել էր, որ Ադրբեջանն իրականում նկրտումներ ունի Հայաստանի ինքնիշխան տարածքի նկատմամբ, մասնավորապես Սյունիքի մասով,միևնույն ժամանակ նշել էր, որ, չնայած սրան, Հայաստանը պետք է շարունակի սահմանազատման գործընթացի և խաղաղության օրակարգի շուրջ բանակցությունները:

Ըստ Արա Պողոսյանի՝ Փաշինյանի ասածը այն էր, որ Հայաստանը պատրաստվում է խաղաղության, բայց հնարավոր է այլ սցենար Ադրբեջանի կողմից, որը մեր կողմից կառավարելի չէ.

«Նիկոլ Փաշինյանն առաջին անգամը չէ, որ հայտարարում է՝ Ադրբեջանը խաղաղության նպատակ ամենևին չունի, ինքն այս ամենը շատ լավ է հասկանում, Փաշինյանը նաև պատրաստում է նրան, որ ասի՝ տեսեք, ես ամեն ինչ անում էի խաղաղություն հաստատելու համար, բայց Ադրբեջանը չուզեց: Ցանկացած բանական մարդ հասկանում է, որ մեր տարածաշրջանում չի կարող խաղաղություն լինել, եթե չկա ուժերի հավասարակշռություն, իսկ երբ սա չկա, միշտ ուժեղ կողմը փորձելու է թույլին ճնշել ու պարտադրել այնքան, որքան ցանկանում է »,-ասաց Պողոսյանը:

Քաղաքագետն ընդգծում է՝ ադրբեջանական իշխանությունները պարբերաբար խոսում են իրենց ռազմական միջոցների, զինական միջոցների արդիականացման մասին, նոր զինատեսակների մշակման մասին, ինչը նշանակում է, որ Ադրբեջանը լրջորեն պատրաստվում է, նրանք ունեն գերնպատակ՝ ռազմական գերակայություն ունենալու Հայաստանի նկատմամբ և ոչ մի կերպ չեն համակերպվի իրենց ռազմական գերակայությունը թուլացնելու հետ.

«Ես չեմ հավատում, թե Փաշինյանը կամ նրա թիմը սա չեն հասկանում, բանակցությունների ժամանակ էլ Ալիևի խոսում է նույն հռետորաբանությամբ, ինչպես միշտ, այդ հռետորաբանությունը հուշում է, որ նա որևէ կերպ չի զիջելու իր դիրքերը և Հայաստանին պարտադրելու է իր ուզածը: Փաշինյանը սա հասկանում է, բայց, հասկանալով հանդերձ, գործնական քայլեր չի անում՝ դրանք կառավարելի դարձնելու և ռազմական բալանսը վերականագնելու համար: Կարծում եմ, սրանք հաշվի առնելով է Փաշինայնը պարբերաբար ասում՝ մենք պատրաստ ենք խաղաղության, բայց Ադրբեջանը չի ցանկանում և իր համար լեգիտիմ հիմքեր է ստեղծում՝ Հայաստանի սուվերեն տարածքի հանդեպ նկրտումներ ունենալու մասով»,-ասաց Արա Պողոսյանը:

Աղբյուր` Փաստինֆո